Փաստ ինֆո

«Եթե բավարար ապացույցների համակցություն չլիներ, մենք չէին կարողանա Դավիթ Սանասարյանին մեղադրանք առաջադրել»,-այս մասին Հանրային հեռուստաընկերության եթերում քիչ առաջ հայտարարեց ԱԱԾ քննչական դեպարտամենտի պետ Արթուր Աղաջանյանը. «Այդ համակցությունն է հենց հիմք տալիս թե պարոն Սանասարյանին, թե գործով մյուս երեք մեղադրյալներին մեղադրանք առաջադրելու»,-ասաց նա:

Անդրադառնալով լրագրողի այն հարցին, թե ինչ հիմքով օրեր առաջ Արթուր Վանեցյանը ասաց, որ գործը կհասնի դատարան, եւ ամեն ինչ բոլորին հայտնի կդառնա, Արթուր Աղաջանյանը նշեց, որ պարոն Վանեցյանը հանդիսանում Է ԱԱԾ ղեկավար, եւ համաձայն օրենքի` գործով պարզված փաստական հանգամանքների ստուգման, նոր փաստական տվյալների ձեռքբերման նպատակով օպերատիվ հետախուզական միջոցառումների իրականացումը համակարգվում եւ վերահսկվում է վարույթ իրականացվող մարմնի ղեկավարի կողմից` ի դեմս Արթուր Վանեցյանի. «Որպես ղեկավար` նա պարտավոր է տեղեկացված լինել այդ միջոցառումների բնույթից եւ ընթացքից, եւ հայտարարելով, որ գործը կգնա դատարան եւ ամեն ինչ կպարզվի` նա ներկայացրել է այն պարզ իրավական մոտեցումը, ըստ որի` հարուցված է քրեական գործ, որի շրջանակում մեղադրանքներ են առաջադրվել չորս անձի, կիրառվել են խափանման միջոցներ, եւ որպես կանոն` ենթադրվում է, որ գործը պետք է ունենա դատական վախճան, եւ դա չի նշանակում, թե Վանեցյանը կանխորոշել է գործի ընթացքը»:

Քննչական դեպարտամենտի պետը տարօրինակ որակեց հայտարարությունները, թե ԱԱԾ-ում գործ է կարվում. «Եվ տարօրինակ է, որ այդ հայտարարությունները անում է ոչ միայն Սանասարյանը, այլ նաեւ նրա շահերի պաշտպանը, մասնավորապես` տիկին Պետրոսյանը, ով մշտապես դրական կարծիք է ունեցել ԱԱԾ-ի եւ քննչական դեպարտամենտի քննիչների գործելաոճի, մարդկային որակների եւ օբյեկտիվության վերաբերյալ»:

Արթուր Աղաջանյանը պնդեց` թավշյա հեղափոխության հաջողության պսակվելուց հետո ԱԱԾ-ն ապացուցել է,  որ հանդիսանում է կոռուպցիայի դեմ պայքարի առաջամարտիկ, եւ որեւէ կասկած չկա, որ իրենց համար որեւէ նշանակություն չունի անձի ով լինելը, որովհետեւ բոլորը օրենքի առաջ հավասար են. «Գործ կարելը նշանակում է, որ ապացույցները կեղծվում են, ինչը ծանր հանցագործություն է, եթե այդպես է, ապա նրանք կարող են համապատասխան հաղորդմամբ դիմել ՀՀ գլխավոր դատախազին կամ ՀՔԾ պետին` ասելով, որ ԱԱԾ-ում քննիչները ծանր հանցագործություն են իրականացնում, սակայն նման դեպքերում նրանք զգուշացվելու են սուտ մատնության համար նախատեսված պատժի մասին, դրա համար էլ այդ քայլին չեն դիմում»,-կարծում է Աղաջանյանը:

Նա նշեց, որ այն օրը, երբ համապատասխան քննչական գործողություններով ապացույցներ են ձեռք բերվել եւ առկա է եղել այն համակցությունը, որը հիմք է տվել վարույթ իրականացնող մարմնին մեղադրանք առաջադրել, դա կատարվել է օրենքի պահանջին համապատասխան. «Այդ օրը միջնորդություն  է հարուցվել, որ հարցաքննվեն չորս վկաներ, որոնք, հանդիսանալով ՊՎԾ աշխատակիցներ, մեր տվյալներով, բավականին մտերիմ հարաբերություններ ունեն Սանասարյանի հետ, եւ պարզ է, որ այդ պահին գտնվում էին ՊՎԾ պետից անմիջական կախվածության մեջ»: Արթուր Աղաջանյանի խոսքով` որպեսզի նախաքննական մարմինը օբյեկտիվ գնահատի ապացույցները, Դավիթ Սանասարյանին մեղադրանք առաջադրեց եւ լիազորությունները դադարեցվեցին, որպեսզի այդ մարդիկ հարցաքննության ժամանակ  անմիջական ենթակայության կախվածության մեջ չլինեն նրա դեմ ցուցմունք տալուց, ինչը, Աղաջանյանի կարծիքով, հեշտ բան չէ:

Հարցին, թե ինչու է գործը քննվում ԱԱԾ-ում, Քննչական դեպարտամենտի պետը պատասխանեց. «Բոլոր իրավապահ մարմինները, եւ հատկապես ԱԱԾ-ն, կոչված են կոռուպցիայի դեմ պայքար մղելու»: Աղաջանյանի խոսքով` ինքը խնդրին նայում է իրավական դաշտում. «Մեզ համար այն սովորական, շարքային կոռուպցիոն գործ է, որը քննվում է օրենքով սահմանված կարգով»:

Աղբյուր` Փաստինֆո