Փաստ ինֆո

Կոպենհագենի դատարանը շվեդացի լրագրողուհի Կիմ Վալլի սպանության մեջ մեղադրվող դանիացի գյուտարար Պետեր Մադսենին ցմահ ազատազրկման է դատապարտել: Այդ մասին հաղորդել է դատարանի նախագահ Անետ Բյուրկյոն՝ նրա կողմից դատավճռի հրապարակումը հեռարձակվել է դանիական ու շվեդական ԶԼՄ-ների կողմից:

Դատավճռի հրապարակումից հետո դատավորը ներկայացրել է ընդունված որոշման առավել մանրամասն հիմնավորումը: Ըստ նրա, դատարանը հանցագործությունը «ցինիկ» է համարում, իսկ լրագրողուհու վրա սեքսուալ հարձակումն ու նրա սպանությունը ծրագրված ու շատ դաժան է եղել:

«Ամենախիստ պատիժն է, որը կարելի է ստանալ»,- հաղորդել է Դանիայի ռադիոն (DR): Դատապարտվածը, ըստ ռադիոյի հաղորդավարի, դատավճիռը լսել է գլխիկոր:

Դատախազությունը պնդում էր Մադսենին ցմահ դատապարտելու միջնորդությունը, իսկ մեղադրյալի պաշտպան Բետինա Հալդ Էնգմարկը համարում էր, որ մեղադրանքի կողմին չի հաջողվել ապացուցել իր հաճախորդի մեղքը:

Կիմ Վալլն անհետացել էր Մադսենի կողմից կառուցված Nautilus ստորջրյա նավով նավարկության ժամանակ, այն ծով էր դուրս եկել 2017թ. օգոստոսի 10-ին: Հաջորդ օրվա վաղ առավոտյան նավը սկսել էին որոնել այն բանից հետո, երբ կնոջ տուն չվերադառնալու մասին հայտնել էր նրա ընկերը: Մի քանի ժամվա որոնումներից հետո օրվա առաջին կեսին փրկարարները հաղորդել էին, որ ստորջրյա նավը, վերջապես, գտել են: Պարզվել էր, որ նավը խորտակվել էր Կոպենհագենի մոտ, իսկ Մադսենին փրկել էր մոտակայքում գտնվող զբոսանավի անձնակազմը: Վալլի մարմինը նավում չէին գտել, սակայն հայտնաբերել էին նրա արյան հետքերը:

Սկզբից գյուտարարը պնդում էր, որ լրագրողուհուն ափ է իջեցրել նույն օրը երեկոյան, ավելի ուշ նա փոխել էր իր ցուցմունքներն՝ ասելով, որ լրագրողուհին զոհվել է նավում դժբախտ պատահարի հետևանքով: Իբրև թե կնոջ գլխին է ընկել ծանր լյուկը՝ 70 կգ քաշով: Կնոջ մարմինը գտել էին մի քանի օրվա որոնումներից հետո, այն անդամատված էր եղել՝ առանց գլխի ու ծայրանդամների: Հոկտեմբերին գտել էին զոհի ոտքերն ու գլուխը, իսկ նոյեմբերին՝ ձեռքերը:

Գյուտարարին շվեդացի լրագրողուհու սպանության մեջ պաշտոնապես մեղադրել են այս տարվա հունվարին: Քննությունը համարում է, որ նա խեղդել է զոհին կամ կտրել կոկորդը: Ինքը՝ Մադսենը, խոստովանում է, որ անդամատել է լրագրողուհու մարմինը, սակայն ինչու է նա դա արել, դատարանին պարզել այդպես էլ չի հաջողվել:

Գյուտարարը նաև չի կարողացել պարզաբանել, թե ինչու են զոհվածի սեռական օրգաններին հայտնաբերվել սուր գործիքով ծակոցների հետքեր: Դատարանում հայտնի է դարձել, որ Մադսենի ԴՆԹ հետքեր չեն հայտնաբերվել Վալլի մարմնի վրա, ինչպես նաև՝ գյուտարարի մարմնի վրա Վալլի ԴՆԹ հետքերը:

Դատահոգեբուժական հետազոտությունը մեղադրյալի փսիխիկայի լուրջ շեղումներ չէր հայտնաբերել, սակայն արձանագրել էր, որ Մադսենի մոտ դիտվում են որոշակի սեքսուալ շեղումներ՝ նարցիսիզմի հատկանիշներով ու փսիխոպատիկ գծերով:

Դատարանում լսումներն այդպես էլ չեն պատասխանել հարցին, թե հատկապես ինչն է դարձել Վալլի մահվան պատճառը: Դա պարզելու դժվարությունները բացատրվում է նրանով, որ մարմնի մասերը չափազանց երկար ժամանակ են եղել ջրի մեջ:

Աղբյուր` Փաստինֆո