Փաստ ինֆո

Թանկացումները կապված են արտադրանքի ծավալի նվազեցման հետ։ «Փաստինֆո»-ի հետ զրույցում ասաց «Հայաստանի ագրարագյուղացիական միավորում» հկ-ի նախագահ Հրաչ Բերբերյանը։ Վերջինս, անդրադառնալով նախորդ տարվա համեմատ արձանագրված գնաճին, ասաց, որ 3 ամիս է, ինչ բարձրաձայնում են ցանքատարածությունների պակասի մասին։

«Սկսած բանջարեղենից, կարտոֆիլից, քիչ տեսականի է արտադրվել։ Նաև ունեցել ենք մանր/խոշոր եղջերավոր անասունների և խոզերի գլխաքանակի անկում», - ասաց Հրաչ Բերբերյանը՝ ավելացնելով, որ չնայած դրան կառավարության որոշ անդամներ համառորեն փորձում են համոզել, որ գերարտադրություն կա։

«Երկու ամիս է՝ ասում ենք, որ ծիրանի բերքի 40%  կորուստ ունենք, իսկ գյուղնախարարությունը շարունակում է պնդել, որ ռեկորդային բերք ունենք»։

«Փաստինֆո»-ի հարցին արդյո՞ք նախարարությունն իրականությանը չհամապատասխանող տվյալներ է հրապարակում, Հրաչ Բերբերյանը նկատեց, որ վերջին 10-15 տարիներն այդքան էլ արտառոց չեն թիվ նկարելու գործով. «Կեղծիքով չենք կարող առաջ գնալ։ Պետք է հասկանանք խնդիրը, փորձենք լուծել այն։ Պետք է հասկանանք՝ երկիրն ուր ենք տանում, որ ուղղությունն ենք զարգացնում։ Պետք չէ ջայլամի քաղաքականություն վարել»։

Հրաչ Բերբերյանի խոսքով արտադրանքի մեծ ծավալ ապահովելու նպատակով նախ պետք է գյուղացին շահագրգռված լինի հող մշակել. «Հակակարկտային համակարգ կիրառվեց, որը չի աշխատում, հիմա էլ սմարթ ֆերմաներ են ուզում ֆինանսավորել այն մարդիկ, որ կյանքում ֆերմա չեն մտել ու կով չեն տեսել», - հասարակական կազմակերպության նախագահը՝ պնդելով, որ այն, ինչ կառավարությունն է առաջարկում, ժամանակավոր շինություն է, որը խլելու է գյուղացու վարկային միջոցները։

«Կառավարությանը պետք է հարցնել, որտեղ են փորձարկվել այդ գոմերը, որքան ժամանակ դրանք կծառայեն։ Պարզե՞լ են արդյոք ՝որքան է դրանց իրական ինքնարժեքը, թե՞ այդ ծրագրի անվան տակ ուզում են փող լվանալ», - «Փաստինֆո»-ի հետ զրույցում ասաց Հրաչ Բերբերյանը։ Նա վստահեցրեց, որ այդ գումարը գյուղացուն տալու դեպքում նա ավելի լավ գոմ կկառուցի, քան կառավարության առաջարկածը։

Հեղինակ` Հասմիկ Կոշկարյան