Փաստ ինֆո

Վահան Շիրխանյանի և մյուսների վերաբերյալ այսօրվա դատական նիստում վերջապես սկսվեց դատավարությունը, սակայն դատաքննությունը դեռևս չսկսվեց:

Այսպես, մինչև աշխատանքային օրվա ավարտը տևած նիստում դատարանը հասցրեց քննարկել ու լուծում տալ դատարանին հայտնված մեկ ինքնաբացարկի և գործով երկու փաստաբանի վարույթից հեռացնելու միջնորդություններին: Երկու միջնորդություններն էլ ներկայացվեցին ՀՀ նախկին փոխվարչապետ և Պաշտպանության նախկին փոխնախարար Վահան Շիրխանյանի պաշտպան, փաստաբան Հայկ Ալումյանի կողմից:

Հայկ Ալումյանը դատարանին՝ գործով նախագահող դատավոր Արմեն Բեկթաշյան, ներկայացված, դեռևս հինգ ամիս առաջ կազմած, սակայն դատական նիստերի չկայացման պատճառով չներկայացված ինքնաբացարկի միջնորդության մեջ ներառել էր ինքնաբացարկի նոր հիմքեր ևս: Մասնավորապես, ըստ պաշտպանի, ուղեկցողներն այսօր իր պաշտպանյալին դատարանի դահլիճ առանց սայլակի տեղափոխելու կարգադրություն են ունեցել դատարանից: Պաշտպանը հիշատակեց անցյալ դատական նիստին դատավորի հնչեցրած բառերը՝ ես կպարզեմ, թե ինչո՛ւ է Վահան Շիրխանյանը դատարան բերվել սայլակով: Փաստաբանն ընդգծեց, որ առանց սայլակի բերվելու հետևանքով իր պաշտպանյալը մեջքի շրջանում սաստիկ ցավեր է ունեցել:

Հայկ Ալումյանը դժգոհություն հայտնեց, որ այսօր դատական նիստը երեսուն րոպեով ընդմիջվելուց հետո պաշտպաններին «հարկադրաբար հանել են դահլիճից՝ առանց որևէ տեսանելի պատճառի»: Պաշտպանը դա գնահատեց որպես անհարգալից վերաբերմունք իրենց հանդեպ՝ հավելելով, որ հարգանքը պետք է լինի երկկողմանի:

Որպես ինքնաբացարկի միջնորդության հիմք պաշտպանը նշեց տեսակցությունների ու հեռախոսային խոսակցությունների արգելքի մասին դատարանի որոշումը: Ըստ Հայկ Ալումյանի, այդ որոշումը կոնկրետ դատավոր Արմեն Բեկթաշյանի վարույթում քննվող սույն գործի շահերից չէր բխում, այլ՝ սույն գործից առանձնացված գործի նախաքննության շահերից:

Մեղադրող Արամ Արամյանը առարկեց միջնորդության դեմ՝ նշելով, որ այն անհիմն է:

Դատարանը մերժեց ինքնաբացարկ հայտնելու միջնորդությունը:

Դատարանին ինքնաբացարկ հայտնելու-չհայտնելու հարցում կողմորոշվելու համար ճշտող հարցեր ուներ Վահան Շիրխանյանը: Մասնավորապես՝ Դաշնակցության հետ կապ ունե՞ք հարցին դատավորը պատասխանեց՝ իհարկե ոչ: Նա հայտնեց, որ մասնակցել է արցախյան ազատամարտին առաջին վաշտի կազմում:

Իր հերթին Վահան Շիրխանյանը պարզաբանեց, որ ինքը Դաշնակցության ներկայացուցիչների դեմ 31-ի աղմկահարույց գործի շրջանակում եղել է լիկվիդացիայի ենթակա անձ, այդ իսկ պատճառով է կարևոր այդ հարցը պարզելը:

Մեկ այլ միջնորդությամբ Հայկ Ալումյանը բարձրացրեց գործով ամբաստանյալներ Արթուր Վարդանյանի և Անտոն Դիկրան Թոթոնջյանի պաշտպաններ, փաստաբաններ Լևոն Բաղդասարյանին և Սիրուշ Աղվանյանին վարույթից հեռացնելու հարցը: Որպես հիմք փաստաբանը նշեց, որ երկու հիշյալ անձանց միջև կա շահերի բախում՝ նրանք փոխադարձաբար իրար դեմ ցուցմունքներ են տվել, ուստի չեն կարող իրավաբանական օգնություն ստանալ նույն պաշտպանների կողմից:

Ըստ մեղադրողի, ըստ էության չկան հիմքեր փաստաբաններին վարույթից հեռացնելու համար, քանի որ նրանց պաշտպանյալները՝ երկուսն էլ, չեն ընդունել մեղադրանքը:

Միջնորդությանը միացան պաշտպանների մեծամասնությունը: Մասնավորապես, հնչեց տեսակետ առ այն, որ մեղադրանքը չընդունելը դեռևս չի վկայում այն մասին, որ շահերի բախում չկա:

Դատարանն որոշեց մերժել Հայկ Ալումյանի միջնորդությունը ՀՀ քրեական դատավարության օրենսգրքի 93-րդ հոդվածի (Պաշտպանին ու ներկայացուցչին գործով վարույթից հեռացնելը) 3-րդ մասի հիման վրա, ըստ որի վերոհիշյալ հիմքերով պաշտպանին հեռացնելը թույլատրվում է միայն պաշտպանյալի համաձայնությամբ՝ երկու ամբաստանյալներն էլ առարկել էին միջնորդության դեմ:

Դատարանը ճշտեց նաև գործով ամբաստանյալների անձնական տվյալները՝ 20 ամբաստանյալից ստուգվեցին 19-ի անձնական տվյալները, ընդ որում, դատարանը մոռացավ ճշտել Վահան Շիրխանյանի անձնական տվյալները՝ բացթողումը, սակայն, նկատվեց ու վերացվեց:

Աղբյուր` Փաստինֆո