Փաստ ինֆո

«Սասնա Ծռեր»-1-ի գործով այսօրվա դատական նիստում դատարանը մերժեց Արայիկ Խանդոյանի պաշտպան Արա Ղարագյոզյանի միջնորդությունը՝ դատախազին բացարկ հայտնելու մասին: Ըստ պաշտպանի, դատախազը հայհոյանքներ է ուղղել իր պաշտպանյալին, անձնական թշնամանք ունի նրա նկատմամբ, ուստի՝ չի կարող օբյեկտիվ ու անկողմնակալ լինել:

Պաշտպան Լուսինե Սահակյանն որպես դատախազին բացարկի հիմք նշեց, որ նախաքննական մարմնի կողմից չեն կիրառվել օրենքի խրախուսական նորմերը, որոնց ուժով ամբաստանյալների մի մասը պետք է ազատ արձակվեր:

Մեղադրողը առարկեց միջնորդության դեմ՝ նշելով, որ դատախազի կողմից հայհոյանքներ հնչեցնելու դեպքը բացակայում է, և դա երևում է նույն օրը Վերաքննիչ դատարանի կայացրած որոշումից: Ըստ մեղադրողի, խրախուսական նորմը չկիրառելը կատարվել է օրենքին համապատասխան:

Դատարանը, անհիմն լինելու պատճառաբանությամբ մերժելով միջնորդությունը, նշեց, որ փաստաբանի կողմից չի ներկայացվել դատախազի աչառու կամ ոչ օբյեկտիվ լինելու մասին որևէ վերաբերելի ապացույց, ՀՀ քրեական դատավարության օրենսգրքի 90-րդ և 91-րդ հոդվածներով նախատեսված որևէ հիմք: Դատարանը միաժամանակ նշեց, որ Արայիկ Խանդոյանի պաշտպանի միջնորդության մեջ հիշատակվում է դատախազի ենթադրյալ վարքագծի վերաբերյալ հարց, ինչը դուրս է դատարանի լիազորություններից:

Դատարանում նորից բարձրացվեց տուժող կողմի բացակայության հարցը՝ նրանց մի մասի ծանուցված լինելու մասին դատարանը տեղեկություն չուներ: Պաշտպանական կողմը գտնում էր, որ նման պայմաններում չի կարելի տուժող կողմի բացակայությամբ նիստը շարունակել, քննել միջնորդություններ ու լուծում տալ դրանց՝ գուցե կողմը ցանկություն ունենար կարծիք հայտնել այսօր քննված ու մերժված՝ դատարանին ինքնաբացարկի ու դատախազին բացարկի միջնորդությունների մասին:

Դատարանը համաձայն չէր տուժող կողմի, ինչպես նաև իր թույլտվությամբ պաշտպաններ Հայկ Ալումյանի ու Ինեսսա Պետրոսյանի բացակայության պատճառով դատական նիստը հետաձգելու անհրաժեշտության հետ:

Մինչ հիշյալ պաշտպանների դատական նիստից հեռանալը դատարանը նշեց, որ պաշտպանների բացակայությամբ այլ ամբաստանյալներին առնչվող միջնորդությունների քննարկումը ուղղակիորեն չի կարող ոտնահարել առանց պաշտպան մնացած ամբաստանյալներ Սմբատ Բարսեղյանի ու Մխիթար Ավետիսյանի շահերը:

Դատարանում տեղ գտած իրավական բանավեճի ընթացքում պարզվեց, որ Հայկ Ալումյանը դատարանին ներկայացնելու միջնորդություններ ունի՝ գործից անջատված մասերը մեկ վարույթում միավորելու, ինչպես նաև դատական նիստերն ցանկացած այլ տեղ տեղափոխելու մասին: Հայկ Ալումյանը պարզաբանեց, որ տվյալ դահլիճում և մոտակայքում՝ դատարանի տարածքում, դատավորի գիտությամբ ու բոլորի աչքի առաջ ամբաստանյալները բռնությունների են ենթարկվել: «Սա խոշտանգման վայր է դարձել, արտառոց երևույթ է նույնիսկ Հայաստանի համար»,- ասաց Հայկ Ալումյանը: Պաշտպաններից Հրանտ Գևորգյանն էլ միջնորդություն ուներ իր պաշտպանյալ Պավել Մանուկյանի գործը Ժիրայր Սեֆիլյանի գործի հետ միավորելու մասին, կային նաև խափանման միջոցը փոխելու հետ կապված միջնորդություններ:

Պաշտպան Լուսինե Սահակյանը հայտարարեց, որ ինքն էլ միջնորդություններ ունի, սակայն դրանք պաշտպանների բացակայությամբ չի ներկայացնի, այլապես ինքն էլ կօժանդակի դատարանի կողմից թույլ տրվելիք անօրինականությանը: Դա Քրեական դատավարության օրենսգրքի խախտում է, և ես չեմ պատրաստվում այն խախտել, իրենց ընկերոջ իրավունքի խախտման հաշվին չի կարող ամբաստանյալների իրավունքի հնարավոր վերականգնում տեղի ունենալ, ասաց Լ.Սահակյանը:

Դատական նիստի հետաձգել-չհետաձգելու հարցի շուրջ քննարկման ժամանակ ամբաստանյալները նորից հայտարարեցին, որ իրենք հանցագործներ չեն, իրենք չեն կարող դատապարտվել ու պատժվել: «Մենք ապստամբել ենք իշխանության յուրացման ու հայրենիքի դավաճանության դեմ», իսկ իրենց նկատմամբ հաշվեհարդար է իրականացվում:

Դատական նիստը հետաձգվեց ոչ այն պատճառով, որ բացակայող պաշտպաններ կային, այլ այն պատճառով, որ ներկա պաշտպանները չեն ցանկանում այս պահին միջնորդությունները ներկայացնել: Բացի այդ, գուցե բացակայող պաշտպանները ևս ցանկանան միջնորդություններ հարուցել կամ միանալ հարուցված միջնորդություններին:

Դատարանը նորից պնդեց նախապատաստական փուլում շաբաթական երկու նիստ անցկացնելու իր դիրքորոշումը, դատաքննության փուլում կքննակվի շաբաթական մեկ անգամ նիստ անցկացնելու հնարավորությունը, դատական նիստը հետաձգվեց մինչև նոյեմբերի 13-ը:

Լուսանկարը՝ Armenpress-ի

Աղբյուր` Փաստինֆո