Փաստ ինֆո

Հիվանդանոցից օրերս եմ դուրս գրվել, այժմ վերականգնողական փուլում եմ։ Այս մասին «Փաստինֆոյի» հետ զրույցում ասաց գյուղատնտեսության նախկին փոխնախարար Աշոտ Հարությունյանը, ում կարմիր բերետավորները ԱԳՆ-ի շենքի մոտ ծեծի են ենթարկել։ Գործիչը վստահեցրեց՝ կարողանում է քայլել, խոսել ու հաստատ էլի կխոսի։

Անդրադառնալով Նիկոլ Փաշինյանը պնդմանը, թե հերթական ընդդիմադիր շարժումը տապալվեց, որովհետև իշխանության՝ «իրական Հայաստանի» մասին կոնցեպտը ընկալվում է ժողովրդի կողմից՝ Ա. Հարությունյանն արձագանքեց, որ սա այլևս ընդդիմադիր շարժում չէ, այլ ազգային ազատագրական պայքար, որովհետև հիմնականում պայքարը գնում է հայի տեսակի պահպանման, ինքնիշխանության, անկախության և հետագայում իր տեղն ունենալու մասին։

«Պայքար է՝ և ներքին չուզողների և արտաքին թշնամիների դեմ։ Ինչ վերաբերում է իր ասածներին՝ ես դրանք 2018 թ-ից այս կողմ չեմ մեկնաբանում, կարելի է ասել՝ no comment»,- ասաց Ա. Հարությունյանը։

Սոցիոլոգիական հարցումների համաձայն՝ Նիկոլ Փաշինյանի վարած քաղաքականությունն այսօր աջակցում է բնակչության միայն 10 տոկոսը, այդուհանդերձ, բավականաչափ թվով մարդ դուրս չի գալիս փողոց՝ Հարությունյանն ասաց, որ միշտ չէ, որ քանակականը բերում է որակական փոփոխությունների։ «Մեկ կա՝ հարզար արժի, հազար կա՝ մեկ չարժի։ Կյանքը, ժամանակը ցույց կտա։ Եղել են դեպքեր, երբ 50 հոգով փախուստի են դիմել և ունենք մեր հերոսների օրինակները, երբ 4 հոգով կարողացել եմ մի ամբողջ բրիգադ պահել՝ ինքնազոհության գնով։ Միշտ չէ, որ քանակը բերում է որակի»,- ասաց նա։

Աղբյուր` Փաստինֆո