Փաստ ինֆո

«Տավուշը հանուն հայրենիքի» շարժման առաջնորդ Բագրատ Սրբազանը հայտարարել է, որ յուրաքանչյուր հինգշաբթի և երկուշաբթի օրերին կհանդիպեն Սուրբ Աննա եկեղեցու բակում:

«Այս բակն է լինելու այն օջախը, որը սրբազան պայքարի գաղափարախոսության, արժեքների փոփոխության մասին է, որը ավելին է, քան իշխանափոխությունը»,-ասել է Բագրատ Սրբազանը:

«Մեր մտքում, եթե չլինի արժեքների փոփոխություն, ապա հազար անգամ իշխանափոխություն լինի` մեր երկիրը չի կառուցվելու: Այս հարթակը պետք է տրամադրենք ոլորտ առ ոլորտ, շերտ առ շերտ մասնագետներին, որ մասնագիտական վերլուծությամբ ներկայացնեն գալիք Հայաստանի հենքն ու հիմքը: Մեր երկրի անտերության զգացումից պետք է դուրս գանք», - նշել է Սրբազանը:

Նա ընդգծել է, որ պետք է ավարտին հասցնեն այն, ինչ սկսել են, դա անհրաժեշտություն է: «Ոչ թե հնարավոր է, թե հնարավոր չէ, այլ անհրաժեշտությու՞ն է, թե ոչ: Այս երկրորդ հարցադրումը մենք պետք է անենք: Ու եթե որոշել ենք, որ անհրաժեշտություն է, ուրեմն պետք է հասնենք մեր առջև դրված նպատակներին», ասաց Բագրատ Սրբազանը` ավելացնելով. «Ասֆալտի վրայով էլ կքայլենք, գրունտային ճանապարհով էլ կգնանք, ոլորաններով էլ կգնանք, ճահիճների միջով էլ, անձրևների կարկուտների տակով էլ, բայց դա մեր ընտրած ճանապարհն է: Մեր մտքի մեջ կառուցվածքին հասնելու համար շատ տարաբնույթ ուղիներ են գալիս, ես ուրախ եմ, որ մեր շարժումը զտվող շարժում է, որպեսզի կենսունակ դառնա ավելի»:

Աղբյուր` Փաստինֆո