Փաստ ինֆո

Ամերիկյան Տեխաս նահանգը դարձել է դեմոկրատ նախագահ Ջո Բայդենի և հանրապետականների առճակատման էպիկենտրոնը, ովքեր համաձայն չեն նախագահի միգրացիոն քաղաքականության և Ուկրաինայի նկատմամբ որդեգրած դիրքորոշման հետ։ Սա առաջին տարին չէ, որ նահանգի իշխանությունները՝ նահանգապետ Գրեգ Էբոթի գլխավորությամբ, Մեքսիկայի հետ սահմանին իրականացնում են «Միայնակ աստղ» կոչվող գործողությունը՝ փորձելով սեփական միջոցներով կասեցնելու անօրինական ներգաղթյալների հոսքը, որի կտրուկ աճը Լատինական Ամերիկայից պայմանավորված էր Ջ. Բայդենի կողմից՝ ներգաղթի մասին օրենքի մեղմացմամբ:

Դեռևս 2021թ. սկսված հատուկ գործողության ընթացքում Տեխասի ազգային գվարդիան ձերբակալել էր գրեթե կես միլիոն մարդու, և կանխել 35.000 ներգաղթյալների մուտքը: Ի պատասխան ԱՄՆ Դեմոկրատական կուսակցության քննադատությանը՝ Տեխասի իշխանությունները անօրինական ներգաղթյալներով լցված ավտոբուսներ էին ուղարկել ամենամեծ նահանգներ և քաղաքներ: «Էբոթի ավտոբուսները», ինչպես դրանք անվանել են լրագրողները, հումանիտար ճգնաժամ էին առաջացրել այնպիսի քաղաքներում, ինչպիսիք են Նյու Յորքը, Չիկագոն և Դենվերը:

Արդեն 2024թ. սկզբին կրիտիկական իրավիճակ էր ստեղծվել Միացյալ Նահանգների հարավային սահմանին։ Ջ. Բայդենը Գերագույն դատարանի աջակցությամբ որոշել է վերջնագիր ներկայացնել Տեխաս նահանգին և տեղի իշխանությունների գործողությունները անօրինական որակել։ Դա տեղի է ունեցել այն բանից հետո, երբ հանրապետականները պահանջել են Ուկրաինային օգնելու համար նախատեսված միջոցների մի մասը ուղղել ամերիկյանի սահմանի պաշտպանությանը: 25 նահանգների հանրապետական նահանգապետերը հանդես են եկել Տեխասի օգտին՝ մեղադրելով նախագահին «նահանգներ ներխուժելու մեջ»։

Հունվարի 22-ին Գերագույն դատարանը վճիռ կայացրեց հօգուտ Ջ. Բայդենի՝ հակասահմանադրական որակելով ներգաղթյալներին բռնելու՝ Տեխասի պետական անվտանգության ուժերի գործողությունները: Դատարանը նաև պարտավորեցրել է քանդել սահմանային պատնեշները, որոնք տեղադրվել են նահանգային իշխանությունների հրահանգով, սակայն Տեխասը հրաժարվում է կատարել դատարանի որոշումը։ Տեխասի ազգային գվարդիան փաստացի գրավել է Շելբի քաղաքային զբոսայգին, որը ԱՄՆ Դաշնային սահմանապահ ծառայությունն օգտագործում է որպես անօրինական ներգաղթյալների ժամանակավոր պահման կետ: Սա Վաշինգտոնի կողմից ընկալվել է որպես պետական սահմանի գրավում։

Ճգնաժամի ֆոնին, լրատվամիջոցները սկսեցին գրել Տեխասի, անկախություն ձեռք բերելու հնարավորության մասին, վկայակոչելով 1861թ. նախադեպը, երբ Քաղաքացիական պատերազմի ժամանակ Տեխասը անջատվել էր Ամերիկայի Միացյալ Նահանգներից և միացել Ամերիկայի Համադաշնային նահանգներին։ Այնուամենայնիվ, հարկ է նշել, որ նահանգը չի կարող օրինականորեն անջատվել Միացյալ Նահանգներից՝ մասամբ պայմանավորված 1869թ. դատարանի վճռով, ըստ որի, առանձին նահանգներ չեն կարող ԱՄՆ-ից անջատվելու մասին միակողմանի որոշում կայացնել:

Աղբյուր` Փաստինֆո