Փաստ ինֆո

Այսօր Սահմանադրական դատարանը գրավոր ընթացակարգով քննության կառնի ՀՀ ԱԺ պատգամավորների դիմումի հիման վրա գործը: Կենսաթոշակների կուտակային բաղադրիչն արդեն երկրորդ անգամ ՍԴ-ում վիճարկող պատգամավորներն այս անգամ դիմել են  Ազգային ժողովի կողմից 2014թ.-ի հունիսի 21-ին վերանայված «Կուտակային կենսաթոշակների մասին» և կից մի շարք  օրենքները, ինչպես նաև դրանց հետ համակարգային կապի մեջ գտնվող «Եկամտային հարկի մասին» օրենքի 6-րդ և 10-րդ հոդվածները Սահմանադրությանը հակասող և անվավեր ճանաչելու խնդրանքով:

Սահմանադրական դատարանն այս գործի դատաքննությունը պետք է իրականացներ դեռևս մարտի 31-ին, սակայն որոշեց հետաձգել այն մինչև հուլիսի 7-ը: Հետաձգման մասին որոշումն ընդունվել է՝ հաշվի առնելով դիմող կողմի ներկայացուցիչներից մեկի՝ ԱԺ ՀՅԴ խմբակցության անդամ Արծվիկ Մինասյանի, դատաքննությունը առնվազն  45 օրով հետաձգելու վերաբերյալ միջնորդությունը: Վերջինս պայմանավորված է պատասխանող կողմի՝ ԱԺ-ի, և կառավարության ներկայացրած մեծածավալ նյութերի վերաբերյալ ամբողջական մոտեցումներն ու վերլուծությունը ներկայացնելու համար որոշակի ժամանակի անհրաժեշտությամբ:

Ինչպես «Փաստինֆո»-ն ավելի վաղ տեղեկացրել էր, ԱԺ 34 պատգամավորներ դիմել են ՍԴ՝ «Կուտակային կենսաթոշակների մասին» և հարակից 10 օրենքներում Ազգային ժողովի կողմից 2014թ-ի հունիսի 21-ի արտահերթ նստաշրջանում ընդունված փոփոխություններն ու լրացումները, ինչպես նաև վիճարկվող ակտերի հետ համակարգային կապի մեջ գտնվող «Եկամտային հարկի մասին» օրենքի 6-րդ և 10-րդ հոդվածները Սահմանադրության 1, 3, 5, 6, 8, 14.1, 31, 34, 36, 37, 42, 42.1, 43, 44, 45, 48, 62, 75, 83.5, 89-րդ հոդվածների պահանջներին հակասող և անվավեր ճանաչելու խնդրանքով:

Դիմող կողմը ՍԴ-ից խնդրել է նաև, հաշվի առնելով խնդրի հասարակական մեծ հնչեղությունը և հիմք ընդունելով «Սահմանադրական դատարանի մասին» օրենքի 98-րդ հոդվածի 6-րդ մասը, գործի դատաքննությունն իրականացնել բանավոր ընթացակարգով: Նաև՝ մինչև գործի դատաքննության ավարտը կասեցնել «Կուտակային կենսաթոշակների մասին» օրենքի 5-րդ, 6-րդ, 7-րդ, 8-րդ, 71-ր և 81–րդ հոդվածները, քանի որ, ըստ դիմումատուների, «դրանց գործողությունը մինչև գործի դատաքննության ավարտը՝ 1974 թվականի հունվարի 1-ին և դրանից հետո ծնված աշխատող անձանց համար կհանգեցնի նրանց սեփականության իրավունքի անհամաչափ և ոչ իրավաչափ սահմանափակմանը, կենսամակարդակի նվազմանը, ինչպես նաև պետության կողմից ստանձնելիք երաշխիքների անհամաչափ բեռնվածությանը: Այն կարող է ունենալ նաև չվերականգնվող սոցիալ-տնտեսական բացասական հետևանքներ»:

Դիմումը ստորագրել են ԱԺ «Բարգավաճ Հայաստան» և ՀՅԴ խմբակցությունների անդամները, ինչպես նաև նրանց միացած՝ «Հայ ազգային կոնգրես» խմբակցությունից Նիկոլ Փաշինյանը, «Ժառանգություն» խմբակցությունից Թևան Պողոսյանը և Ալեքսանդր Արզումանյանը, անկախ պատգամավորներ Էդմոն Մարուքյանը և Խաչատուր Քոքոբելյանը:

ՍԴ-ում դիմող կողմի պաշտոնական ներկայացուցիչները, ինչպես և նախորդ անգամ ՍԴ-ում կուտակային բաղադրիչի սահմանադրականությունը վիճարկելու ժամանակ, ԱԺ ՀՅԴ խմբակցության անդամ Արծվիկ Մինասյանն է և իրավաբաններ Մերի Խաչատրյանն ու Արտակ Զեյնալյանը:

Ի դեպ՝ Արծվիկ Մինասյանն օրերս ֆեյսբուքյան իր էջում հայտնել է, որ  ՍԴ դիմումի պատշաճ ընթացքը ապահովելու համար իրենք երկար ժամանակ հետևողականորեն ստեղծվում էին դիմումում արծարծված հարցերը հիմնավորող փաստաթղթեր: «Այս ժամանակահատվածում ձեռնարկված քայլերի արդյունքում այդպիսի փաստաթղթերի քանակն անցնում է 400 էջից»,-գրել էր նա՝ միևնույն ժամանակ տեղեկացնելով, որ դիմումի վերաբերյալ ՀՀ դատական դեպարտամենտի գրավոր պատասխանում, ըստ էության,  պաշտպանվում է պատգամավորների դիրքորոշումը: