Փաստ ինֆո

Հայաստանի խորհրդարանն առաջին ընթերցմամբ ընդունելու համար սկսել է քննարկել Հարկային օրենսգրքում փոփոխություններ և լրացումներ կատարելու մասին օրենքի նախագիծը և հարակից նախագծերի փաթեթը:

Հիմնական զեկուցող, ՀՀ ֆինանսների նախարարի տեղակալ Դավիթ Անանյանը նշեց, որով առաջարկվում է փոփոխություններ օրենսգրքի շուրջ 109 հոդվածներում:

«Այդ փոփոխությունները կարելի է բաժանել երեք խմբի: Առաջարկվում են շուրջ 180 խմբագրական բնույթի փոփոխություններ, 29 տերմինաբանական փոփոխություններ, 30 բովանդակային փոփոխություններ»,- «Արմենպրես»-ի հաղորդմամբ՝ նշեց փոխնախարարը:

Նա վստահեցրեց, որ փաթեթով առաջարկվող փոփոխություններն ավելի լավ վիճակ են ստեղծելու հունվարի 1-ից Հարկային օրենսգիրքը կիրառելու տեսանկյունից: Նա ներկայացրեց առաջարկվող բովանդակային փոփոխությունները:

Առաջինը շահաբաժինների հարկմանն առնչվող օրենսդրական փոփոխություններն են:

«Դուք գիտեք, որ 2018 թ. հունվարի 1-ից բաժնետեր հանդիսացող Հայաստանի Հանրապետության քաղաքացիների բաժնեմասնակցության դիմաց ստացվող շահաբաժիններն այսուհետև հարկվելու են եկամտային հարկով: Խոսքը տվյալ դեպքում վերաբերում է ֆիզիկական անձանց: Հարկային օրենսգրքի ներկա շարադրմամբ հստակ չէ, թե որ ժամանակաշրջաններին վերաբերող շահաբաժիններն են ենթակա հարկման: Մենք առաջարկում ենք հստակեցնել նորմը, որ ենթակա են հարկման այն շահաբաժինները, որոնք ստացվել են 2018 թ. գործունեության արդյունքում և դրանից հետո»,- մանրամասնեց փոխնախարարը՝ հստակեցնելով, որ նույն փոփոխությունը վերաբերում է նաև բաժնետեր հանդիսացող օտարերկրյա ֆիզիկական անձանց, որոնց համար եկամտային հարկով շահաբաժինների հարկման գործընթացը սկսվել է 2017թ. հունվարի 1-ից:

Առաջարկվում է հստակեցնել, որ ենթակա են հարկման բաժնետեր հանդիսացող օտարերկրյա ֆիզիկական անձանց այն շահաբաժինները, որոնք առաջացել են 2017 թ. գործունեության ընթացքում կամ դրանից հետո:

Նվազագույն շահութահարկի մասով առաջարկվում է վերացնել նվազագույն շահութահարկի գերավճարների «զրոյացման» իրավական նորմը` թույլ տալով նվազագույն շահութահարկը նվազեցնել շահութահարկի փաստացի գումարի եւ այդ տարվա շահութահարկի կանխավճարի դրական տարբերություն առաջանալու դեպքում` առանց ժամկետային սահմանափակման:

Եկամտային հարկի հաշվին հիփոթեկային վարկի տոկոսների փոխհատուցման մասով առաջարկվում է սահմանել որոշակի սահմանափակումներ: Մասնավորապես, 2018 թվականի հունվարի 1-ից հետո ստացված եւ կառուցապատողից, պետությունից կամ համայնքից փաստացի բնակարան ձեռք բերելուն կամ կառուցապատողից անհատական բնակելի տուն ձեռք բերելուն ուղղված հիփոթեկային վարկի սպասարկման համար վարձու աշխատող հանդիսացող ֆիզիկական անձի կողմից վճարված տոկոսների գումարների չափով փոխհատուցման ենթակա եկամտային հարկը վարձու աշխատող հանդիսացող ֆիզիկական անձանց չի փոխհատուցվում, եթե բնակարանի կամ անհատական բնակելի տան ձեռք բերման պայմանագրային արժեքը գերազանցում է 55 միլիոն դրամը:

«2018 թվականի հունվարի 1-ից հետո ստացված և կառուցապատողից, պետությունից կամ համայնքից փաստացի բնակարան ձեռք բերելուն կամ անհատական բնակելի տան կառուցմանը, կամ անհատական բնակելի տան ձեռք բերելուն փաստացի ուղղված հիփոթեկային վարկի սպասարկման համար վճարվող տոկոսների գումարների չափով վարկառուին և համավարկառուներին փոխհատուցման ենթակա եկամտային հարկի գումարը յուրաքանչյուր եռամսյակի համար յուրաքանչյուր ձեռք բերված բնակարանի կամ կառուցված անհատական բնակելի տան կամ ձեռք բերված անհատական բնակելի տան մասով չի կարող գերազանցել 1,5 մլն դրամը»,- ներկայացրեց Անանյանը՝ հավելելով, որ 2018 թվականի հունվարի 1-ից հետո եկամտային հարկի վերադարձման հնարավորությունից ֆիզիկական անձինք կարող են օգտվել միայն մեկ անգամ, այդ թվում՝ որպես համավարկառու։

Փաթեթով առաջարկվում է նաև վերականգնել ներգնա զբոսաշրջության ոլորտի` ԱԱՀ-ից ազատման արտոնությունը: ԵԱՏՄ միասնական օրենսդրությամբ անմաքս առևտրի խանութների համար սահմանված արտոնությունների կիրառության շարունակականության մասով առաջարկվում է ԵԱՏՄ միասնական օրենսդրությամբ անմաքս առևտրի խանութների համար ներկայումս սահմանված արտոնությունները ամրագրել նաև ազգային օրենսդրությամբ` հաշվի առնելով այն, որ առաջիկայում ուժի մեջ մտնող ԵԱՏՄ նոր մաքսային օրենսգրքով այդ արտոնություններն այլևս նախատեսված չեն:

Մասնավորապես, նախագծով առաջարկվում է կարգավորել անմաքս առեւտրի խանութների գործունեության հետ կապված ընթացակարգային հարցերը, ինչպես նաև սահմանել, որ անմաքս առևտրի խանութներ ապրանքների ներմուծումը (այդ թվում` ԵԱՏՄ անդամ համարվող կամ չհամարվող երկրներից) ազատվում է ավելացված արժեքի հարկից և ակցիզային հարկից, անմաքս առևտրի խանութներ ներմուծվող ապրանքները ենթակա չեն դրոշմավորման` հաշվի առնելով այն, որ այդ ապրանքներն արդեն իսկ հաշվառվում են եւ գտնվում են հսկողության ներքո:

Աղբյուր` Փաստինֆո