Փաստ ինֆո

ՀՀ երկրորդ նախագահ Ռոբերտ Քոչարյանի պաշտպանական խմբի անդամ, փաստաբան Հայկ Ալումյանի գնահատմամբ՝ դատախազության վերաքննիչ բողոքները վարույթ ընդունելու դեպքում Վերաքննիչ քրեական դատարանը կոպիտ ձեւով կխախտի օրենքը։

Հայկ Ալումյանը պարզաբանեց, որ քրեական գործով վարույթը կասեցնելու մասին որոշումը հետեւանք է՝ ՍԴ դիմելու դատարանի որոշման, ինչը չի կարող բողոքարկվել։

«Ընդհանուր իրավասության դատարանը որոշել է դիմել ՍԴ, երկրորդ կետով որոշել է կասեցնել գործի վարույթը, որովհետեւ դիմում է ՍԴ։ Այս երկու որոշումները ամփոփված են մեկ տեքստի մեջ. մեկ որոշմամբ լուծվել է երկու հարց»,- ասաց Ալումյանը՝ նշելով, որ դատախազությունն իր տարածած պարզաբանումների մեջ հայտարարել է, որ քրգործի վարույթ կասեցնելու մասին որոշումը կարողենք բողոքարկել։ «Ասում են կիսատ ճշմարտությունը, որն ավելի վատ է, քան բացահայտ սուտը»,- ընդգծեց փաստաբանը եւ ավելացրեց. «ՍԴ դիմելու մասին որոշումը բողոքարկման ենթակա որոշում չէ։ Այն որ առաջին ատյանի դատարանն ինչ-ինչ պատճառներով համարել է, որ իր կողմից կիրառման ենթակա օրենքը հնարավոր է հակասի Սահմանադրությանը եւ այդ հիմքով կասկած է հայտնել ու դիմել ՍԴ, ապա ոչ մի սուբյեկտ չի կարող միջամտել այս գործընթացին՝ ասի, որ բողոքարկում է, կամ վերաքննիչ դատարանն ասի, դու պետք է չդիմեիր»,- ասաց Հ.Ալումյանը։

Նրա խոսքերով՝ եթե ընդունում ենք, որ ՍԴ դիմելու մասին որոշումը բողոքարկման ենթակա չէ, հետեւապես կասեցնելու մասին որոշումը եւս, որը ՍԴ դիմելու որոշման հետեւանքն է։ «ՍԴ դիմելու որոշմումը բողոքարկման ենթակա չէ, իսկ այդ դեպքում քրգործի վարույթ չէր կարող չկասեցվել՝ այստեղ արդեն երկընտրանք չկա, վերաքննիչ դատարանը չի կարող որեւէ բան փոխել։ Այնուամենայնիվ դատախազությունը վերաքննիչ դատարան դիմել է, այնուամենայնիվ դատախազության վերաքննիչ բողոքը անհասկանալի գործընթացների արդյունքում հայտնվել է տվյալ դատավորի վարույթում եւ ամեն ինչ անելու ենք բացահայտելու այդ գործնթացները, որի արդյունքում դատախազության վերաքննիչ բողոքները հայտնվել են այն դատավորի մոտ, որը երբեւիցե դատախազության քմհաճույքին դեմ չի գնացել»,- ասաց Ալումյանը։

Աղբյուր` Փաստինֆո