Փաստ ինֆո

Ես չգիտեմ, թե ինչ է արել թատրոնի տնօրենը, բայց թատրոնը Սուդուկյանի հետ միավորման որոշման տակ չի ստորագրում։ Այս մասին «Փաստինֆոյի» հետ զրույցում ասաց «Գոյ» թատրոնի գեղարվեստական ղեկավար Արթուր Սահակյանը։

Նշենք, որ ԿԳՄՍ նախարար Ժաննա Անդրեասյանն է այսօր հայտարարել, թե «Գոյ» թատրոնի միավորման փաստաթղթերը ստորագրված են, որոշումն ընդունված է։

Արթուր Սահակյանի փոխանցմամբ՝ թատրոնի ստեղծագործական անձնակազմը թատրոնի նոր տնօրենին հայտնել է անվստահություն, նշանակել է ժամանակավոր կառավարման խորհուրդ, որն էլ այսօր կառավարում է թատրոնը ։

«Իր ստորագրությունը թող գնա ինչ ուզում է անի, կուզի՝ Սուդուկյանի հետ միավորվի, կուզի՝ հարսանիքների միության, իր անձնական նախասիրության խնդիրն է։ Թատրոնից ոչ ոք նման բան չի ստորագրել, իսկ նա մեր թատրոնից չէ, խախտումով նշանակված անձ է։ Թատրոնի տնօրենը իրավունք չունի գործել ի վնաս թատրոնի, մինչդեռ նա գործել է ի վնաս ու դրանով արդեն տնօրեն չէ»,- ասել է Սահակյանը։

Դիտարկմանը, թե ԿԳՄՍ նախարարն ասում է, որ դերասանների բարձրաձայնած խնդիրները և այն, ինչ իրականում կատարվում է՝ տարբեր բաներ են և Սունդուկյան թատրոնի հետ միավորվելը միայն բազմաթիվ նոր հնարավորությունն էր տալու, խաղացանկին չեն միջամտելու՝ Սահակյանը նկատեց, որ այս իշխանությունները նաեւ ասում էին՝ «Արցախը՝ Հայաստան է, և վերջ»։ «Հիմա Հայաստա՞ն է, թե Հայաստան չէ, իրենց ասածն այդ մակարդակի է ու վստահությունն էլ նրանց ասած խոսքին այդ մակարդակի է»։

Ա. Սահակյանն ընդգծել է, որ Սունդուկյանի թատրոնի հետ միավորվելու իմաստը չեն տեսնում։ «Եթե ինքը տեսնում է՝ թող գա միավորվի և այնտեղ ապրի։ Մենք չենք ընդունում այդ առաջարկն ու այդ որոշումը, վաղը Կարմիր բերետներով կարող է մտնեն ու ինչ-որ գործողություններ անեն, դա չի նշանակում, որ մենք միավորվեցինք, իրենց ասածը չի լինելու»,- նշել է Սահակյանը՝ վստահեցնելով, որ դիմակայելու են այս անիրավությանը։ «Իրենք այս տնօրենի միջոցով, որի մականունը «թուրք» է, փորձում են հասնել իրենց ուզածին։ «Թուրքը» փաստաբանի հետ պայմանագիրը խզեց, բայց մենք իրավունք ունե՞նք՝ պաշտպանվելու այդ անիրավությունից, մենք էլ մեր լիազոր իրավաբանին ենք նշանակել, իսկ «թուրքն» այլևս աշխատանքի չի գալիս»,- նշել է թատրոնի գեղարվեստական ղեկավարը։

Նրա փոխանցմամբ՝ երկու թատրոնների միավորման որոշումը, որը դրված էր քննարկման e-draft-ում, ամենաքննարկված նախագիծն է։ «9000 կարծիք ու քվեարկող կա։ Կարծում եք՝ իսկապե՞ս 9000 հոգի քվեարկել է, ո՛չ։ Մեր կարծիքը այդ որոշումն ընդունելի հաշվի չեն առել, բերում են անցած տարվա չնչին թերացումներն այն դեպքում, երբ այս տարի թերացում չկա, ու այդ թերացումների հետևից ընկած իրենց էշն են քշում։ Մենք էլ նույն տրամաբանությունն ունենք, ընդ որում՝ այնպես չէ, որ մենք պոչ ենք խաղացնում։ Մենք համոզմունքով ենք այս թատրոնում, համոզմունքով Սունդուկյանում կամ այլ թատրոնում չենք։ Մենք ենք այս թատրոնի դեմքը, ոչ թե «թուրքը», ուզում եք գաք փակե՞ք, զմրսեք, խնդիր չկա, հենց դա էլ ձեր իրական նպատակն է, փակելը, ոչ թե միավորելը»,- եզրափակել է Արթուր Սահակյանը։

Աղբյուր` Փաստինֆո