Փաստ ինֆո

Առանց հոր փոքր տղամարդ դաստիարակելը հեշտ խնդիր չէ, ինչպե՞ս երեխայի համար և՛ մայր, և՛ հայր լինել և արդյունքում իսկական տղամարդ, այլ ոչ թե մամայի բալիկ մեծացնել:

segodnya.ua-ն առանձնացնում է մի քանի հիմնական կանոններ՝ իր փորձագետ-հոգեբանների օգնությամբ:

Կանոն թիվ մեկ՝ ապահովել տղամարդկանց ընկերակցություն:

Եթե տղան հայր չունի, նա ենթագիտակցաբար այլ տղամարդկանց մեջ է օրինակ փնտրելու նմանվելու համար: Դա կարող են լինել ինչպես նրա ազգականները, այնպես էլ օտար մարդիկ, օրինակ՝ մարզական սեկցիայի մարզիչը:

Եթե ձեր շրջապատում տղամարդիկ ընդհանրապես չկան, կարող եք ձեր որդու համար նմանվելու օրինակ փնտրել իրական կյանքից դուրս: Գրքից, մուլտֆիլմից կամ ֆիլմից խիզախ հերոսն, ասպետը, դյուցազնը, հրացանակիրը ցույց կտան, թե ինչպիսին է իսկական տղամարդը և տղամարդկային հետաքրքրություններին հաղորդակից կդարձնեն:

Կանոն թիվ երկու՝ ամեն ինչ կստացվի՛:

Վաղ մանկությունից սկսած որդուն սովորեցրեք ինքնուրույն լուծել սեփական խնդիրները: Մի ենթարկվեք փոքրիկի յուրաքանչյուր ֆրազին՝ չեմ կարող և այլն: Եթե անմիջապես վազեք օգնության, ալարկոտ մամայի բալիկ կմեծացնեք: Տղամարդը պետք է կարողանա պատասխանատվություն ստանձնել ու բարդ իրավիճակներից ելք գտնել: Միանգամից մի՛ վազեք օգնելու:

Կանոն թիվ երեք՝ թող օգնի տնտեսության մեջ:

Սակայն չարժե պարտադրել՝ ավելի լավ է հետաքրքրություն առաջացրեք: Օրինակ՝ տան մաքրությունը վերածեք արկածի: Ձեր բնակարանը տիեզերանավ է, որը պետք է ազատել աղբից: Որդու համար կարևոր է իմանալ, որ իր օգնությունն իսկապես անհրաժեշտ է իր մորը: Գլխավորը՝ տղան չպետք է կատարի բացառապես կանանց պարտականություններ: Լավ է, երբ նա կարող է մթերք գնել, արդուկել իրերը, լվանալ ամանեղենը և համեղ ընթրիք պատրաստել՝ սպասելով աշխատանքից վերադարձող մորը:

Բայց դրա հետ մեկտեղ որդու մեջ պետք է սերմանել զուտ տղամարդկային պարտականություններ, սակայն, բնականաբար, հոգալ այն մասին, թե որտեղ է պետք դրան սովորեցնել: Մի՛ մոռացեք, որ դուք դաստիարակում եք ապագա տիրոջը:

Կանոն թիվ չորս՝ սերմանեք տղամարդկային հետաքրքրություններ

Որքան էլ կարծրատիպային է հնչում, սակայն իսկական տղամարդը պետք է հետաքրքրվի համակարգչային խաղերով, տեխնիկայի նորույթներով, մեքենաների մոդելներով, զենքով և տղամարդկային կյանքի այլ ասպեկտներով:

Խաչով ասեղնագործությունը, բիսերով հյուսելն ու այլ աղջկական հոբբիներ թողեք դստերը:

Վաղ մանկությունից որդու համար գնեք թեմատիկ խաղալիքներ, գրքեր, ամսագրեր, հետո նրան համապատասխան խմբակների մասնակից դարձրեք: Ցանկալի է նրան անդամագրել տղամարդկային մարզական սեկցիային. կարևոր է, որ տղան ֆիզիկապես կարողանա իրեն պաշտպանել: Եվ նաև՝ թույլ տվեք երեխային ինքնուրույն լուծել հասակակիցների հետ կոնֆլիկտային իրավիճակները:

Երբեմն մայրերին դժվար է հաշտվել կռիվների հետ, որոնց խառնվում է նրանց սիրելի որդին: Սակայն եթե վազեք նեղացնողների հետ պարզաբանումների, հասակակիցները նրան թուլամորթ կհամարեն:

Կանոն թիվ հինգ՝ սովորեցրեք հարգել կանանց:

Դա անել այնքան էլ բարդ չէ, ինչպես թվում է առաջին հայացքից: Ոչ մեկի համար գաղտնիք չէ, որ ինչպես տղան վերաբերվում է իր մորը, այնպես էլ կվերաբերվի իր կյանքի այլ աղջիկներին: Այդ պատճառով որդու հետ հարաբերություններում թույլ կնոջ դիրք զբաղեցրեք՝ եղեք նուրբ ու խոցելի, քնքուշ ու կանացի, սիրող ու հոգատար: Ցույց տվեք, որ չեք կարողանա գլուխ բերել առանց որդու օգնության, որ շատ խնդիրներ հաջողվում է լուծել միայն նրա շնորհիվ: Օրինակ՝ մի վերցրեք ծանր տոպրակները, եթե նա ցանկանում է դրանք հասցնել տուն, այլ գովեք երեխային: Այսպիսով, դուք կսովորեցնեք նրան կնոջ հանդեպ հոգատարություն դրսևորել:
Կանոն թիվ վեց՝ ողբերգություններ չենք սարքում:

Երեխայի ներկայությամբ մի քննարկեք ձեր ամուսնու հետ գժտությունը և մի կիսվեք այդ առթիվ ձեր զգացմունքներով: Փոքրիկի համար նորմայի կերպար ստեղծեք՝ հայր չկա, նման ընտանիքն էլ կարո՛ղ է գոյություն ունենալ:

Նման մոտեցումը երեխային կօգնի հասկանալ, որ ինքն նույնպիսի երեխա է, ինչպես և բոլորը: Դա կամրապնդի ինքնավստահությունը և կստեղծի կայունության կարևոր զգացողությունը: Եվ նաև՝ երբեք բացասաբար մի խոսեք նրա հոր մասին, չէ՞ որ տղաները ենթագիտակցաբար իրենց նույնացնում են հայրերի հետ: Ստացվում է ՝ եթե հայրը վատն է, ուրեմն ես էլ եմ վատը… Իսկ «լրիվ հորդ ես քաշել» ֆրազը ծրագրավորում է շարժվել նրա հետքերով: Եթե նույնիսկ ծնողը իսկապես հեռու է կատարելությունից, թող նրա կերպարն աղոտ լինի՝ երեխան կմեծանա, և ինքն հետևություններ կանի:

Աղբյուր` Փաստինֆո