Փաստ ինֆո

«Ծառուկյան» դաշինքն Ազգային ժողովի փոխնախագահի պաշտոնում կառաջադրի Միքայել Մելքումյանի թեկնածությունը: ԲՀԿ կենտրոնական գրասենյակում Գագիկ Ծառուկյանի հետ հանդիպման ավարտից հետո լրագրողների հետ զրույցում այս մասին հայտնեց ԲՀԿ երիտասարդական կազմակերպության նախագահ, «Ծառուկյան» դաշինքից ընտրված պատգամավոր Վահե Էնֆիաջյանը:

«Գիտեք, որ նոր օրենսդրությամբ ազգային ժողովն ունենալու է երեք փոխնախագահ, որոնցից մեկը պետք է լինի ընդդիմադիր դաշտից:

«Ծառուկյան» դաշինքն ունի իր թեկնածուն առաջարկելու հնարավորությունը, և մենք քննարկել ենք ու առաջադրելու ենք Միքայել Մելքումյանի թեկնածությունը»,- «Արմենպրես»-ի հաղորդմամբ` ասաց Էնֆիաջյանը:

Նա նաև հայտնեց, որ Ազգային ժողովում «Ծառուկյան» դաշինքի խորհրդարանական խմբակցությունը կղեկավարի «Բարգավաճ Հայաստան» կուսակցության առաջնորդ Գագիկ Ծառուկյանը: Խմբակցության քարտուղարի հարց դեռ չի քննարկվել, բայց Վահե Էնֆիաջյանը չբացառեց, որ ինքը կշարունակի լինել խմբակցության քարտուղարը: Էնֆիաջյանն ընդգծեց, որ «Ծառուկյան» դաշինքն Ազգային ժողովում կղեկավարի երեք հանձնաժողով:

Որոշում է կայացվել այդ հանձնաժողովների ղեկավարումը վստահել Նաիրա Զոհրաբյանին, Վարդևան Գրիգորյանին և Վարդան Բոստանջյանին: Թե որ հանձնաժողովները նրանք կղեկավարեն, Վահե Էնֆիաջյանը դժվարացավ պատասխանել` ընդգծելով, որ դրա համար պետք է նախ ձևավորվեն հանձնաժողովները և հասկանալի լինի, թե որ հանձնաժողովներն են տրվելու» Ծառուկյան» դաշինքի խմբակցությանը:

Անդրադառնալով հարցին` կլինեն «Ծառուկյան» դաշինքից ընտրված պատգամավորներ, ովքեր կհրաժարվեն մանդատներից, Էնֆիաջյանը պատասխանեց. «Ամեն ինչ վաղը ձեր աչքերի առաջ կերևա: Ես չեմ կարող այլ պատգամավորների փոխարեն պատասխանել: Այն, ինչ եղել է, մեր ներքին խնդիրներն են: Վստահեցնում եմ, որ որևէ տարակարծություն և տարաձայնություն չկա: Քննարկումն անցել է առողջ ու կառուցողական մթնոլորտում»:

Աղբյուր` Փաստինֆո