Փաստ ինֆո

EcoNews.am բնապահպանական տեղեկատվական կայքը տեղեկություն է հրապարակել՝ Կարմիր գրքում գրանցված սպիտակագլուխ անգղի որսի հերթական դեպքի մասին:

Ըստ աղբյուրի՝ կայքը շարունակում է ահազանգեր ստանալ մտահոգ քաղաքացիներից՝ տարբեր բնապահպանական խնդիրների առնչությամբ:

Համացանցում հայտնաբերվել է ապօրինի որսի հերթական դեպքը: Այս անգամ ևս խոսքը գնում է Կարմիր գրքում գրանցված սպիտակագլուխ անգղի որսի մասին: 

Հիշեցնենք, որ սպիտակագլուխ անգղը համարվում է վտանգված տեսակ: Գրանցված է նախկին ԽՍՀՄ և Ռուսաստանի Կարմիր գրքերում: Տեսակն ընդգրկված է ԲՊՄՄ Կարմիր ցուցակում (ver. 3.1) «Least Concern» կարգավիճակով:

ԲՊՄՄ Կարմիր ցուցակի չափորոշիչներով գնահատվում է որպես «Խոցելի»` VU D1: Այս տեսակն ընդգրկված է նաև Հայաստանի Կարմիր գրքում:  
Նշենք, որ սպանված անգղի նշված լուսանկարը համացանց է բեռնվել 2014թ.-ին, իսկ նկարագրության մեջ գրված է տեղանքի անունը՝ «Բախչալար»: Բախչալարը ներկայիս Բագարան համայնքի պատմական անվանումն է, որը գտնվում է Արմավիր մարզում, մարզկենտրոնից 39 կմ հարավ-արևմուտք, Ախուրյանի գետաբերանի մոտ: 

Ինչպես մեզ հետ զրույցում նշեց թռչնաբան Լյուբա Բալյանը, այդ տարածաշրջանում կան անգղերի գաղութներ: «Բագարան և Երվանդաշատ համայնքներում շատ են նման դեպքեր գրանցվում»,- ասաց նա:

Տվյալ անձը ևս որսի սիրահար է և ունի բազմաթիվ լուսանկարներ այդ մասին վկայող: Ի դեպ, սպանված անգղի հետ լուսանկարը հրապարակվել է մեկ այլ (ոչ լուսանկարում պատկերված) օգտատիրոջ էջում: 

Հիշեցնենք, որ որոշ ժամանակ առաջ նույն կայքը կրկին տեղեկություն էր հրապարակել սպիտակագլուխ անգղի որսի մասին, որը պարզվել էր 2013 թվականից առաջ էր կատարվել: Այս դեպքով հրապարակված լուսանկարում Շենավանի համայնքապետն էր և ևս երկու անձինք:

Շենավանի համայնքապետ Փաստինֆո-ի թղթակցի հետ զրույցում հայտնել էր, որ նկարները կատարվել են 2007 թվականին, իսկ համացանցում տեղադրվել է 6-7 տարի առաջ:

Սակայն փաստով քրեական գործի հարուցումը մերժվել էր՝ վաղեմության ժամկետն անցնելու հիմքով:

Աղբյուր` Փաստինֆո