Փաստ ինֆո

Կաշառք ստանալու վերաբերյալ ՀՀ արդարադատության նախարարության քրեակատարողական վարչության այլընտրանքային պատիժների կատարման բաժնի Արմավիրի բաժանմունքի պետի ու նույն ստորաբաժանման առաջատար մասնագետի դեմ գործով այսօր հրապարակվեցին պաշտպանական ճառերը:

Հիշյալ ստորաբաժանման ղեկավար Սահակ Հարությունյանի պաշտպան Ինեսսա Պետրոսյանը միջնորդեց իր պաշտպանյալին  արդարացնել, անպարտ ճանաչել և անհապաղ ազատել կալանքից:

Գործով երկու ամբաստանյալներն էլ մեղադրվում են ՀՀ քրեական  օրենսգրքի 311-րդ  հոդվածի 3-րդ մասի 1-ին, 2-րդ և 3-րդ կետերով, այն է՝ մի խումբ անձանց կողմից նախնական համաձայնությամբ շորթմամբ խոշոր չափերով կաշառք ստանալը:

Ըստ մեղադրանքի՝ բաժանմունքի պետն ու առաջատար մասնագետ Ալեքսանդր Խաչատրյանը նախնական համաձայնությամբ, տուգանքի դատապարտված Բաբկեն Բուդաղյանի օգտին գործողություն կատարելու` հայտարարված համաներումը վերջինիս նկատմամբ կիրառելու և սահմանված կարգով պատժի կրումից ազատելու օրինական գործընթացը սկսելու համար, շորթմամբ 2013թ. հոկտեմբերի 4-ին նրանից պահանջել և 2013թ. հոկտեմբերի 14-ին նշված բաժանմունքի նստավայրում ստացել են խոշոր չափերի` 400 000 ՀՀ դրամ կաշառք:

Ըստ պաշտպանի՝ գործի դատաքննության ընթացքում դատարանում հետազոտված ապացույցներից միանշանակ հաստատվեց, որ Սահակ Հարությունյանին առաջադրված մեղադրանքն ամբողջությամբ անհիմն է և ապացուցվեց նրա անմեղությունը իրեն առաջադրված մեղադրանքում:

Բ. Բուդաղյանը դատարանում ցուցմունք է տվել ու հայտնել, որ Սահակ Հարությունյանն իրենից համաներում կիրառելու համար գումար չի պահանջել, նման խոսակցություն նրանց միջև երբևէ չի եղել: Սահակ Հարությունյանը իրեն միայն ասել է, որ բնակության վայրից տեղեկանք և լուսանկարներ ներկայացնի, իսկ գումար իրենից չի ուզել: Բաբկեն Բուդաղյանը մի քանի անգամ միանշանակ պնդել է այդ ցուցմունքը:

Պաշտպանը հայտարարեց, որ նախաքննության ընթացքում տուժողը խոշտանգումների է ենթարկվել՝ մեղադրանքի համար ցանկալի ցուցմունքներ կորզելու նպատակով, նրա նկատմամբ ճնշումներն ու հետապնդումները շարունակվել են նաև դատաքննության ընթացքում:

Մասնավորապես՝ դատարան է մուտք եղել  Բ.Բուդաղյանի դիմումն առ այն, որ «դատարանում ես ճիշտ ցուցմունքներ չեմ տվել, խնդրում եմ ինձ վերջնականորեն հարցաքննել և ներողամիտ գտնվել իմ հանդեպ», ապա դրա հրապարակումից անմիջապես հետո Բ.Բուդաղյանը հանդես էր եկել հայտարարությամբ՝ «Այդ դիմումն ինձ թելադրել են և ստիպել են գրել ՀՔԾ քննիչ Ա.Մինասյանը և 6-րդ վարչության պետ` Եղիշե Պետրոսյանը, սպառնալով որ հակառակ դեպքում ինձ քննիչ Շուշանյանը կձերբակալի մեկ այլ գործով և այն բերել և դատարան եմ հանձնել նույն Ե.Պետրոսյանի ուղեկցությամբ` հուլիսի 03-ին»:

Մեղադրողի կողմից իր ճառում մեջբերված ապացույցները, ըստ Ինեսսա Պետրոսյանի,  մասնավորապես՝  վկաների ցուցմունքները, ընդհանրապես չեն առնչվում իր  պաշտպանյալ Սահակ Հարությունյանին առաջադրված մեղադրանքի հետ: Իսկ Ալեքսանդր Խաչատրյանի և Բաբկեն Բուդաղյանի խոսակցությունները, որպես Սահակ Հարությունյանի  դեմ ձեռք բերված ապացույց, որևէ կերպ չեն կարող դրվել նրան առաջադրված մեղադրանքի հիմքում, քանի որ նախ և առաջ Ա. Խաչատրյանը շատ հստակ ցուցմունք է տվել, որ Ս. Հարությունյանը իրենց խոսակցություններից որևէ տեղեկություն չի ունեցել, իսկ ինքն էլ նրա անունը օգտագործել է վստահություն ձեռք բերելու համար:

«Որևէ խոսակցություն իմ պաշտպանյալի մասնակցությամբ տեղի չի ունեցել և չէր էլ կարող տեղի ունենալ»,- ասաց Ի.Պետրոսյանը՝ ընդգծելով, որ դատարանը պետք է վեր կանգնի ամեն ինչից և իրականացնի արդարադատություն:

Իր պաշտպանական ճառում դատարանի ուշադրությունը ապօրինությունների վրա հրավիրեց նաև ամբաստանյալ Ալեքսանդր Խաչատրյանի պաշտպան Գիվի Հովհաննիսյանը: Նրա գնահատմամբ՝ առաջադրված մեղադրանքը երկու ամբաստանյալի մասով էլ ապօրինի է:

Իր պաշտպանյալի մասով, մասնավորապես, «կաշառքի մասին խոսք լինել չի կարող», իր պաշտպանյալը  ենթակա է դատապարտվելու խարդախության համար:

«Համաներման ցուցակ գոյություն չունի և իր լիազորությունների մեջ չի մտնում համաներման ցուցակի մեջ մտցնելը»,- ասաց Գ.Հովհաննիսյանը:

Պաշտպանը դժգոհություն հայտնեց մեղադրողի ճառից, միայն անվանումն է փոխվել՝ ճառն ամբողջությամբ նույն մեղադրական եզրակացությունն է: Նա հավելեց, որ քննիչներն ու մեղադրողն «ուժի զոռով» դատարան ուղարկեցին գործը ու պահպանեցին մեղադրանքը դատարանում:

Գիվի  Հովհաննիսյանն ընդգծեց, որ Սահակ Հարությունյանը, ով անմեղ է, պետք է արդարացվի: Իսկ իր պաշտպանյալի մասով պաշտպանը միջնորդեց ճանաչել ու հռչակել նրա անմեղությունն առաջադրված մեղադրանքում, նրան մեղավոր ճանաչել պաշտոնեական դիրքի օգտագործմամբ, կաշառք ստանալու պատրվակով խարդախության փորձ կատարելու համար (ՀՀ քրեական օրենսգրքի 34-178-րդ հոդվածի 2-րդ մասի 1.1 և 5-րդ կետերով) և նրա նկատմամբ նշանակել հոդվածի սանկցիայով նախատեսված համաչափ պատիժ:

Ամբաստանյալ Սահակ Հարությունյանն իր հերթին նշեց, որ ինքը որևէ կապ չունի իրեն մեղսագրվող արարքի հետ, ինքը տուժողից գումար չի պահանջել, այդ մասին իր հետ առերես հարցաքննության ընթացքում պնդել է նաև տուժողը: Ամբաստանյալը ժամանակ խնդրեց վերջին խոսքին նախապատրաստվելու համար. դատարանը բավարարեց միջնորդությունը: