Փաստ ինֆո

Վազգեն Սարգսյանի անվան ռազմական ինստիտուտի կուրսանտ Հայկազ Բարսեղյանի սպանության գործի քննությունը Վերաքննիչ քրեական դատարանում մոտենում է ավարտին։

Ինչպես արդեն տեղեկացրել ենք՝ Երևանի ընդհանուր իրավասության դատարանը՝ դատավոր Դավիթ Հարությունյանի նախագահությամբ, 2022թ․ ապրիլի 5-ին հրապարակել է դատավճիռը, որով Բարսեղյանի սպանության մեջ մեղադրվող Գնել Թևոսյանը, Նորիկ Սահակյանը, Վաչե Սահակյանը, Մովսես Ազարյանը դատապարտվել են ազատազրկման ՝ 15 տարի ժամկետով։ Դատարանն ամբաստանյալներին առաջադրված՝ ՀՀ քրեական օրենսգրքի 104-րդ հոդվածի 2-րդ մասի 5-րդ, 7-րդ, 10-րդ կետերով՝ մի խումբ անձանց կողմից՝ խուլիգանական դրդումներով առանձին դաժանությամբ սպանության հատկանիշներով մեղադրանքը վերաորակել է և նրանց մեղավոր ճանաչել ՀՀ ՔՕ 104-րդ հոդվածի 2-րդ մասի 7-րդ կետով՝ մի խումբ անձանց կողմից սպանության համար։ Ամբաստանյալներից Վաչե Սահակյանն առաջադրված մեղադրանքներից մեկով՝ 359-րդ հոդվածի 1-ին մասով, արդարացվել է։ Նշենք, որ մեղադրական ճառով դատախազը պահանջել էր նրանց մեղավոր ճանաչել նախաքննական մարմնի առաջադրած մեղադրանքներով ու դատապարտել ազատազրկման՝ 18-20 տարի ժամկետով, ինչի հետ, տուժող կողմը համաձայն չէր։ Տուժողի իրավահաջորդը պահանջում էր ամբաստանյալներին դատապարտել ցմահ ազատազրկման։ Այժմ վերաքննիչ դատարան ներկայացված բողոքներով տուժող կողմը և դատախազը պահանջում են խստացնել ամբաստանյալների պատիժը, պաշտպանները՝ արդարացնել։

Գործն արդեն ավելի քան մեկ տարի է, ինչ Վերաքննիչ դատարանի վարույթում է, քննությունը մոտենում է ավարտին։ Հայկազ Բարսեղյանի հայրը՝ Արկադի Բարսեղյանը, «Փաստինֆո»-ի հետ զրույցում հայտնեց, որ երեկ կայացած նիստի ընթացքում հրապարակվել է վերջին ամբաստանյալի՝ Մովսես Ազարյանի, պաշտպանի ճառը։

«Ինչպես միշտ՝ այն, ինչ կրկնում են 9 տարի։ Զաքարյանը պնդում է, թե ինքնասպանություն է, մյուսները՝ սպանություն է, բայց իրենք չեն արել, սենյակի տղաներն են իբրև արել։ Նույն բանը։ Երեկ փաստաբանը հայտարարել է, թե իբրև Հայկազն է գրությունը գրել, իբրև փորձագետներն էլ են հաստատել,թե դա Հայկազի գրությունն է, ինչն ամբողջությամբ սուտ է։ Փորձագետները հստակ չէին կարող ասել՝ 50/50 է եղել՝ Մովսեսի գրածն է, թե՝ Հայկազի, բայց Մովսեսը նկարչությունից շատ լավ է եղել, կարղ էր արտատպել։ Այնպիսի սցենարներ են գրել, որ Վերաքննիչում ցույց տան, թե անմեղ են»,- նշեց Բարսեղյանը՝ հավելելով, որ գործի քննությունը կավարտվեր, եթե Արսենյանը ներկա լիներ նիստին, գործի քննությունն, ըստ ամենայնի, կավարտվի հաջորդ նիստին, որը նշանակվել է ապրիլի 3-ին։

Բացի այդ, Գնել Թևոսյանի պաշտպան Արա Զաքարյանը միջնորդություն է ներկայացրել՝ պահանջելով իր պաշտպանյալի նկատմամբ որպես խափանման միջոց կիրառել գրավը՝ 15 մլն դրամի չափով և տնային կալանքը, ինչը մերժվել է։

Նիստի ընթացքում նաև միջադեպ է եղել․նիստին ներկա են եղել երիտասարդ կանայք, շփվել ամբաստանյալների հետ, սանձարձակ վարք ցուցաբերել, ինչը դատարանի կողմից սաստվել է։

Հիշեցնենք, որ կուրսանտի դին հայտնաբերվել է 2015թ. հունվարի 29-ին՝ ՊՆ Վազգեն Սարգսյանի անվան ռազմական ինստիտուտի մարզահրապարակում պտտաձողի վրա պարանով կախված վիճակում: Ըստ գործի նյութերի՝ մի քանի զինծառայողներ բռնել են անկողնում պառկած կուրսանտի ոտքերը և ձեռքերը, փակել բերանը՝ զրկելով օգնություն կանչելու հնարավորությունից, ապա սուր կտրող-ծակող գործիքով կտրել նրա աջ նախաբազկի արմնկափոսի երակը, որին հաջորդել են հարվածներ կուրսանտի կրծքավանդակին և դեմքին, այնուհետև սեղմելով պարանոցը՝ կոտրել են կուրսանտի ենթալեզվային ոսկորը, ապա հագցրել են կուրսանտի հագուստները և տեղափոխել զորամասի մարզահրապարակ, որտեղ և պտտաձողից կախել են այս դաժան գործողությունների արդյունքում շնչահեղձությունից մահացած Հայկազ Բարսեղյանին: Սույն գործով ամբաստանյալի կարգավիճակում են Հայկազ Բարսեղյանի չորս համածառայակիցները՝ Գնել Թևոսյանը, Նորիկ Սահակյանը, Վաչե Սահակյանը, Մովսես Ազարյանը, որոնք մեղադրվում են Հայկազ Բարսեղյանի սպանության համար։ Չորս ամբաստանյալներից բացի մեղադրանք էր առաջադրվել նաև նույն զորամասի կուրսանտ Վարազդատ Սաֆարյանին, որի նկատմամբ դատաքննության ընթացքում քրեական հետապնդումը դադարեցվել է՝ վաղեմության ժամկետներն անցած լինելու հիմքով։

Հեղինակ՝ Իզաբել Սահակյան

Աղբյուր` Փաստինֆո