Փաստ ինֆո

«Բոլորովին չեմ ցանկանում դետալների մեջ մտնել՝ ինչքանով է ճիշտ կամ սուտ ասում Ադրբեջանի Արտաքին գործոց նախարարը, թե հայկական կողմի վրա բանակցային գործընթացում ԱՄՆ-ի կողմից դիվանագիտական ճնշում է եղել, սակայն, փաստն այն է, որ Ադրբեջանը, լինելով հաղթած կողմ, բնականաբար, հանդես է գալիս ուժեղի դիրքերից։ Դիվանագիտական հարթակներում միջնորդ երկրները՝ կլինի դա ՌԴ-ն, ԱՄՆ-ն կամ այլ երկիր, միշտ առաջնորդվելու են հաղթող երկրի, տվյալ պարագայում՝ Ադրբեջանի շահերով»,- «Փաստինֆո» լրատվականի հետ զրույցում ասում է քաղաքագետ Երվանդ Բոզոյանը։ Նշենք, որ երեկ՝ Բաքվում տեղի ունեցած Ադրբեջանի և Ֆրանսիայի Արտաքին գործոց նախարարների մամլո ասուլիսի ընթացքում, Բայրամովը հայտարարել է, թե ԱՄՆ-ի կողմից հայկական կողմի վրա դիվանագիտական ճնշում է գործադրվել՝ բանակցային գործընթաց վերադառնալու համար։

Քաղաքագետը նկատում է՝ 2020 թ. պատերազմից հետո, մեկ անգամ չէ, որ հրապարակավ հայտնել է՝ չի կարելի թույլ տալ, որպեսզի պարտությունից հետո Ղարաբաղյան հակամարտության խնդիրը տեղափոխվի դիվանագիտական հարթակ. «Հայտնի ճշմարտություն է՝ եթե մի պետություն պարտվում է պատերազմի դաշտում, ապա այդ պարտությունը արձանագրվում է նաև դիվանագիտական հարթակներում։ Հետևաբար, հիմա Հայաստանը պետք է անի հնարավոր ամեն բան, որպեսզի դիվանագիտական հարթակների աշխատանքը հրատապ սառեցնի, որովհետև այնտեղ, բացի հերթական պարտություններից, մեզ ոչինչ, այս իրավիճակում չի սպասվում»։

Երվանդ Բոզոյանն արձանագրում է՝ ակտիվորեն մխրճվելով դիվանագիտական հարթակների մեջ, Նիկոլ Փաշինյանը պատերազմից հետո միայն խայտառակ պարտություններ է բերել Հայաստանի Հանրապետությանը. «Մենք բոլորս ականատես ենք լինում, թե ինչպես է արցախահայությունը հայտնվել Ցեղասպանության վտանգի առաջ, իսկ Արցախի հավանական Ցեղասպանությունից անմիջապես հետո, առաջ է գալու, արդեն, Զանգեզուրի խնդիրը։ Բնականաբար, Նիկոլ Փաշինյանը մեծ վախեր ունի իր կատարած հանցագործությունների հնարավոր հետևանքների առնչությամբ և ամեն կերպ փորձում է դանդաղեցել այդ գործընթացը, սակայն, սա, արդեն, անշրջելի պրոցես է։ Ես անիմաստ են համարում այն թեզերը, թե այս իշխանությունների օրոք հնարավոր կլինի կանգնեցել գահավիժման այս վտանգավոր ընթացքը»,- ասում է քաղաքագետը։

Խոսելով Բայրամովի կողմից՝ երեկ արված մեկ այլ հայտարարության մասին, թե Հակարիի կամրջի վրա հայտնված անցակետը տեղադրվել է հայկական իշխանությունների անմիջական իմացության պայմաններում, քաղաքագետ Երվանդ Բոզոյանը նկատում է՝ իհարկե, ինքը քաջատեղյակ է, որ հայաստանյան օրվա իշխանությունները խաբեբա են և ամեն հարցում են այդպիսին։ Այնուամենայնիվ, ոչ մի կերպ չի կարողանում պատկերացնել, թե ինչպե՞ս կարող էր հայկական իշխանությունն անցակետի տեղադրման թույլտվություն տալ. «Մյուս կողմից, երբ 2021 թվականի նոյեմբերի 6-ին Պրահայում Հայաստանը տվեց իր համաձայնությունը, որպեսզի Արցախը մնա Ադրբեջանի կազմում, ապա դրանից հետո, տրամաբանական էր, որ դրան պետք է հաջորդի Ադրբեջանի կողմից անցակետի տեղադրումը։ Այնպես որ՝ ասել, թե հայկական կողմն իր թույլտվությունը չի տվել, որպեսզի անցակետի տեղադրմամբ Արցախն անջատվի Հայաստանից և հայտնվի տոտալ շրջափակման մեջ, սխալ է։ Հակարիի կամրջին ադրբեջանական անցակետի տեղադրումը եղել է հայկական իշխանությունների և՛ թույլտվությամբ, և՛ իմացությամբ»։

Աղբյուր` Փաստինֆո