Փաստ ինֆո

Փաստացի Փաշինյանի թիմի ներկայացուցիչը մեղադրում է իշխանությանը «գործ կարելու», այսինքն նախորդ իշխանությունների արատավոր պրակտիկան շարունակելու մեջ: Այսօր «Փաստինֆո»›-ի թղթակցի հետ զրույցում նշեց քաղաքագետ Դերենիկ Մալխասյանը:

«Պետական վերահսկողական ծառայության պետ Դավիթ Սանասարյանն ասում է՝ իր վրա ‹‹գործ են կարում››, դա իրենից ենթադրում է, որ խախտումներով է այդ ամենը տեղի ունենում, իսկ Փաշինյանի հեղափոխության «բրենդը» նոր Հայաստանում իրավունքի, արդարության գերակայությունն է››,-ասաց Մալխասյանը:

Նա նշեց, որ Ազգային անվտանգության ծառայությունը ուղղակիորեն ենթարկվում է Նիկոլ Փաշինյանին, և հենց Փաշինյանն է անմիջական պատասխանատվություն կրում ԱԱԾ-ի համար:

Քաղաքագետի խոսքով, եթե մեղադրվում է ԱԱԾ-ն, ապա կարելի է ենթադրել, որ կամ Փաշինյանի գիտությամբ է այդ ամենը տեղի ունեցել, կամ, որ ավելի վատ է, Փաշինյանը չի տիրապետում իրավիճակին ԱԱԾ-ում, և ԱԱԾ-ն առանց Փաշինյանի գիտության ‹‹գործ է կարում›› Դավիթ Սանասարյանի վրա:

Մալխասյանը կարծում է՝ հազիվ թե Դավիթ Սանասարյանը շարունակի պաշտոնավարել ՊՎԾ պետի կարգավիճակում: Նրա խոսքով, իրավիճակը տանում է նրան, որ Սանասարյանը կարող է լքել իր պաշտոնն ու դառնալ իշխանության քննադատ:

‹‹Սանասարյանի վերջին ասուլիսից ես նման ազդակներ ստացա, քանի որ նա բավականին սուր քննադատեց  Փաշինյանին և նրան անմիջականորեն ենթարկվող ԱԱԾ-ին,  ապա գլխավոր դատախազությանը››,-ասաց քաղաքագետը:

‹‹Փաստինֆո››-ի թղթակիցը հետաքրքրվեց, թե արդյոք իր ասածից կարելի է ենթադրել, որ պաշտոնյաները իշխանությանը քննադատելու դեպքում  կարող են կորցնել իրենց աշխատանքը.

‹‹Ես նման ենթադրություն չէի անի: Ես չեմ կարող ասել՝ արդյոք քննադատության համար մարդկանց հեռացնում են իշխանության ներսից , քանի որ նման ակնառու դեպք չկա, նույնիսկ Դավիթ Սանասարյանի դեպքը չեմ կարող օրինակ բերել, քանի որ նա հեռացված չէ և չգիտենք՝ քրեական գործի շրջանակներում դատարանը ինչ որոշում կներկայացնի››,-ասաց քաղաքագետը:

Նա նշեց, որ եթե գործող չինովնիկը իշխանությանը քննադատում է, ապա առնվազն կոռեկտ չէ իր քննադատությունը, որովհետև չինովնիկ աշխատելով քննադատելը քաղաքական առումով ճիշտ չէ:

Ըստ քաղաքագետի, եթե որևէ  պաշտոնյա քննադատում է իշխանությանը՝ պետք է լքի իր պաշտոնը և ապա սկսի քննադատել իշխանություններին:

Անդրադառնալով ԱԱԾ-ի կողմից ՊՎԾ պետին առաջադրված մեղադրանքին, Մալխասյանն ասաց՝ կարևոր է, որ երկու կողմերն էլ ապացույցներ ներկայացնեն: Եվ եթե Սանասարյանը նշում է, որ իր դեմ ‹‹գործ են կարում›› պետք է հիմնավոր ապացույցներ նորկայացնի, իսկ եթե ԱԱԾ-ն է նշում, որ Սանասարյանը մեղադրվում է կոռուպցիայի մեջ՝այս դեպքում նույնպես պետք է ապացույցներ ներկայացվեն:

Նրա խոսքով, այս հանգամանքը Հայաստանի համար շատ կարևոր է, որովհետև զուգահեռ կա նաև մարտի 1-ի գործը, որտեղ ներգրավված են Քոչարյանը, Սերյան Օհանյանը, Խաչատուրովը և եթե Սանասարյանը հայտարարում է, որ իր դեմ ‹‹գործ են կարում›› , ապա ինչ երաշխիք կա որ Մարտի 1-ի գործով չեն կարում:

Մալխասյանի կարծիքով՝  այսօրինակ հայտարարություններով ՊՎԾ պետը ‹‹խփում է›› Փաշինյանի վարկանիշին:

‹‹Փաստինֆո››-ի այն հարցին, թե ինչով է պայմանավորված այն հանգամանքը, որ ՊՎԾ պետը իր կառույցին մեղադրանք առաջադրվելուց հետո վերաբերմունքը փոխեց իրավապահ մարմինների նկատմամբ և սկսեց չվստահել նրանց, քաղաքագետը պատասխանեց.

‹‹Երբ հայտարարվեց, որ ‹‹վատ›› իշխանությունը գնացել է և եկել է ‹‹լավ›› իշխանությւոնը, որի օրոք իրավապահ համակարգը չի աշխատելու նախորդ իշխանությունների արատավոր պրակտիկայով, Սանասարյանը չհայտարարեց, որ անհրաժեշտ է ԱԱԾ-ի, ոստիկանության, դատախազության հետ կապված արմատապես փոփոխություններ անել, և հիմա այդ արատավոր պրակտիկան հասավ իրենց››:

Մալխասյանի խոսքով, իշխանության ներսից ոստիկանությունն ու ԱԱԾ-ն Ազգային Ժողովի համար հաշվետու դարձնելու պահանջ չի ձևակերպվել, և բոլորը լսել են այն, ինչ Փաշինյանն է ասել, իսկ հիմա ստեղծվել է  մի իրավիճակ,երբ ուղտը չոքել է նաև Սանասրյանի դռանը:

Անդրադառնալով այն հարցին, եթե վարչապետը ընտրության առաջ կանգնի, ապա ով պաշտոնից կհեռանա՝ ԱԱԾ տնօրենը՞, թե՞ ՊՎԾ պետը՝ քաղաքագետն ասաց՝ ԱԱԾ պետ Արթուր Վանեցյանը ներկայիս իրավիճակում չի լքի պաշտոնը։  

‹‹Ներկայիս տրամադրություններից դատելով, և թե ինչպես է Սանասարյանը քաղաքական հարթության մեջ սրացնում կոնֆլիկտը Իոաննիսյանի հետ և անուղղակիորեն քննադատում Փաշինյանին, կարող եմ ասել՝ Սանասարյանի պաշտոնը լքելու հավանականությունն ավելի մեծ է››,-ասաց Մալխասյանը:

Հեղինակ` Սոնա Գեւորգյան