Փաստ ինֆո

Մամուլում կատարված հրապարակումները իմ եւ ընտանիքիս անդամների նկատմամբ կատարված ճնշումների վերաբերյալ իրավապահ մարմինները կարող են ընդունել որպես հաղորդում հանցագործության մասին։ «Փաստինֆո»-ի թղթակցին ասել է «Politik.am» կայքի գլխավոր խմբագիր Բորիս Մուրազին, ով այսօր հայտարարել էր Ոստիկանապետ Օսիպյանի կողմից իրեն եւ ընտանիքի անդամներին սպառնալու մասին։

«Ոստիկանության լրատվական վարչության պետ Աշոտ Ահարոնյանը առաջարկեց ինձ դիմել Ոստիկանության 6-րդ վարչություն, սակայն հրաժարվեցի, քանզի հենց իրենց եմ կասկածում այս ամենը կազմակերպելու մեջ»,- ասաց գլխավոր խմբագիրը՝ նշելով, որ մամուլում արված հրապարակումներն արդեն իսկ հաղորդում են հանցագործության մասին։

Նրա ներկայացմամբ՝ սպառնալիքներն սկսել են ՀՀ ոստիկանապետ Վալերիյ Օսիպյանի մասին հրապարակումներից հետո՝ ոստիկանության «ֆեյքերի» կողմից։

Մեր այն հարցին, թե ինչից է ենթադրում, որ իր եւ իր ընտանիքի նկատմամբ սպառնալիքների հեղինակները ոստիկանությանն սպասարկող ֆեյսբուքյան կեղծ էջերն են՝ Բ.Մուրազին նշեց,որ տվյալ էջերով տարածվել են ոստիկանապետի մասին  դրական նյութերը, ինչի վերաբերյալ ապացույցներ ունի։ «Քանի որ այդ ֆեյքերն իրենց էջերում տարածում են Ոստիկանության լրատվությունը, ինձ համար իրենք ոստիկանության աշխատողներ են, և քանի որ հրապարակումը եղել է հենց Վ. Օսիպյանի մասին, ու հենց այդ նյութի տակ են այս գրառումներն արվել, ես համարում եմ, որ դա կոնկրետ սպառնալիք է ոստիկանապետի կողմից»,- նշեց politik.am կայքի գլխավոր խմբագիրը՝ ավելացնելով, որ ոստիկանության «ֆեյքերը» ոչ միայն հայհոյախառն արտահայտություններ են թույլ տալիս, այլ նաեւ տեղադրում իր կնոջ ու երեխայի նկարը և գրում, որ ինքը պետք է ուշադիր լինի իր ընտանիքի նկատմամբ, ավելի շատ ժամանակ անցկացնի իր ընտանիքի հետ, որովհետև շուտով դատվելու է։

Բորիս Մուրազին հայտարարեց, որ նախինում երբեւէ սպառնալիքների նման գրոհ չի եղել։ Ըստ նրա՝ իր հասցեին եղել են վիրավորական արտահայտություններ՝ կայքում հրապարակված հրապարակումների, իր մասնագիտական գործունեության հետ կապված, բայց երբեւէ ընտանիքին չեն ներքաշել։ «Նման բան չի եղել անգամ նախկին իշխանությունների ժամանակ»,- ասաց կայքի գլխավոր խմբագիրը՝ ավելացնելով «ընտանիքին ներքաշելն անբարոյականություն է, ինձ համար մարդկային սահմանները ջնջել է և լավ տեղ չի տանում։ Ես ինքս չեմ պատրաստվում պրովակացիաների գնալ և պարոն Օսիպյանի ընտանիքին վարկաբեկող կամ սպառնացող հայտարարություններ անել։ Եթե որևէ մեկը անգամ փորձի Օսիպյանի ընտանիքի մասին նույն կերպ արտահայտվել, ես ինքս էլ դրան դեմ կլինեմ»։

Կատարվածը նա գնահատում է որպես ճնշում մամուլի նկատմամբ, սպառնալիք անձամբ ոստիկանապետի կողմից։ Նրա ներկայացմամբ՝ օրեր առաջ ոստիկանապետ Վալերիյ Օսիպյանն իրեն թույլ է տվել կեսգիշերին անձամբ, viber կապով զանգահարել իրեն , դժգոհել, թե «ինչ իրավունք ունեմ իր մասին բացասական հրապարակումներ անեմ, իր գնահատմամբ ապատեղեկատվություն տարածեմ, ինչի եմ այդպես անում, ով է ինձ վճարում, ինչի եմ իր թշնամիների ջրաղացին ջուր լցնում»։ Նշենք, որ հեռախոսազանգը հաջորդել է ՀՀ երրորդ նախագահ եղբոր՝ Ալեքսանդր Սարգսյանի որդու՝ Նարեկ Սարգսյանին առնչվող հրապարակման մասին է։

«Ես նրան ասել եմ, Դուք՝ որպես ոստիկանապետ, առաջին հերթին իրավունք չունեք ինձ զանգելու, երկրորդ՝ իրավունք չունեք կեսգիշերին զանգելու, Դուք ինձ անհանգստացնում եք»,- ասաց Բորիս Մուրազին՝ նշելով, որ փորձել են տարբեր միջոցներով ազդել իր վրա տվյալ հրապարակումը հեռացնելու համար։

«Փաստինֆո»-ն դիմել է նաեւ ՀՀ գլխավոր դատախազություն՝ պարզելու, թե արդյոք իրեն եւ ընտանիքի անդամներին ոստիկանության աշխատակիցների կողմից սպառնալու վերաբերյալ գլխավոր խմբագրի հայտարարություններին,քրեական դատավարության օրենսգրքով սահմանված կարգով, ընթացք տրվել է, ինչին խոստացան ատասխանել ավելի ուշ։

Հեղինակ` Գեւորգ Մողրովյան