Փաստ ինֆո

«Գոյ» թատրոնի ստեղծագործական անձնակազմի հետ հանդիպման ընթացքումԿԳՄՍ նախարար Ժաննա Անդրեսայանը զարմանալու շատ առիթներ է ունեցել։ Նա զարմացած հայացքներ է գցել հանդիպմանը ներկա փոխնախարար Արա Խզմալյանի վրա։ Հավանաբար, նրան ամեն ինչ չէ, որ ճիշտ է զեկուցվել»,- «Փաստինֆո»-ի հետ զրույցում ասել է «Գոյ» թատրոն – լաբորատորիայի գեղարվեստական ղեկավար և ռեժիսոր Արթուր Սահակյանը՝ հավելելով, որ թատրոնի միավորման շուրջ բարձրացված աղմուկից և գերատեսչության ղեկավարների արձագանքից հետո՝ ԿԳՄՍ-ում քար լռություն է տիրում։

Երեկ Գարեգին Նժդեհի արձանի հարևանությամբ «Գոյ» թատրոնը պետք է բեմադրեր համանուն ներկայացումը, որի մասին, դեռևս, ապրիլի 13-ին թատրոնի անձնակազմը տեղեկացրել էր Քաղաքապետարանին և սպասում էր համապատասխան թույլտվությանը, սակայն, Երևանի քաղաքապետարանը չի արտոնել ներկայացման բեմականացումը։ Փոխարենը, ըստ թատրոնի ղեկավարի, ստացել են մի գրությունը, թե հարցը պետք է քննարկվի։ «Բա քննարկեք, ո՞ւմ եք սպասում»,- ասում է թատրոն – լաբորատորիայի գեղարվեստական ղեկավարը ու միաժամանակ նշում՝ բոլորովին չի բացառվում, որ թատրոնի, այսպես կոչված, միավորման գաղափարը ԿԳՄՍ նախարար Ժաննա Անդրեասյանի՝ ռազմական գործիչ Գարեգին Նժդեհի նկատմամբ հայտնի վերաբերմունքով կարող է պայմանավորված լինել, որի պատճառով տիկինը վրեժխնդիր է լինում թատրոնից։

Այդուհանդերձ, «Գարեգին Նժդեհ» ներկայացումը խաղալու համար թատրոնը պատրաստվում է ևս մեկ հայտ ուղարկել Երևանի քաղաքապետարան՝ այս անգամ մայիս ամսվա ընթացքում այն գործչի արձանի հարևանությամբ բեմադրելու նպատակով։

Խոսելով Ժաննա Անդրեասյանի հավակնությունների մասին՝ ռեժիսոր Արթուր Սահակյանն ընդգծում է՝ նա շատ չնչին է, որպեսզի որոշի իր և թատրոնի ճակատագիրը. «Երբ այդ մարդը դարձավ ոլորտի պատասխանատու նախարար, ես կրկին վերադարձա «Գարեգին Նժդեհ» ներկայացման բեմականացմանը։ Դա իմ պատասխանն էր նրան՝ քաջ իմանալով վերջինիս վերաբերմունքն այդ գործչի նկատմամբ։ Թատրոնը մշտապես պետք է ընդդիմադիր դիրքերում լինի, որպեսզի օգտակար լինի տվյալ դեպքում, ներեցեք արտահայտությանս համար, իշխանությանը»,- ասում է ռեժիսորը։

ԿԳՄՍ փոխնախարար Արա Խզմալյանը հայտարարել էր, թե թատրոնը չի փակվում, այլ միավորմամբ «աննախադեպ բարենպաստ պայմաններ են ստեղծվում», ինչին Արթուր Սահակյանը պատասխանում է՝ եթե ամեն ինչ այդքան լավ է, որքան նա է նկարագրում, ապա թատրոնի անձնակազմն ինչո՞ւ, ի՞նչ պատճառաբանությամբ չի ցանկանում անգամ լսել այդ աննախադեպ պայմանների մասին։

ԿԳՄՍ փոխնախարար Խզմալյանը դեմագոգիա էր որակել թատրոնի անձնակազմի, համախոհների և ընկերների բողոքի ակցիան, որով նրանք դեմ էին արտահայվել թատրոնների միավորման նախագծին, իսկ Արթուր Սահակյանն արձագանքում է. «Դուք իրա տեսքը տեսե՞լ եք՝ իր աչքերը, մորուքը, որ ծնված օրից վրան է…Ես էլ ի՞նչ մեկնաբանեմ էդ մարդու ասածները։ Նա վիրավորել է մեզ, դրա համար պատասխան կտա։ Ինչպես Աստվածաշունչն է ասում՝ «Տեր, ների՛ր նրանց, որովհետև չգիտեն, թե ինչ են անում»։

Դո՛ւք չեք մեզ ժամանակ տվողը և մեզ պետք չե՛ն ձեր ուղղորդումները, ասում է Արթուր Սահակյանը զրույցի ընթացքում և հավելում.«Թատրոնը գործարան չէ, որ օպտիմալիզացիա կատարեն, այլ ստեղծագործական միավոր, որին ծառայելու համար են ստեղծվել իշխանությունները։ Կլինի նախարար, թե թաղապետ՝ իշխանությունը ընդունվում է աշխատանքի՝ մեզ ծառայելու համար։ Իրենց ստացած աննախադեպ վճարի դիմաց նրանք պարտավոր են ծառայել տվյալ բնագավառին, ոչ թե քանդել այն, կամ նպաստելու և օգնելու փոխարեն խանգարել աշխատանքային վիճակին։

Ամփոփելով զրույցը, թատրոնի գեղարվեստական ղեկավարն ասում է՝ որևէ մեկը հավանություն չի տվել ԿԳՄՍ-ի առաջարկած պայմաններին։ Թատրոնը չի կարող միաձուլվել կամ փակվել։ Սունդուկյանի թատրոնը մեկ հարկ ներքևում է, եթե իրենք ունենային այդպիսի ցանկություն, ապա վաղուց կմիանային ու կաշխատեին նրանց բեմի վրա։ Մենք ունենք մեր տարածքը, աշխատում ու աշխատելու ենք մեր տարածքում, ասում է Արթուր Սահակյանը. «2015 թվականից ի վեր, աշխատում եմ «Գոյ» թատրոնում։ Արա Խզմալյանը որևէ անգամ այդ թատրոն ոտք չի դրել։ Ինչ վերաբերում է Ժաննա Անդրեասյանին, ես, առհասարակ, նրան առաջին անգամ տեսել եմ վերջերս՝ հեռուսատեսությամբ։ Թե երբևէ նա թատրոն մտած կա՞ ես չգիտեմ, կարծում եմ դժվար»։

Արթուր Սահակյանի հետ զրույցն ամբողջությամբ՝ տեսանյութում։

Աղբյուր` Փաստինֆո