Փաստ ինֆո

Երևանի Կենտրոն-Նորք Մարաշ վարչական շրջանների ընդհանուր իրավասության  դատարանը մոտ մեկ տարի առաջ` 2012 թվականի հունվարին անվավեր  ճանաչեց Նոր Նորքի նոտարական տարածքի նոտարի կողմից 2011թ. հունիսի 28-ին հաստատած կտակը,  ինչն առ այսօր վիճարկվում է դատական ատյաններում:

Նոտար Օսան Հակոբյանը մեզ հետ զրույցում, ասաց որ ինքը ամեն բան արել է օրենքի պահանջով և  պայքարելու է մինչև վերջ, քանի որ սա հարված է ոչ միայն իրեն, այլ ամբողջ նոտարական ինստիտուտին:

Բանն այն է, որ վիճարկվող կտակի համաձայն, քաղաքացի Յուրիկ Ամիրխանյանն իր ունեցվածքը կտակել էր քրոջը` Լաուրա Ամիրխանյանին ու մտերմուհուն, թեեւ ուներ նաեւ դուստր: Նոտարական գործարքը վավերացվել է Ամիրխանյանի բնակարանում, քանի որ վերջինս քաղցկեղով հիվանդ էր եւ, Լաուրա Ամիրխանյանի փաստաբան Կարապետ Բադալյանի խոսքով,  գտնվում էր բարդության վերջին փուլում: 2 վկայի, որոնք եղել են Ամիրխանյանի հարևանները, իր քրոջ՝ Լաուրա  Ամիրխանյանի  ներկայությամբ  նոտարն ընթերցել է կտակը  և համոզվելով, որ Ամիրխանյանը հենց այդպես է ցանկանում տնօրինել իր գույքը, հաստատել է այն, իսկ հարևանները, որպես վկա ստորագրել են, - գործի մանրամասները ներկայացնելով ասում է Կարապետ Բադալյանը:

Ըստ Յ. Ամիրխանյանի կտակի՝ գույքի մի մասը նա կտակել է քրոջը, իսկ ավտոմեքենան՝  մտերմուհուն:

Ամիրխանյանի դուստրը տեղեկանալով այդ մասին դիմել է դատարան՝ կտակն անվավեր ճանաչելու պահանջով: Իսկ դատարանում գործարքի վկաներից մեկը սկսել է հակասական ցուցմունքներ տալ: Մասնավորապես վկա Սանասար Մելքոնյանը դատարանում հայտարարել է, որ նոտարը չի ընթերցել կտակը, և  ինքը չի իմացել, թե ինչ փաստաթուղթ է ստորագրում, սակայն  ստորագրել է` չնայած իրեն ոչ ոք չի ստիպել դա անել:

Մեզ հետ զրույցում վկան պնդեց դատարանում հնչեցրած իր հայտարարությունը, բայց հրաժարվեց պատասխանել հարցերին, ասելով, թե դեպքից 2 տարի է անցել եւ ինքն այլ մանրամասներ չի հիշում: «Մյուս վկան, որը եղել է Սանասար Մելքոնյանի կինը՝ ինչ-ինչ պատճառներով  այդպես էլ  վկայություն չի տվել և դատարանը հիմք ընդունելով Ս. Մելքոնյանի  ցուցմունքը անվավեր է ճանաչել նոտարի կողմից հաստատած կտակը,- նշում է  պաշտպան Կարապետ Բադալյանը:

Դատական ակտից տեղեկանում ենք, որ վկան դատարանում ցուցմունք տալիս,  հայտարարել է, որ ինքը և կինը չեն կարդացել և առանց տեղեկանալու, թե ում ինչ է կտակվում, ստորագրել են։ Իսկ  կտակը ստորագրելու ժամանակ նոտարը Յ. Ամիրխանյանին չի հարցրել կտակն իր կամքի արտահայտությունն է, ստորագրեն վկաները, թե ոչ:

Նոտարը դիմել  է վերաքննիչ դատարան` բողոքարկելով առաջին ատյանի դատարանի ակտի դեմ, և պնդել, որ ինքն ընթերցել է կտակը,  բայց քանի որ Յուրիկ Ամիրխանյանը թույլ է եղել՝  կտակը ստորագրել է վկան, սակայն վերաքննիչ դատարանը ևս հիմք ընդունելով վկայի ցուցմունքը, առաջին ատյանի վճիռը թողել է անփոփոխ: Իսկ փաստաբանն էլ դիմել է ոստիկանություն` վկայի կողմից  սուտ ցուցմունք տալու համար, որտեղ հարուցվում է քրեական գործ՝ ՀՀ  քրեական օրեսգրքի 338-րդ հոդվածով (դատարանին սուտ ցուցմունք տալը): «Նախաքննական մարմնին տված ցուցմունքներում նա ասել է, որ երբ իրեն կանչել են, դուռը բացել են ասել են ստորագրի, ինքն էլ ստորագրել է, իսկ երբ  բողոքարկվել է, և քրեական գործ է  հարուցվել, այդ անգամ էլ ասել է, որ իրեն թվացել է ինչ որ բժշկական թղթեր են և ստորագրել է», - փոխանցեց փաստաբան Կ.Բադալյանը:

Կարապետ Բադալյանի տեղեկություններով մոտ մեկ տարի է գործը քննվում է, սակայն որոշում դեռ չկա: «Այն փաստը, որ քրեական գործ է հարուցվել և կատարվում է քննություն, ցույց է տալիս, որ դատախազության և ոստիկանության համար կան համոզիչ ապացույցներ, և որ առկա է հանցագործության փաստ»:

«Նոտարի հաստատած փաստաթուղթը, որը լիարժեք ապացուցողական ուժ ունի, վկայի ակնհայտորեն սուտ ցուցմունքի հիման վրա անվավեր է ճանաչվում»,- նշում է Կարապետ Բադալյանն ու հավելում՝ աննախադեպ է և վտանգավոր, սա իրական մարտահրավեր է նոտարիատի ինստիտուտին ու նոտարական գործունեությանը:  «Չեմ բացառում, որ դատավոր Խանդանյանի որոշման վրա իր ազդեցությունը թողած լինի կոռուպցիան, բայց սա ընդամենը իմ կարծիքն է: Լավ կլիներ, որ իրավապահ մարմինները ստուգեին, թե արդյոք այս որոշման հետնաբեմում եղել է կոռուպցիա, թե ոչ», - ասում է փաստաբանը:

Հեղինակ` Էլեոնորա Առաքելյան