Փաստ ինֆո

Առողջապահության նախարարության գործունեության հիմնական ուղղություններից ամենակարևորը, ըստ աշխատակազմի ղեկավար Սուրեն Քրմոյանի, ոլորտի պետական քաղաքականության մշակումն ու իրականացումն է:

Ըստ նրա, առողջապահության նախարարության հիմնական գործառույթը յուրաքանչյուր հիվանդի, յուրաքանչյուր դեպքի ուսումնասիրությունն է: Բայց գլոբալ առումով նախարարությունը պետք է այն ձևով կանոնակարգի դաշտը, մշակի քաղաքականություն և զարգացման ուղիներ, որպեսզի համակարգն ինքն իրեն կարգավորի և տարածքային կառավարման, տեղական ինքնակառավարման մարմինները, բուժհաստատություններն իրենք կարողանան լուծել այդ խնդիրները և մենք հնարավորություն ունենանք հնարավորինս քիչ միջամտություն գործել իրենց ընթացիկ գործունեությանը:

Նա ընդգծեց, որ հաջորդ կարևոր ուղղությունը հաճախորդների /հիվանդների/ իրավունքների պաշտպանությունն է, որը համակարգային լուծման անհրաժեշտություն ունի:

«Այս առումով, եթե տեսնում ենք մեկ կոնկրետ իրավունքի խախտման դեպք, պետք է մեխանիզմներ մշակվեն և ներդրվեն, որպեսզի այլ բուժհաստատություններում այդ խախտումները չկրկնվեն»,- նշեց նա:

Սուրեն Քրմոյանը նախարարության կարևորագույն նպատակներից համարեց նաև բժիշկների իրավունքների պաշտպանությունը: Որքան էլ վերջին ժամանակներս շատ է խոսվում, որ հիվանդի իրավունքը խախտվում է, որ բժիշկները գումարներ են վերցնում, բայց չպետք է մոռանալ, որ այդ նույն բժիշկներն են, որոնք և՛ պատերազմի, և՛ երկրաշարժի ժամանակ կատարել են իրենց աշխատանքը, բուժել են մարդկանց: Ավելին՝  քիչ չեն դեպքերը, երբ տասնյակ տարիներ հարյուրավոր կյանքեր փրկած բժշկի դեմ մի խնդրի առնչությամբ կարող է դուրս գալ հասարակությունը: Ի՞նչ անել ուրեմն: «Մենք պետք է մտածենք մեխանիզմներ, որ նրա իրավունքները ևս պաշտպանվեն՝ թե առօրյա, սոցիալական, թե մասնագիտական վրիպումների առումներով»,- կարծում է Սուրեն Քրմոյանը:

Հանրապետության առողջապահության գերատեսչության գործունեության կարևոր խնդիրներից մեկն էլ Սուրեն Քրմոյանը համարում է առողջապահության համակարգի գործունեության կանոնակարգումը: Ըստ նրա՝ դա առաջին հերթին պետական քաղաքականության մշակումն ու իրականացումն է:

«Հաճախ իրականացնում ենք դրվագային, ոլորտային ծրագրեր, օրինակ՝ մոր և մանկան, դեռահասների, շտապ օգնության ոլորտներում, բայց խնդիրն այն է, որ մենք պետք է պատկերացում ունենանք, թե ուր է գնում մեր առողջապահությունն ընդհանրապես, թե ինչ ենք ունենալու մենք 5 տարի, 10 տարի հետո: Ինչի վրա ենք շեշտը դնելու՝ առաջնային, երկրորդային բուժօգնությա՞ն, թե կանխարգելման վրա, դրանցից որն ինչքա՞ն կարևորություն ունի»,-ասաց նա:

Ըստ նրա՝ օրենսդրության մշակումն ու ապահովումն այն գործիքն է, որի միջոցով պետք է կանոնակարգվի բուժհաստատությունների, դեղագործական ընկերությունների, հաճախորդների և ոլորտի բոլոր կազմակերպությունների գործունեությունը: Այսինքն, եթե կան խնդիրներ, ապա պետք է դրանց տրվեն օրենսդրական կարգավորում և ստեղծվեն մեխանիզմներ այդ խնդիրները լուծելու համար:

Սուրեն Քրմոյանը նաև ասաց. «Մենք ունենք բժշկական հաստատություններ, հասարակական կազմակերպություններ, որոնք կոնկրետ խնդիրներ են բարձրացնում: Նման խնդիրները օրենսդրական կարգավորում ստանալու պարագայում հետագայում հարցեր չեն առաջացնի: Օրինակ, մանկական կաթնախառնուրդների մասով խնդիր բարձրացվեց, որ մենք ունենք արգելք, որի հետևանքով կաթնախառնուրդների գովազդը չի գործում, խախտում անեն, թե ոչ՝ որևէ պատասխանատվության չեն ենթարկվում… Այդ իսկ պատճառով, մենք վարչական իրավախախտումների վերաբերյալ օրենսգրքում առաջարկեցինք փոփոխություն, որն ընդունվեց և, այսուհետ, խախտումն առարկայական, ֆինանսական հետևանք կունենա»:

«Առողջապահության նախարարությունը փորձում է գործել համոզման և կանոնակարգման մեթոդով: Բայց անբարեխիղճ վարվելակերպի, տնտեսվարման, անբարեխիղճ մրցակցության դեպքում պետք է ունենալ վերահսկողական գործիքներ և կիրառել պատասխանատվության միջոցներ»,- ընդգծեց նա: