Փաստ ինֆո

«Բաց հասարակությունների հիմնադրամ»-ի գրասենյակի դիմաց այս պահին բողոքի ակցիա է։ Այն իրականացնում ՎԵՏՕ շարժումը, որի անդամ Անի Հովհաննիսյանի խոսքով՝ շարժման նպատակն է այնպես անել, որ օտարերկրյա գործակալները Հայաստանից դուրս մղվեն։

Նշենք, որ շարժման մասնակիցների խոսքով այս հավաքը ինքնաբուխ է։ Այդ մասին ֆեյսբուքյան իր էջով հայտարարել էր քաղակտիվիստ Նարեկ Մալյանը. «Այսօր՝մայիսի 31-ին՝ ժամը 12:00-ին ՎԵՏՕ շարժումը խաղաղ, ինքնաբուխ ակցիա է իրականացնելու Սորոսի «Բաց հասարակությունների հիմնադրամ»-ի գրասենյակի դիմաց: Բոլոր այն մարդիկ, ովքեր ցանկություն ունեն միանալու կարող են ժամը 11:50-ին գալ Սուրբ Զորավոր եկեղեցու մոտ»,-գրել էր նա։

Մալյանը նշել էր նաեւ, որ խաղաղ ակցիային մասնակցելը չունի որևէ իրավական հետևանք, իսկ եթե այդպիսիք փորձեն սարքել, ապա ողջ պատասխանատվությունն ինքնակամ ստանձնում է ինքը։

Լրագրողների հետ զրույցում շարժման անդամ Անի Հովհաննիսյանն ասաց, որ իրենց նպատակն է հասնել նրան, որ օրենքով կարգավորվի գործունեությունը այն մարդկանց, ովքեր այլ երկրների փողերով փորձում են իրականացնել ազգաքանդ գործունեություն. «Նրանք չպետք է կարողանան զբաղեցնել պետական բարձր պաշտոններ եւ ունենալ ազդեցություն այն որոշումների վրա, որոնք կարող են վտանգել մեր պետականությունը»։

Լրագրողի այն հարցին, թե ովքեր են այդ մարդիկ, Անի Հովհաննիսյանը պատասխանեց. «Դուք ինքներդ կարող եք բացել եւ տեսնել, որ թե ԱԺ-ում, թե Կառավարությունում կան բազմաթիվ մարդիկ, ովքեր երկար տարիներ գումարներ են ստացել Սորոսից, կատարել են տարբեր տիպի պատվերներ այդ գրասենյակի համար, այսօր զբաղեցնում են բարձր պաշտոններ, եւ ԱԺ-ում լինելով՝ փորձում են իրենց համար անհրաժեշտ նպատակաները ընդունել եւ կիրառել ՀՀ-ում»,-նշեց նա։

Հրապարակային ելույթ ունեցավ նաեւ Նարեկ Մալյանը. «Սորոսի հիմնադրամը մեր երկրի քաղցկեղային ուռուցքն է, դրանով է կազմավորվել եւ կառավարվում մեր Ազգային ժողովը։ Սորոսի գրպանում է գտնվում ՀՀ վարչապետը, որը ունի 2 տարբերակ. կամ ազատվել Սորոսից եւ դրա վաստակներից, կամ ամբողջությամբ կրել դրա վտանգների պատասխանատվությունը»,-հայտարարեց Նարեկ Մալյանը։

Այդ պահին նրան մոտեցավ մի կին եւ հարցրեց, թե ով է ֆինանսավորում իրենց։ Նարեկ Մալյանն էլ պատասխանեց՝ ասելով. «Քոչարյանը, չե՞ք լսել»։ Ավելի ուշ ոստիկանները հեռացրին նրան եւ նա լրագրողների հետ զրույցում ասաց, որ տարածքի բնակիչ է եւ եկել է լսելու, թե ինչ են խոսում ակցայի մասնակիցները։ Լրագրողի այն հարցին, թե ինչն իրեն վրդովեց, նա պատասխանեց՝ «Նրանց ելույթները, հայհոյանքները, անտեղի մեղադրանքները»։

Նշենք նաեւ, որ «Հայաստանի կոմունիստական կուսակցությունը» հայտարարեց, որ միանում է բողոքի ակցիային։

Աղբյուր` Փաստինֆո