Փաստ ինֆո

ՀՀ ԶՈՒ ԳՇ պետի նախկին տեղակալ Տիրան Խաչատրյանը բերման է ենթարկվել՝ Արամուս գյուղի տարածքում կրակոցներ արձակելու կասկածանքով։ ՀՀ ՆԳՆ-ից «Փաստինֆո»-ի հետ զրույցում հաստատեցին, որ կա ձերբակալված անձ, որը ներկայացվել է վարույթն իրականացնող մարմնին։ ՆԳՆ-ից հայտնում են, որ անձը հայտնաբերվել է Ջրվեժի հյուրանոցներից մեկում։ Անձնական խուզարկությամբ նրա մոտ հայտնաբերվել է CZ-75 տիպի մարտական ատրճանակ` 16 փամփուշտ փամփշտակալում, մեկ փամփուշտ էլ փողում:

Իրավապահները, թեև անուններ չեն նշում, սակայն հրապարակել են  լուսանկար, որով հնարավոր է նույնականացնել, որ խոսքը  Տիրան Խաչատրյանի մասին է։

Պաշտոնական գերատեսչությունից հայտնում են, որ տեղի ունեցած վիճաբանության մասին ահազանգն ստացվել է  հունվարի 11-ին՝ ժամը 23.00-ին։

«ժամը 23.39-ին «Աբովյան» ԲԿ-ից հաղորդում է ստացվել, որ Արամուս գյուղից «աջ դաստակի սալջարդ, պատռած վերք սալի ջլերի վնասումով» ախտորոշմամբ շտապօգնության խումբն իրենց մոտ բուժօգնության է տեղափոխել 1977թ ծնված մի տղամարդու»,- մեզ ավելի վաղ հայտնել էին ՆԳՆ-ից՝ հավելելով, որ հանգամանքները պարզվում են:

Կազմված փաստաթղթերն ուղարկվել են Աբովյանի քննչական բաժին՝ քրեական վարույթ նախաձեռնելու հարցը քննարկելու համար: Դեպքի առթիվ քրեական վարույթ է նախաձեռնվել՝ ՀՀ քրեական օրենսգրքի մի քանի հոդվածներով՝ ՀՀ քրեական օրենսգրքի 297-րդ հոդվածի 2-րդ մասի 1-ին և 3-րդ կետերով (Խուլիգանությունը, որն իրականացվել է մի խումբ անձանց կողմից, տեղեկատվական կամ հաղորդակցական տեխնոլոգիաներն օգտագործելով), 335-րդ հոդվածի 1-ին մասով (Ապօրինի կերպով հրազեն կրելու ) և 167-րդ հոդվածի 2-րդ մասի 8-րդ կետով (զենքի գործադրմամբ առողջությանը միջին ծանրության վնաս պատճառելը)։ Կրակոցների հետևանքով տուժած անձն արդեն տուժող է ճանաչվել։

Հեղինակ՝ Իզաբել Սահակյան

Աղբյուր` Փաստինֆո