Փաստ ինֆո

Այսօր նախատեսված էր ՀՀ նախկին փոխվարչապետ ու պաշտպանության փոխնախարար, ներկայումս մեղադրյալ Վահան Շիրխանյանի հանդիպումը լրատվամիջոցների ներկայացուցիչների հետ, սակայն տարբեր պատճառաբանություններով լրագրողների դիմումները «Երևան-Կենտրոն» ՔԿՀ ղեկավարության կողմից մերժվեցին:

ՔԿՀ անցագրային կետում լրագրողներին ասացին, որ յուրաքանչյուր լրագրող պետք է դիմում գրի՝ դրանում նշելով, որ իրեն ու ևս տասը ԶԼՄ ներկայացուցիչների խնդրում է թույլ տալ տեսակցել ՔԿՀ-ում կալանքի տակ գտնվող Վ.Շիրխանյանին: Այդ դիմումները հերթով մերժվեցին, մերժման որոշման մեջ վկայակոչվում էր ՀՀ կառավարության որոշմամբ հաստատված կարգն, ըստ որի կալանավորված անձի հետ միաժամանակ տեսակցել թույլատրվում է առավելագույնը երեք չափահաս անձանց: Վերջիններիս՝ երեք չափահաս անձանց, համար էլ գտնվեց մերժման մեկ այլ պատճառաբանություն՝ ՔԿՀ ծանրաբեռնվածության պատճառով:
Լրագրողների հետ զրույցում Վահան Շիրխանյանի պաշտպան Հայկ Ալումյանը կատարվածը բնորոշեց որպես աճպարարություն, որովհետև դա այսպիսի լուրջ հիմնարկին սազական գործելակերպ չէ: «Սրա միակ նպատակն է հնարավորինս խոչընդոտներ ստեղծել ձեր և պրն. Շիրխանյանի տեսակցության համար»,- ասաց փաստաբանը:

Հայկ Ալումյանը նշեց, որ խնդրել էր ՔԿՀ ղեկավարությանը Վ.Շիրխանյանի հետ լրատվամիջոցների հանդիպելու օր ու ժամ սահմանել: «Կասկածի տակ չդնելով լրատվամիջոցների հետ Վ.Շիրխանյանի հանդիպման հնարավորությունը, ՔԿՀ պետը պատասխանել էր, որ օր ու ժամ ինքը չի սահմանում: Այդ դեպքում մենք մեր կողմից սահմանեցինք, որ նոյեմբերի 10-ին՝ ժամը 14.00-ին դա տեղի կունենա և համապատասխան դիմումով կալանավորված պրն. Շիրխանյանը մոտ մեկ շաբաթ առաջ դիմեց ՔԿՀ պետին: Կասկածի տակ ոչ ոք չի դնում ձեր իրավունքը պրն. Շիրխանյանին տեսակցելու և պրն Շիրխանյանի իրավունքը տեսակցելու ձեզ»,- ասաց Հայկ Ալումյանը:

Ըստ Վ.Շիրխանյանի պաշտպանի, իր պաշտպանյալը նախ ուզում էր մի քանի մանրամասներ հայտնել շատ հակիրճ այս գործի վերաբերյալ իր դիրքորոշման հետ կապված, որովհետև մի բան է, որ այդ մասին պաշտպանն է անընդհատ հայտարարում, մեկ այլ բան է՝ երբ ինքն անձամբ է ներկայացնում: Եվ երկրորդ, Վ.Շիրխանյանը ցանկանում էր որոշ հանգամանքներ ասել առ այն, թե ինչու է այսօր իր նկատմամբ «այս ապօրինի հետապնդումը իրականացվում՝ ո՞ւմ կողմից է սա հրահրված և ինչո՞ւ»:

Գործի նյութերին ծանոթանալու ժամկետը սահմանափակելու քննիչի որոշումը բողոքարկվել է դատախազին՝ պատասխան չկա, սակայն գործն արդեն ուղարկվել է դատարան, ասաց Հայկ Ալումյանը: Լրագրողի հարցին, թե ըստ օրենքի պատասխանում են, որից հետո նոր գործն ուղարկում են դատարան, Հայկ Ալումյանը հայտարարեց. «Ըստ օրենքի, անմեղ մարդկանց չեն կալանավորում, ըստ օրենքի, անձին կալանավորելու համար անհրաժեշտ են հիմքեր, ըստ օրենքի, մարդուն այնպիսի պայմաններում չեն պահում, որ ոչ մի առողջական խնդիր չունեցող անձը հաշմանդամ դառնա, շատ բաներ կան, որ ըստ օրենքի չէ»:

Հայկ Ալումյանը Վ.Շիրխանյանի առողջական վիճակը գնահատեց որպես շատ վատ:

«Ձեզ կարող են այստեղ մի քանի հատոր բժշկական փաստաթղթեր ցույց տան, թե իրենք ինչքան լավ են բուժում, ինչքան հետազոտություններ են իրականացնում, այդ փաստաթղթերը կարող է տպավորիչ թվան», - ասաց Հայկ Ալումյանը՝ հավելելով, որ ավելի տպավորիչ է տեսնել մինչև կալանավորվելն ու կալանավորվելուց հետո Վ.Շիրխանյանի առողջական վիճակի մեջ առկա հսկայական տարբերությունը: «Ու հիմա ինչ-որ մեկը պետք է պատասխան տա», - ասաց Հայկ Ալումյանը:

Ըստ պաշտպանի, Վ.Շիրխանյանը դժվարությամբ իր խցից հասնում է տեսակցությունների սենյակ՝ մոտավորապես երեսուն-քառասուն մետր՝ մի ձեռքում ձեռնափայտով և մյուս ձեռքով ՔԿՀ աշխատակցից բռնվելով:

Հայկ Ալումյանը ձեռնպահ մնաց գործի նյութերին անդրադառնալուց, սակայն նշեց՝ «այն, ինչ որ իրենք հիմա ներկայացնում են որպես ապացույց, դրանք ապօրինի ձեռք բերված են, դրանք չէր կարելի օգտագործել ընդհանրապես, ասենք՝ ապօրինի գաղտնալսում, և երկրորդ, եթե նույնիսկ դրանք ընդունենք որպես օրինական, այն ինչ որ ձայնագրված է և այն ցուցմունքները, որոնք հիմնված են ձայնագրության վրա, դրանք ընդհանրապես ոչ մի կերպ չեն վկայում պրն. Շիրխանյանի մասնակցության մասին»: Հայկ Ալումյանն ընդգծեց, որ իրենք ասում են՝ չի հաստատվում, նախաքննական մարմինն ասում է՝ հաստատվում է, դատարանն արդեն կորոշի հաստատվում է մեղադրանքը, թե ոչ:
«Մեր ասածն ուրիշ բան է՝ ինչո՞ւ եք այս մարդուն, հարգելի իշխանություններ, պահում կալանքի տակ, աստիճանաբար սպանում, որովհետև այս ճանապարհը գնում է ուղիղ դեպի դրան, եթե այս մարդը ազատության մեջ մնալով՝ ոչ թաքնվելու է, ոչ էլ խոչընդոտելու է քննությանը: Թող ինքը ազատ լինի, գա դատարան, այնտեղ ապացուցեք, որ ինքը մեղավոր է, եթե կապացուցեք, ուրեմն դատեք: Բայց ինչու եք սպանում այս մարդուն, դրա մասին է խոսքը»,- ասաց Վ.Շիրխանյանի պաշտպանը:

Աղբյուր` Փաստինֆո