Փաստ ինֆո

Եվրո-2016-ի ընտրական փուլում վաղը՝ հոկտեմբերի 11-ին Հայաստանի հավաքականն իր առաջին տնային հանդիպումը կանցկացնի՝ հյուրընկալելով Սերբիայի ընտրանուն: Խաղի նախօրեին Հայաստանի ազգային թիմի գլխավոր մարզիչ Բերնար Շալանդը ներկայացավ նախախաղային ասուլիսին, որի վերաբերյալ մանրամասներ է հաղորդել armsport.am-ը:

 - Առանցքային ֆուտբոլիստների բացակայությունը մի կողմ թողած՝ ի՞նչ եք ասել մյուս ֆուտբոլիստներին:

 - Բնականաբար կորուստ է, որ Մխիթարյանը, Օզբիլիսը, Մովսիսյանը և մյուսները բացակայում են: Այժմ ես ինձ խոհարար եմ զգում. եթե ես ունենայի խավիար և փափուկ միս, ապա կպատրաստեի հարսանեկան աղցան, սակայն ես ունեմ կարտոֆիլ, բանջարեղեններ, որոնցից լավ ապուր կարող եմ պատրաստել:

 - Ինչքա՞ն ժամանակ եք հետևում հավաքականի նորեկ Ալեքսանդր Կարապետյանի խաղին և ի՞նչ կասեք նրա վերաբերյալ:

 - Բնականաբար այդքան հարձակվողների բացակայությունից հետո նոր խաղացողներ պետք է գտնեի: Նա կռվող, պայքարող ֆուտբոլիստ է և իմ կարծիքով առաջիկա խաղերին նա կարող է օգնել մեզ: Նա Մեսսի չէ, Ռոնալդու չէ, նա Կարապետյանն է, ով լավ հարձակվող է:

 - Մաուրո Գևգեոզյանի բացակայության պատճառը և Դենիս Թումասյանի` հավաքական չհրավիրվելու վերաբերյալ.

 - Գևգեոզյանի՝ հավաքականին չմիանալու համար ոչինչ ասել չեմ կարող, քանի որ նա մեզ հետ չէ: Ոչ միայն տոմսի հետ է կապված խնդիրը, այլ նաև ակումբի: Ինչ վերաբերում է Թումասյանին, ապա նա հետագայում կարող է դիտարկվել՝ որպես ընտրանու թեկնածու: Պատճառն այն է, որ նա քիչ խաղաժամանակ էր ստանում, իսկ այժմ շատ է խաղում ու հետագայում կդիտարկենք նրան հրավիրելու տարբերակը:

 - Հայաստանի առաջնության հանդիպումներին շատ եք ներկա լինում. ինչո՞ւ են ներքին առաջնությունից քիչ մասնակիցներ հավաքականում:

 - Առաջնության մակարդակը բարձր չէ և այդ ֆուտբոլիստները չեն կարող խաղալ միջազգային հանդիպումներում: Խնդիրը նաև այն է, որ յուրաքանչյուր դիրքում առաջնությունից չկան այնպիսի ֆուտբոլիստներ, ովքեր հավաքական հրավիրվածներից լավ են խաղում: Հարձակվողների մասով կասեմ, որ այնքան էլ մեծ ընտրության հնարավորություն չունենք, չկան ֆուտբոլիստներ, ովքեր 90 րոպե անդադար կվազեն և կպայքարեն: Սակայն ես միշտ էլ կհետևեմ հանդիպումներին:

 - Ինչպե՞ս է Արթուր Սարկիսովի ֆունկցիոնալ վիճակը և կլինի արդյո՞ք նա մեկնարկային կազմում:

- Այժմ ամեն ինչ կարգին է և նա կարող է խաղալ:

- Այլ վնասվածքներ ունե՞նք:

 - Ոչ, ոչ, ոչ (ժպտում է,- խմբ):  Փառք Աստծո չունենք: Ռումյան Հովսեփյանը թեթև ցավեր ուներ, սակայն այժմ ամեն ինչ լավ է:

 - Լևոն Հայրապետյանը և Կառլեն Մկրտչյանն իրենց թիմերում չեն խաղացել վերջին հանդիպումներում. արդյո՞ք նրանք պատրաստ են վաղվա հանդիպմանը:

 - Նրանք չեն խաղացել առաջին թիմերում, սակայն խաղացել են իրենց 2-րդ թիմերում: Վաղվա հանդիպմանը նրանք ամբողջապես պատրաստ են:

 - Ի՞նչ մարտավարությամբ եք խաղալու վաղը և ի՞նչ սպասելիքներ ունեք:

 - Բնական է, որ մենք չենք կարող գնդակին այնքան տիրել, որքան մրցակիցը: Կփորձենք կազմակերպված պաշտպանվել և կարողանալ օգտագործել հակագրոհները: Պետք է պաշտպանվել առյուծի նման և հարձակվել արծվի նման. ինչպես հարձակվում է որսի վրա:

 - Դուք փոխեցիք հավաքականի պաշտպանների մարտավարությունը և այժմ 5 պաշտպաններով է ընտրանին գործում. ի՞նչ կասեք այդ առիթով:

 - Ես կարող եմ ասել, որ վաղը չենք պաշտպանվելու 3 կամ 5 ֆուտբոիստներով, մենք հարկ եղած դեպքում 10 խաղացողներով էլ կպաշտպանվենք: Ես տղաներին Ֆրանսիայի հավաքականի խաղից դրվագ ցույց տվեցի, երբ նրանք պաշտպանվում էին 9 ֆուտբոլիստներով: Դա Ֆրանսիայի հավաքականն է, ոչ Հայաստանի... գրոհել պետք է 2, 3, 4, 5 ֆուտբոլիստներով:

 - Կադրային կորուստների առումով շատ վատ իրավիճակում եք հայտնվել. Դուք ներքուստ ճնշում զգո՞ւմ եք:

 - Բնականաբար ես ավելի գոհ կլինեի, եթե Մովսիսյանը, Մխիթարյանը և մյուսները լինեին: Իմ բնավորության մեջ չկա լացել, բողոքել...  Գուցե հենց վաղն էլ հրաշք կատարվի... հնարավոր է՝ հենց այս կազմով մենք վաղը հաղթենք և մտնենք Հայաստանի ֆուտբոլի պատմության մեջ: