Փաստ ինֆո

«Օրգանական և դեղագործական քիմիայի գիտատեխնոլոգիական կենտրոնի» աշխատակիցները նախօրեին բողոքի ակցիա էին անում կառավարության մոտ՝ պահանջելով դադարեցնել ինստիտուտի 4 մասնաշենքերի արանքում՝ նախկին ջրավազանի տեղում իրականացվող նորակառույց շենքի շինարարությունը։ Գետնականներն այնուհետև հանդիպում են ունեցել ԿԳՄՍ նախարարի հետ, սակայն այսօր էլ ինստիտուտի ֆեյսբուքյան էջում տեղադրվել են տեսանյութեր, թե ինչպես են ինստիտուսի հարող տարածքում շինարարական աշխատանքները շարունակվում։

Ինստիտուտի փոխտնօրեն Ռոբերտ Հակոբյանը «Փաստինֆոյի» հետ զրույցում ասաց, որ նախարարը հանդիպման ընթացքում ասել էր, թե խնդրին ծանոթ չէ։ «Նախարարը խոստացել է հնարավորինս սեղմ ժամկետներում ծանոթանալ խնդրին։ Հիմա, կգա տեղում խնդրին ծանոթանալու, թե կգնան փաստաթղթերին ծանոթանալու՝ ժամանակը ցույց կտա»,- ասաց փոխտնօրենը։

Նա նշեց, որ այս պահին էլ շինարարական աշխատանքները շարունակվում են. «Շարունակվելը ո՞րն է, խայտառակ վիճակ է։ Ինստիտուտի կենտրոնական շենքը պատմամշակութային արժեքների ցանկում է ներառված, «Պատմամշակութային հուշարձանների պահպանման» ՊՈԱԿ-ից եկել են շենքում գիպսե մարկերներ են դրել, որպեսզի տեսնեն թե շինարարությունն ինչպես է ազդում շենքի սեյսմակայունության վրա։ Փաստն այն է, որ այդ մարկերները արդեն ճաքում են, այսինքն շինարարության արդյունքում անընդհատ երկրաշարժային ֆոն է ստեղծվում, ինչն իր հետևանքը թողել է։ Շենքը քարից է ու, եթե մինչև հիմա այն կարող էր դիմանալ 6 բալանոց երկրաշարժի, ապա այս ամենի հետևանքով 5 բալանոց երկրաշարժից կարող է փլվել»,- նշեց Ռ. Հակոբյանը։

Նա նաև ընդգծեց, որ աղմուկի ու ցնցումների ֆոնին անհնարին է դարձել ինստիտուտում առկա գերզգայուն սարքերի օգտագործումը։ «Բայց, եթե անգամ, հայավարի ասած՝ հարմարվենք ու փորձենք էս ամեն ինչը հանդուրժել, ապա կառուցվող 146 բնակարանով շենքի բնակիչները 3 տարի անց էլ բողոքելու են ինստիտուտի տարածքում փորձարկումների արդյունքում եղած հոտերից։ Բանն այն է, որ նորակառույցը սարքում են ինստիտուտի 4 մասնաշենքերի արանքում, չնայած անհամատեղելիությանը՝ գործն առաջ են տանում, որովհետև բիզնես շահ են հետապնդում։ Կարծում եմ, անում են՝ հեռանկարում ծրագիր ունենալով ինստիտուտը այդտեղից հանել ու լիքը բնակելիներով տարածքը կառուցապատել, այս ծրագիրը ամենաբարձր մակարդակով հովանավորվում է»։

Ըստ նրա՝ նորակառույցի սեփականատերը արդեն ճշտել է ընդհանուր ինստիտուտի տարածքի կադաստրային արժեքը։ «Ասում է՝ թանկ է, թող մի քիչ իջնեն»։

Հակոբյանի դիտարկմամբ, այս գործողությունների հեռանկարում իրենց Ակադեմիական քաղաք տեղափոխելն է։ «Էլի հարց չկա, եթե դա է էդ պետության քաղաքականությունը, որ պետք է Ակադեմիական քաղաք լինի՝ տեղափոխվենք, բայց հիմա այս ամենը դադարեցրեք, հենց մեզ տեղափոխեք՝ ինչ ուզում եք սարքեք»։

Գիտնականն Ակադեմիական քաղաք կառուցելու կոնցեպտը լավն է համարում, բայց մի շատ մեծ «բայց է» տեսնում։

«Եթե նայեք մեր ինստիտուտին, այն կառուցվել է 1954 թ-ին, այս տարածքում են նաև բազմաթիվ այլ ակադեմիական ինստիտուտներ, ինֆորմատիկայի, մոլեկուրյար կենսաբանության, բիոքիմիայի, ֆիզիկայի ինստիտուտները, անօրգանական քիմիայի ինստիտուտ։ Դրանք բոլորը իրարից քայլելով 5 րոպե հեռավորության վրա են։ Դրանք հենց ակադեմիական քաղաքի մոդելով են կառուցված։ Բայց տեսեք՝ մեր շենքը կառուցվել է 1954 -ին, իսկ վերջին շենքը՝ ֆիզիկայի ինստիտուտն էր, որը սարքվել է 1980 թ-ին։ Սա դեռ Խորհրդային միության տարիներին, թե հիմա քանի տարի կտևի՝ դժվար է ասել։ Այսինքն, կոնցեպտը լավն է, հարցն այն է, թե արդյոք այդ ամենը իրականություն կդառնա, թե ոչ։ Մինչդեռ, հիմա արդեն մեր ունեցած ռեսուրսը փոշիացնում են էս կարգի շինարարություններով։

Միաժամանակ, այն մասնագետները, որ հիմա աշխատում են՝ դրանք վերջին մասնագետներն են, եթե այսպես շարունակեն հիասթափությունները, ապա այստեղ այլևս մասնագետ չի մնալու։ Հիմա ուղղակի կառավարությունից քաղաքական որոշում ենք ակնկալում, որպեսզի, ի վերջո, գիտական ներուժը վերջնականապես չոչնչացվի»։

Աղբյուր` Փաստինֆո