Փաստ ինֆո

Երևանի Հերացու 2 հասցեում երեք օր է լայն թափով ՀԱՊԿ ակադեմիայի շենքի շինարարությունն է շարունակվում՝ թեև շինարարության թույլտվությունն անվավեր ճանաչելու պահանջի մասին հայցադիմում է ներկայացվել ՀՀ վարչական դատարան, և այն դատարանի վարույթ է ընդունվել:

Իսկ ըստ Վարչական դատավարության օրենսգրքի 83-րդ հոդվածի 1-ին մասի համաձայն՝ «վիճարկման հայցի վարույթ ընդունելը կասեցնում է վիճարկվող վարչական ակտի կատարումը մինչև այդ գործով գործն ըստ էության լուծող դատական ակտի օրինական ուժի մեջ մտնելը…»:

Երևանի քաղաքապետարանը՝ հիմք ընդունելով վերը նշված իրավադրույթի պահանջները, կասեցրել է «Հավաքական անվտանգության պայմանագրի կազմակերպության ակադեմիա» հիմնադրամին տրամադրված շինարարության թույլտվությունը, ինչն ենթադրում է, որ վերջինս Երևան, Հերացու 2 հասցեում շինարարական աշխատանքներ իրականացնելու իրավունք չունի:

Հայցադիմում ներկայացրած տարածքի բնակչուհին «Փաստինֆո»-ի լրագրողի հետ զրույցում նշեց, որ իրենք միակ բողոքողները չեն, իր տեղեկություններով, այլ հարևաններ ևս բողոքներ ներկայացրել են: Մասնավորապես, շինարարության պատճառով, ամբողջ թաղամասի ու ճոպանուղուց այն կողմ գտնվող տների բնակիչները չեն կարողանում օգտվել «արտաքին աշխարհի» հետ կապող աստիճաններից: Իրավասու անձինք խոստանում են՝ կավարտվի շինարարությունը, աստիճանները կվերականգնվեն, սակայն արդեն երեք տարի շինարարությունն ընթանում է, և աստիճանները չկան: Մարդիկ ստիպված մեքենաների ճանապարհով ահագին մեծ պտույտներ են գործում՝ մինչև հասնեն Շրջանային:

Սկզբնապես նախատեսված էր, որ կառուցվող շենքի տեղում նախկինում գտնված Հր.Աճառյանի անվան դպրոցի՝ պատմական նշանակություն ունեցող շենքի, ֆասադը կպահպանվի, սակայն շինարարներն այն այնպես են քանդել-քանդել, որ ֆասադը փլվել է՝ պարզ չէ դա միտումնավո՞ր է արվել, թե՞ պարզապես ոչ գրագետ աշխատանքի հետևանքով:
Ֆասադի տեղում կառուցվել է ավելի մեծ, ավելի բարձր շինություն՝ որպես ՀԱՊԿ ակադեմիա: Ընդ որում նախագծով նախատեսվում էր հին շենքը վերանորոգել ու բարելավել և ոչ թե կառուցել նոր կապիտալ կառույց:

Շինարարները բարձրացրել են նաև հարթակները՝ մինչև նախկին դպրոցի մակարդակը, ինչը նախագծով նախատեսված չի եղել, ուստի ապօրինի է:

Իրականում ՀԱՊԿ ակադեմիա է կառուցվում, թե մի այլ բան, վերջնական պարզ չէ, սակայն այդ շենքի հետնամասում, կողքերից երկու բարձրահարկեր են կառուցվում, որոնք նույնպես առերևույթ կապվում են ՀԱՊԿ ակադեմիայի հետ՝ ՀԱՊԿ ակադեմիա հյուրանոց և Պրեզիդենտ ակադեմիա հյուրանոց: Ընդ որում, նախագծով նախատեսված էր ինը հարկ, սակայն վերջերս տեղեկություն է ստացվել, որ ցանկություն կա փոխել նախագիծը և ավելացնել ևս երեք հարկ, որոնք կապվելու են իրար հետ կամրջակով:

Նախագիծն արվում է «Հայպետնախագիծ» ինստիտուտում, որտեղից հրավիրված մասնագետն ասել է, որ շինարարության արդյունքում կարող է բնակչի տան լուսային ռեժիը խախտվել, ապա ինքն իրեն հերքել է՝ ասելով, որ լուսային ռեժիմն ապահովվում է, սակայն հրաժարվել է որևէ գրավոր եզրակացություն տալ:

Իսկ բնակչի կողմից հրավիրված լիցենզավորված անկախ մասնագետը հաշվարկներ ու չափագրումներ անելուց հետո եզրահանգել է՝ եթե պետք է երկուսուկես ժամ անընդմեջ լույսը պահպանվի, կես ժամ էլ չի ապահովվում:

Ի պատասխան այս մասին քաղաքապետարան արված դիմումի, քաղաքապետարանում հայտնել են, որ մոտավորապես բնակչի շենքի չափով՝ տասնյոթ մետր լայնությամբ, պատուհան են թողել, որն ապահովելու է լուսային ռեժիմը: Բնակչի մոտ դա հավատ չի ներշնչում՝ «ո՞նց են արևին թելադրելու, որ նա գա այս պատուհանից մտնի, երկուսուկես ժամ լույս տա ինձ, հետո նոր շեղվի, գնա, անիմաստ բաներ են ասում»:

Բնակչուհին հայտնեց նաև, որ դատի տալուց հետո շինարարությունը կասեցվել էր, միառժամանակ ոչինչ չէին անում, սակայն մի երեք օր է, նորից թափ են վերցրել: «Նորից սկսեցինք բողոքել քաղաքապետարան, որտեղ ասացին՝ մենք ձեր բողոքն ընդունում ենք, ընթացք կտանք, բայց երեք օր է բողոքում ենք, ոչ մի ընթացք չեն տալիս»,- ասաց բնակչուհին:

Մեր զրուցակիցը 01.09.2016թ. և 02.09.2016թ. կրկին գրավոր դիմել է Երևանի քաղաքապետարանին , իսկ բողոքների կրկնօրինակներն ուղարկել ՀՀ նախագահի վերահսկողության ծառայությանը, սակայն, նույն ինտենսիվ տեմպով շարունակվում է ապօրինի շինարարությունը:

Աղբյուր` Փաստինֆո