Փաստ ինֆո

Ազգային ժողովի լիագումար նիստում, օրերս ներկայացնելով ՀՀ Վերահսկիչ պալատի 2011 թ.-ի տարեկան հաշվետվությունը, Վերահսկիչ պալատի նախագահ Իշխան Զաքարյանն ընդգծեց, որ թեև գնումների ոլորտում կատարվում են որոշակի բարեփոխումներ, այնուամենայնիվ, Վերահսկիչ պալատի ստուգումների արդյունքում դեռևս բացահայտվում են հակամրցակցային, անարդյունավետ, ոչ թափանցիկ, ոչ հրապարակային և խտրական հիմքերով կազմակերպված գնման գործընթացներ:

Առավել հաճախ արձանագրված խախտումներից նա, մասնավորապես, առանձնացրեց հետևյալները.

- գները որոշվում են ոչ շուկայական մեթոդներով և որպես հետևանք պետական գնումների գները փաստացի «շեղվում» են շուկայական գներից,

- գնումների գործընթացի մասնակիցները գալիս են հակամրցակցային համաձայնության, մրցույթներն անցկացվում են ձևականորեն, արդյունքում` «իրական մրցակցությունը» տեղի է ունենում ոչ թե մրցույթի ժամանակ, այլ` արտամրցութային պայմաններում,

- մրցույթների մասնակիցները հիմնականում հանդիսանում են միջնորդներ, այլ ոչ թե տվյալ ապրանքի ներկրող կամ արտադրող, այսինքն` իրականացվում է  միջնորդավորված գնում, որն իր հերթին հանգեցնում է գների թանկացմանը,

- շինարարական նախագծերի անարժանահավատ տվյալների արդյունքում, նախահաշիվները կազմվում են ոչ իրատեսական գներով,

- հաճախակի խախտվում են կնքված պայմանագրերի պահանջները, արդյունքում` պետության կարիքները լիարժեք չեն բավարարվում,

- գնումների գործընթացում միջոցներն օգտագործվում են ոչ խնայողաբար, և անարդյունավետ:

Մասնավորապես` ՀՀ կառավարությանն առընթեր անշարժ գույքի կադաստրի պետական կոմիտեի «Ճամբարակ» և «Ամասիա» տարածքային ստորաբաժանումների համար 2008 և 2011 թվականներին 14,68 մլն դրամ ընդհանուր գումարով ձեռք բերված վարչական տարածքներն առ այսօր չեն օգտագործվում:

Նշված ստորաբաժանումներն իրենց գործունեությունն իրականացնում են նախապես վարձակալած տարածքներում` վճարելով տարեկան 151,5 հազ. դրամ վարձավճար: Ավելին` վարձակալած տարածքներում կատարել են շուրջ 6,85 մլն դրամի ընթացիկ վերանորոգման աշխատանքներ: Ըստ ՎՊ-ի եզրակացության, գործարքներն ամբողջությամբ դիտվում են անարդյունավետ:

ՎՊ-ի եզրակացության համաձայն, Արարատի մարզի Հովտաշատ համայնքի ճանապարհների ասֆալտապատման աշխատանքները  կատարվել են անորակ, ինչի արդյունքում շուրջ վեց ամիս  անց ճանապարհը քայքայվել է և երթևեկության համար դարձել  դժվարանցանելի: Այս դեպքում ևս ծախսված գումարը դիտվում է որպես անարդյունավետ: ՎՊ-ն, մասնավորապես, արձանագրել է, որ Հովտաշատի գյուղապետարանը  2009թ.-ին «Արկադի Վլադիմիր» ՍՊԸ-ից և 2010թ. «Մասիսի Նորոգշին» ԲԲԸ-ից գնել է համապատասխանաբար` 36 և 33 տոննա ասֆալտբետոնյա խառնուրդ` համայնքի բյուջեից յուրաքանչյուրին վճարելով 1 մլն դրամ:

ՎՊ-ի կողմից ստուգմամբ պարզվել է, որ որպես ասֆալբետոնյա խառնուրդի դուրսգրման փաստաթուղթ ներկայացվել է կատարողական ակտ, որտեղ նշված է` ասֆալտապատման աշխատանքները կատարվել են համայնքի բնակիչների և գյուղապետարանի աշխատակիցների կողմից: Համայնքի ճանապարհների ասֆալտապատման աշխատանքները չեն կատարվել  մասնագիտացված, լիցենզավորված կազմակերպության միջոցով:

Արդյունքում, Հովտաշատ համայնքի ղեկավարության կողմից անտեսվել է «Գնումների մասին» ՀՀ օրենքը, իսկ համայնքի բյուջեից կատարված ծախսը`  1,999 մլն դրամ, աշխատանքների որակի տեսակետից անարդյունավետ է, քանի որ աշխատանքներն իրականցնելով սեփական ուժերով չի ստացվել  պահանջված արդյունքը և կարճ ժամանակ` շուրջ վեց ամիս անց այն քայքայվել և երթևեկության համար դարձել է դժվար անցանելի:

Տարեկան հաշվետվության մեջ բերված հաջորդ օրինակը վերաբերվում է ՀՀ Կրթության և գիտության նախարարության Գիտության պետական կոմիտեում արձանագրված խախտումներին:

Այստեղ առանձին դեպքերում գիտական թեմաների անվանումները, իրականացված հետազոտությունները, ինչպես նաև գիտական հրապարակումները համընկնում են բազային ֆինանսավորմամբ իրականացված ծրագրերի հետ: Այսինքն, ըստ ՎՊ-ի, միևնույն աշխատանքների համար կրկնակի ֆինանսավորում է իրականացվել: Արդյունքում` 2009-2010թթ. կատարվել է շուրջ 32,96 մլն դրամի անարդյունավետ ծախս:

Մասնավորապես` ՀՀ գյուղատնտեսության նախարարության «Տեխնիկական մշակաբույսերի փորձարարական կայան» ՓԲԸ-ում, «Խաղողապտղագինեգործության Գիտական Կենտրոն», «Անասնաբուծության և անասնաբուժության Գիտական Կենտրոն» և ՀՀ ԿԳ նախարարության «Բժշկակենսաբանական միջազգային հետբուհական ուսումնական կենտրոն» ՊՈԱԿ-ներում իրականացված մեկական գիտական թեմաների անվանումները, իրականացված հետազոտությունները, ինչպես նաև գիտական հրապարակումները հիմնականում համընկնում են բազային ֆինանսավորմամբ իրականացված ծրագրերի հետ:

ԱԺ նիստում Ի.Զաքարյանը վստահեցրեց, որ Վերահսկիչ պալատը մշտապես ուշադրության կենտրոնում է պահելու գնումների գործընթացի կարգավարման և համակարգման խնդիրները: