Փաստ ինֆո

Կիրանցում, Ոսկեպարում մինչև հիմա զարմացած են՝ ինչ էր եկել ասելու Նիկոլ Փաշինյանը։ Հիմա ցանկանում եմ, որ այս ամբիոնից ևս մեկ անգամ այդ մարդկանց, որոնք 34 տարի ապրել են սահմանագծում և դարձել Հայաստանի վահանը, ասեք։ Երեք անգամ այս ամբիոնից ասացիք՝ չի երաշխավորվում անվտանգությունը, պատերազմի կանխումը։ Բա եթե չի երաշխավորում, ավելի լա՞վ չէ՝ կռիվը սկսեն 2 կմ-ից, քան՝ 200 մետրից։ Այս հարցը տալիս եմ, որ պատասխանեք ոչ թե ինձ, այլ՝ կիրանցուն, ոսկեպարցուն։ Ինչ է տալու սահմանազատումը։ Այս մասին ԱԺ-ում ասաց Գեղամ Նազարյանը՝ դիմելով Փաշինյանին։

Վերջինս արձագանքեց՝ նշելով, որ ասել է, թե ինչ պետք է անել, որ «երաշխավորվի», բայց այդ «չերաշխավորելուց» մինչև «երաշխավորում» ճանապարհ կա, կա աշխատանք, որը պետք է անել։

«Մեր պրոբլեմների լուծման բանաձևը եղել է հետևյալը՝ բա արևմուտքում ինչ են ասում, բա հարավում, բա հյուսիսում և այլն։ Մենք չենք լուծել մեր խնդիրը։ Եկեք սա արձանագրենք։ Կիրանցը և Ոսկեպարը սահմանին չեն, շփման գծին են։ Պետք է տերմիններն էլ ճիշտ ասել։ Լուրջ և էական հարց է, թե Ադրբեջանն ինչքան է մոտ Կիրանցին, բայց սա 12-րդ դարը չէ, որ 50 մետրի տարբերությունը ինչ-որ բան որոշի, որովհետև նիզակը կամ պարսատիկով քարը այս կողմ ընկնի, կամ այն կողմ ընկնի։ Այսօր ժամանակակից զենքերով տասնյակ կիլոմետրերի վրա թիրախ խոցելու խնդիր չկա։ Հայաստանի բնակչության մեծ մասը լավ չի պատկերացնում դա ինչ տեղանք է»,- ասաց Փաշինյանը՝ նշելով, թե չի ասում 50-ի և 100 մետրի միջև տարբերություն չկա, բայց ինչպես է լուծվում այդ տարբերությունը, այդ հեռավորությունը չի լուծում պրոբլեմը։

Աղբյուր` Փաստինֆո