Փաստ ինֆո

Վերաքննիչ քրեական դատարանում մեկնարկելուց րոպեներ անց հետաձգվեց ԱԺ նախկին պատգամավոր Մանվել Գրիգորյանի խափանման միջոց կալանավորումը ևս երկու ամսով երկարացնելու որոշման դեմ պաշտպանական խմբի կողմից ներկայացված բողոքի քննությունը:

Գրիգորյանի պաշտպան Արսեն Մկրտչյանը հայտնեց, որ նիստը հետաձգվեց քննիչի` զբաղվածության պատճառով չներկայանալու, ինչպես նաև` դատախազի միջնորդության հիմքերով. «Դատախազը նոր էր ներգրավվում, և այս պարագայում, որպեսզի ավելորդ խոչընդոտներ չստեղծվեն, մենք հետաձգումը չառարկեցինք»:

Լրագրողների հետ զրույցում Արսեն Մկրտչյանն ասաց, որ իրենք կալանքի երկարաձգումը անհիմն են համարում. «Գործին ծանոթանալուց հետո ավելի պարզ դարձավ, որ զինվորի սննդի յուրացման հարց չկա. ոչ այդպիսի ցուցմունքներ կան, ոչ ապացույցներ: ԱԱԾ-ն փայլուն կատարել է իր գործը և հայտնաբերել իրեր, որոնք կարող են առնչություն ունենալ քրեական հանցագործության հետ: Այդ աշխատանքները իրականացվել են պատշաճ կերպով, սակայն դրանց հետագա մեկնաբանությունները, ըստ պաշտպանական կողմի, դատարանի գնահատականի կարիքն ունեն»:

Մկրտչյանի խոսքով` հայտնաբերված իրերը այնտեղ կարող էին տեղադրված լինել միտումնավոր կամ բերված լինել երրորդ անձի կողմից. «Նախաքննական մարմինը պետք է շահագրգռված լիներ` պարզելու, թե ինչպես են այնտեղ հայտնվել, ում կողմից, բայց ինչպես տեսնում ենք, շահագրգռվածություն չկա»:

Պատասխանելով հարցին, թե կա՞ն արդյոք ենթադրյալ անձինք, ովքեր կարող էին դա անել, Մկրտչյանն ասաց, որ Մանվել Գրիգորյանը կունենար և թշնամիներ, և չուզող անձինք, սակայն հասցեական որևէ մեկին նշել չի կարող. «Գուցե և Գրիգորյանն իր մեջ ինչ-որ մեկին կասկածում է, համենայն դեպս ինձ չի հայտնել այդ մասին»:

Պաշտպանը նշեց նաև, որ գործի նյութերին ծանոթանալուց հետո նախաքննական մարմին միջնորդություններ ներկայացրել են, սակայն դրական պատասխան չեն ստացել: Պաշտպանը չցանկացավ նշել, թե ինչ բովանդակություն ունեին միջնորդությունները, քանի որ պաշտպանական խմբի մյուս փաստաբանների համաձայնությունը չուներ:

Արսեն Մկրտչյանը հիշեցրեց նաև, որ Մանվել Գրիգորյանի` գործին առնչություն ունենալու վերաբերյալ կասկած ունենալու դեպքում ինքն անձամբ կհրաժարվի նրա պաշտպանությունից:

Հիշեցնենք՝ դեկտեմբերի 21-ին Մ. Գրիգորյանը 25 միլիոն գրավի դիմաց ազատ էր արձակվել «Երևան կենտրոն» քրեակատարողական հիմնարկից, ինչի դեմ
Դատախազությունը վերաքննիչ ատյան ներկայացրել էր միջնորդություն, որը բավարարվել էր: Պաշտպանական կողմն էլ իր հերթին մարտի 19-ին բողոքարկել էր Գրիգորյանի խափանման միջոց կալանավորումը ևս երկու ամսով երկարացնելու որոշումը:

Ավելի ուշ` մարտի 25-ին, Մանվել Գրիգորյանը կալանավայրից տեղափոխվել էր հիվանդանոց:

Արսեն Մկրտչյանի խոսքով` Գրիգորյանը բժիշկների հսկողության տակ է, և նրա առողջական վիճակում դրական միտում է նկատվում:

Հեղինակ` Միլենա Խաչիկյան