Փաստ ինֆո

ՀՀ կառավարության նիստում վարչապետ Կարեն Կարապետյանի հանձնարարականով Կառավարության աշխատակազմի ղեկավար-նախարար Դավիթ Հարությունյանը ներկայացրեց տեղեկատվություն կառավարության նախորդ նիստերին տրված հանձնարարականների և դրանց կատարողականի վերաբերյալ: «Արմենպրես»-ի փոխանցմամբ, Հարությունյանը նշեց, որ 2016-ի սեպտեմբերի 15-ից մինչև 2017 թ. հունվարի 12-ը կառավարության նիստերին հնչել են բազմաթիվ հանձնարարականներ և դրանց հիմնական մասը վերաբերել են քաղաքականությունն իրականացնելուն: Այսինքն՝ նախարարությունները քաղաքականություն իրականացնելու առումով պետք է մշակեին համապատասխան իրավական ակտեր:

Կառավարության աշխատակազմի ղեկավար-նախարարի տեղեկացմամբ՝ նշված ժամանակահատվածում, ընդհանուր առմամբ, մշակվել է 101 իրավական ակտ, որոնցից ընդունվել են 51-ը: Այդ ակտերի թվին են պատկանում օրենքների նախագծեր, կառավարության և վարչապետի որոշումներ, որոշ դեպքերում՝ նախարարների հրամաններ:

Անդրադառնալով առավել կարևոր և հետաքրքրություն ներկայացնող որոշումներին՝ Դավիթ Հարությունյանը առանձնացրեց պետական կառավարման համակարգի արդիականացմանն ուղղված քաղաքական որոշումները:

«Առավել կարևոր կետերից մեկը լիազորությունների ապակենտրոնացումն է: Այս հանձնարարականի արդյունքում որդեգրվել է երկու մոտեցում: Առաջին՝ յուրաքանչյուր օրենքի նախագիծ, որը մշակվում է և չի վերաբերում լիազորությունների ապակենտրոնացմանը, պարտադիր պետք է անդրադարձ կատարի լիազորությունների ապակենտրոնացման խնդրին: Այսինքն՝ օրենքը վերլուծվում է, թե ինչ լիազորություններ կան, որոնք վերապահված են կառավարությանը և, եթե հնարավոր է այն վերապահել ավելի ստորին օղակներին համապատասխան պատասխանատվություն սահմանելով, օրինակ` նախարարություններին, ապա դա իրականացվում է»,- ասաց Դավիթ Հարությունյանը:

Անդրադառնալով «Գնումների մասին» նոր օրենքին, որն արդեն ընդունվել է Ազգային ժողովի կողմից, նշեց, որ այն նախատեսում է գնումների ավելի ճկուն և թափանցիկ մեխանիզմներ, ինչը թույլ է տալիս բարձրացնելու կառավարության հանրային հաշվետվողականությունը:

Հաջորդը վերաբերում է ՊՈԱԿ-ների, ԾԻԳ-երի օպտիմալացմանը: «2017թ. կատարված փոփոխությունները հնարավորություն կընձեռեն տնտեսելու 3,9 մլրդ դրամ»,- ասաց Դավիթ Հարությունյանը:

Միաժամանակ աշխատակազմի ղեկավար-նախարարը նկատեց, որ նախարարությունները հաճախ անհրաժեշտ նյութերը ներկայացնում են  վերջին պահին, ինչը լրացուցիչ խնդիրներ է ստեղծում: Այսօր կառավարության նիստի ժամանակ իր դժգոհությունը հայտնեց աշխատակազմի ղեկավար նախարար Դավիթ Հարությունյանը: Վարչապետ Կարեն Կարապետյանը համաձայնեց նրա հետ՝ հավելելով. «Բոլոր գերատեսչությունները հանձնարարականների կատարման վերաբերյալ այսուհետ պարբերաբար հաշվետվություն են ներկայացնելու:

Բոլոր ոլորտների գերատեսչությունների ղեկավարներին ու նախարարներին խնդրանք՝ հսկողություն սահմանել, որովհետեւ մենք շատ դեպքերում ունենում ենք հանձնարարականների կատարման ուշացում կամ ոչ որակյալ, ոչ ֆունկցիոնալ կատարում: Կառավարության ծրագիրը ռեգուլյար պետք է լինի գերատեսչությունների ու նախարարությունների հսկողության տակ: Շաբաթական դուք հաշվետվություն տվեք ինքներդ ձեզ ու աշխատակազմին: Նյութերը կառավարության նիստ ներկայացնելու բազմաթիվ օրինակներ ունենք, բայց բերում ենք 10-15 րոպե առաջ այն պարագայում, որ այնտեղ որեւէ արտառոց պայման չի փոխվել»,- ասաց վարչապետն ու  նախարարներին զգուշացրեց, որ եթե կառավարության նիստ բերվող նյութերը ուշ ներկայացնելը լինի եւ բացակայի օբյեկտիվ պատճառաբանությունը, իրենք համապատասխան վերաբերմունք են ցույց տալու:

Լուսանկարը՝ Ֆոտոլուրի

Աղբյուր` Փաստինֆո