Փաստ ինֆո

Վերաքննիչ քրեական դատարանում` դատավոր Լուսինե Աբգարյանի նախագահությամբ, քիչ առաջ ավարտվեց ԱԺ նախկին պատգամավոր Մանվել Գրիգորյանի խափանման միջոց կալանավորումը ևս երկու ամսով երկարացնելու որոշման դեմ պաշտպանական խմբի կողմից ներկայացված բողոքի քննությունը:

Գրիգորյանի պաշտպան Արսեն Մկրտչյանը հայտնեց, որ որոշումը կհրապարակվի ապրիլի 10-ին. «Իմ այն խոսքերը, որ մնալով ազատության մեջ` Գրիգորյանը չի խոչընդոտի քննությանը, մի անգամ արդեն ապացուցվել է, ՀՔԾ-ի ենթադրությունը, թե հակառակ դեպքում կխոչընդոտի, մնում է զուտ ենթադրություն»:

Մեր այն հարցին, թե ինչպես անցավ նիստը և ինչ ակնկալիք ունեն արդյունքներից, Մկրտչյանը նշեց. «Դատավարական տեսանկյունից նիստերը, հատկապես Վերաքննիչում, անցնում են նորմալ, և բոլոր այն դեպքերում, երբ որոշումից մարդու ճակատագիր է կախված, ես լավատես եմ»:

Պաշտպանի խոսքով` Գրիգորյանը գտնվում է քաղաքացիական հիվանդանոցում և ստանում է համապատասխան բուժում. «Եվս մեկ անգամ շեշտեմ, որ կալանավորվելու պահին Գրիգորյանն չի ունեցել ինսուլինակախվածություն, իսկ ներկայումս շաքարի թիվը 4-5 անգամ ավելացել է. այժմ ստանում է 110 միավոր ինսուլին»:

Հիշեցնենք, որ դեկտեմբերի 21-ին Մ. Գրիգորյանը 25 միլիոն գրավի դիմաց ազատ էր արձակվել «Երևան կենտրոն» քրեակատարողական հիմնարկից, ինչի դեմ Դատախազությունը վերաքննիչ ատյան ներկայացրել էր միջնորդություն, որը բավարարվել էր: Պաշտպանական կողմն էլ իր հերթին մարտի 19-ին բողոքարկել էր Գրիգորյանի խափանման միջոց կալանավորումը ևս երկու ամսով երկարացնելու որոշումը: Ապրիլի 4-ին հրավիրված բողոքի քննության նիստը հետաձգվել էր քննիչի` զբաղվածության պատճառով չներկայանալու, ինչպես նաև` դատախազի միջնորդության հիմքերով. «Դատախազը նոր էր ներգրավվում, և այս պարագայում, որպեսզի ավելորդ խոչընդոտներ չստեղծվեն, մենք հետաձգումը չառարկեցինք»,-նշել էր Արսեն Մկրտչյանը:

Հեղինակ` Միլենա Խաչիկյան