Փաստ ինֆո

Օրեր առաջ 2 դիմակավարված անձինք մուտք էին գործել Արաբկիր վարչական շրջանի առանձնատներից մեկը, բռնություն գործադրելու սպառնալիքներ հնչեցրել տան անդամների հասցեին, սակայն ոչինչ չհափշտակելով՝ դիմել են փախուստի:

Առաջին հայացքից փոքր-ինչ տարօրինակ այս դեպքով «Փաստինֆո»-ին հաջողվեց պարզել, որ դիմակավորված անձինք մուտք էին գործել վաշխառուների բնակարան, ասել է թե՝ նրանք տեղյակ են եղել, որ տան անդամները տոկոսով գումար են տալիս:

Թե ի՞նչն է պատճառ հանդիսացել, որ երիտասարդները փախուստի են դիմել և ոչինչ չեն հափշտակել ու պահանջել տան անդամներից, կպարզվի քննությամբ, սակայն այսօր արդեն հայտնի դարձավ, որ ավազակային հարձակում կատարելու կասկածանքով ձերբակալվել են 2 երիտասարդ՝ 1993 թ. ծնված Սուրենը և 1997 թ. ծնված Միքայելը:

Ավելի վաղ Քննչական կոմիտեն տեղեկացրել էր, որ դեպքի առթիվ հարուցվել է քրեական գործ՝ ՀՀ քրեական օրենսգրքի 175-րդ հոդվածի 2-րդ մասի 1-ին, 3-րդ և 4-րդ կետերի հատկանիշներով:

Մուտք են գործել առանձնատուն և զենքի գործադրմամբ սպառնացել տան անդամներին

Հիշեցնենք, որ «Փաստինֆո»-ն տեղեկացրել էր, որ նոյեմբերի 23-ին՝ ժամը 20:40-ի սահմաններում, երկու դիմակավորված անձինք, ուրիշի գույքը հափշտակելու դիտավորությամբ, ապօրինի մուտք են գործել Արաբկիր վարչական շրջանի առանձնատներից մեկը և սպառնացել տան անդամներին:

Առերևույթ հանցագործություն կատարած անձանցից մեկը բռնություն գործադրելու սպառնալիքով ատրճանակը պահել է բնակչուհու գլխի ուղղությամբ, իսկ մյուսը որպես զենք օգտագործվող կտրող-ծակող գործիքով հարվածել է կնոջ եղբոր ձախ ոտքին, որից հետո ոչինչ չհափշտակելով դիմել են փախուստի:

Աղբյուր` Փաստինֆո