Փաստ ինֆո

Մեր թշնամին ռազմավարական նպատակներ ունի և որոշակի մարտավարական խնդիրներ լուծելով գնում է դրան։ Բարձրաձայն հայտարարված է Արևմտյան Ադրբեջանի գաղափարը։ Դա իրենց ռազմավարական նպատակն է, և այն, ինչ տեղի է ունենում՝ դրա իրականացման համար է կազմակերպվում։ «ՓաստԻնֆոյի» եթերում ասել է ՀՀ ՊՆ ԳՇ պետի նախկին առաջին տեղակալ Տիրան Խաչատրյանը։

Բանախոսի դիտարկմամբ, նպատակներից մեկն է բոլոր շարժերը, ճանապարհները, նաև ռազմավարական և մարտավարական առումներով նշանակություն ունեցող դիրքերը գրավելը և դրանք որպես հարթակ օգտագործելը՝ հետագա զարգացումների համար։

Անդրադառնալով թշնամու դիրքավորմանը, բանախոսը նշեց, որ, ռազմական առումով եթե դիտարկենք, պետք է հասկանանք՝ որն է գլխավոր ուղղությունը։ Կարող է լինել 2, 3, այլ ուղղություններ որոնցով կշարունակի զարգացնել, կամ կշեղի ուղղությունը՝ գլխավոր ուղղությամբ իր խնդիրը կատարելու համար։ Պետք է հասկանանք, թե ինչ խնդիր է լուծելու․ ուղղակի կապ է հաստատելու Նախիջևանի հետ, թե՞ Արևմտյան Ադրբեջանի գաղափարն է առաջ տանելու և այդ հարցն է լուծելու։

Բանախոսը կարծում է, որ հիմա թշնամին որոշակի դադարի կարգավիճակում է, քանի որ միջազգային կամ համաշախարհային հանրության հետ էլ խնդիրներ են առաջացել ագրեսիվ պահվածքի, իրականացրած գործողությունների հետ կապված։ «Կարծում եմ, փորձում են մեղմել, հանգստացնել, մոռացության տալ այն, ինչ իրականացվել է, ներառյալ Արցախի հայ բնակչության էթնիկ զտումը, որից հետո իրենց համար կստեղծվի հարմար իրավիճակ և շարունակություն կունենա։ Սա երեկվա, կամ 10 տարվա, կամ 20 տարվա խնդիր չէ։ Սա պատմական խնդիր է, որը, չեմ կարծում եմ, որ Ադրբեջանի մտահաղացումը լինի միայն։ Պետք է հաշվի առնել Թուրքիա և այլ հզոր պետություններ, որոնք ունեն իրենց շահերը»,- ասել է Տ․ Խաչատրյանը։

Անդրադառնալով խաղաղության պայմանագիր կոչվածին, բանախոսը նշեց, որ խաղաղության պայմանագիրը ոչինչ չի նշանակում։ Առանց սահմանազատման և սահմանագծման անհնար է խաղաղության գնալ, բայց դա նույնպես որևէ բան չի նշանակում։ Նույնիսկ քարտեզների առկայությունը ոչինչ չի տալիս, շատ դեպքերում տեղանքում այլ իրավիճակ է ստեղծվում։

Խոսելով GPS-ով սահմանազատում իրականացնելու մասին, բանախոսը նշեց, որ GPS կողմնորոշիչներով, որ իրականացվել է դիրքերի նշում կամ սահմանազատում, ճիշտ գործընթաց չէ։ «Այն տեղերում, որտեղ իրենք հասկացել են, որ GPS-ի նշած տեղում իրենց համար բարենպաստ պայմաններ է ստեղծում՝ ասել են, որ դա իրենց դիրքն է։ Այդպիսի հարցերի շուրջ պետք է նախնական պայմանավորվածություն և համաձայնություններ լինեն, որից հետո իրականացվի աշխատանքները։ Սա եղել է կամայականություններ՝ ուժի պարտադրանքով՝ իրենց, այսպես կոչված, խաղաղ ձևով հարցի լուծման տակ»,- ասել է Տ․ Խաչատրյանը։

Մանրամասները՝ տեսանյութում։

Աղբյուր` Փաստինֆո