Փաստ ինֆո

«Ինչպե՞ս հասկանալ այն թեզավորումը, որ խրոխտ ձայնով ասվում է, թե Լաչինի միջանցքի համար պատասխանատուն Ռուսաստանի Դաշնությունն է, իսկ դրանից առաջ կամ հետո էլ հայտարարվում, թե Ադրբեջանը պատրաստվում է նոր Ցեղասպանության։ Ստացվում է՝ Հայաստանն էլ, ընդամենը, կողքից դիտորդի դերում արձանագրում է, որ, ահա՝ էս մի երկիրը պատասխանատու է մեզ հետ կատարվողի համար, մյուս երկիրն էլ փորձում է ցեղասպանի մեզ, բայց մենք, ինքներս, ոչինչ չենք նախաձեռնում։ Սա, նույնիսկ, արդեն աբսուրդ էլ չէ, այլ՝ անտրամաբանական մտքերի շարան, որոնց անդրադառնալ, արդեն, իմաստազուրկ է դառնում»,- «Փաստինֆո»-ի հետ զրույցում ասում է «Բարգավաճ Հայաստան» կուսակցության քաղխորհրդի անդամ Արման Աբովյանը։

Հիշեցնենք, որ այսօր Կառավարության նիստի ընթացքում Նիկոլ Փաշինյանը հայտարարել է, որ բացի Ռուսաստանի Դաշնությունից՝ Լաչինի միջանցքում որևէ մեկը վերահսկողություն չպետք է իրականացնի, ինչպես նաև հավելել, որ 2020թ-ի նոյեմբերի 9-ից ի վեր, եռակողմ հայտարարության բոլոր կետերն Ադրբեջանի կողմից խախտվել են։

Արման Աբովյանը հարցադրում է հնչեցնում՝ ի՞նչ ենք մենք անելու, երբ իրավիճակն Արցախում դուրս գա վերահսկողությունից, այսինքն՝ անխուսափելիորեն սրվի և լարվի. «Ի՞նչ է՝ հերթական անգամ այս իշխանությունը փորձելու է ստեղծված իրավիճակի պատասխանատվության բեռն այս կամ այն միջազգային կենտրոնի գրպանը գցի՞։ Մինչդեռ, եկեք հասկանանք, թե արդեն ամիսներ շարունակ ինչ է փորձում Ռուսաստանը հասկացնի հայկական կողմի, նրանք էլ տարբերակ չեն թողել, որ չզգուշացնեն՝ հայեր, ձեզ ցանկանում են կոտորել։ Հայաստանը ռուսական խաղաղապահ զորքին բերել է Արցախ, որպեսզի նրանք ապահովեն մեր երկրի անվտանգությունը, բայց ինքը՝ ի դեմս օրվա իշխանության, բացարձակապես ոչ մի ձևով չի խոչընդոտում, որպեսզի իր հայրենակիցների նկատմամբ իրականացվելիք Ցեղասպանությունը տեղի չունենա։ Ուրեմն, ի՞նչ իրավունքով ես դու պահանջներ ներկայացնում մի երկրի խաղաղապահի, ում կողմից բազմիցս հնչեցված սթափության կոչերին, անգամ, չես արձագանքում կամ կանխարգելման գործընթացը գցում ես այս կամ այն աշխարհաքաղաքական կենտրոնի գրպանը»,-ասում է քաղաքական գործիչը։

Բանախոսը նկատում է՝ եթե դու ընդունում ես Ադրբեջանի տարածքային ամբողջականությունը, ընդ որում՝ հայտարարում ես, որ դա անում ես՝ առանց վերապահումների, ասենք, առանց Արցախի ստատուսի քննարկման, ապա, ըստ էության, դու համաձայնությունդ ես տալիս այն փաստին, որ Ադրբեջանն ինչ ուզենա՝ անի։ Ադրբեջանն էլ՝ իր հերթին, ըստ Արման Աբովյանի, որպես իր կամայական գործողությունների անխոչընդոտ իրականացման գրավական, հղում է տալիս հայաստանյան օրվա իշխանությունների կատարած պաշտոնական հայտարարություններին և կարծես, այստեղ որևէ հակասություն չկա՝ դուք թույլ եք տալիս, նրանք իրականացնում են, ասում է նախկին պատգամավորը՝ որակելով իրականությունը խայտառակ նվաստացուցիչ։

Աշխարհաքաղաքական բոլոր խոշոր խաղացողները, այդ թվում՝ Ռուսաստանի Դաշնությունը, Իրանի Իսլամական Հանրապետությունը, ԱՄՆ-ն և Եվրոպան, ըստ բանախոսի, վաղուց հիանալի կերպով հասկացել են, որ իրական վտանգները կանխելու համար Հայաստանի դիրքորոշումը, ստեղծված իրավիճակում, այլևս առ ոչինչ է։ Պարզապես, ոչ մի գերտերություն չի ցանկանում հայերի սպասվելիք ոչնչացման ծանր բեռն ու պատասխանատվությունն իր ուսերին վերցնել, նկատում է Արման Աբովյանը։

Անդրադառնալով կառավարության այսօրվա նիստում Փաշինյանի այն հայտարարությանը, թե 2020 թվականի նոյեմբերի 9-ից ի վեր՝ եռակողմ հայտարարության բոլոր կետերն Ադրբեջանի կողմից խախտվել են, Արման Աբովյանը նկատում է՝ 2020 թվականի նոյեմբերի 9-ի փաստաթղթի՝ Ադրբեջանի կողմից հետևողական ոչնչացման մասին ոչ թե այսօր է պետք բարձրաձայնել, այլև պետք էր խոսել հենց փաստաթղթի ստորագրումից հետո ոչնչով չհիմնավորված Քարվաճառի օկուպացիայի պահից, որը, սակայն, չգիտես ոնց՝ հալած յուղի պես ընդունվեց հայաստանյան օրվա իշխանությունների կողմից. «Ասեմ ավելին՝ մենք մինչ օրս պատշաճ բացատրություն չենք ստացել՝ ինչի՞ հիման վրա Հայաստանի իշխանությունը համաձայնեց Գորիս – Կապան մայրուղու մի հատվածի օկուպացիային։ 2020 թվականից ի վեր, այսպիսի անտրամաբանական գործությունների օրինակներն անթիվ են։ Եվ հիմա, երբ մարդիկ իրենց պատռում են, բացատրելու համար, որ մեզ արյունալի Ցեղասպանություն է սպասվում, ինչպես նաև թշնամի երկիրը պատրաստվում է օկուպացնել արդեն ոչ թե Արցախը, այլև Հայաստանի Հանրապետության ողջ տարածքը, ինչն այսօրինակ իշխանությունների ներկայության պայմաններում, լիովին արդարացի կլինի, ոչ մի բանական արձագանք չի լսվում։ Այսքանից հետո՝ խոսել ինչ -որ երաշխքների կամ, այսպես կոչված, խաղաղության դարաշրջանի մասին, մեղմ ասած, անհեթեթություն է»,- ասում է քաղաքական գործիչը։

Ամփոփելով զրույցը, Արման Աբովյանը ոչ լավատեսական կանխատեսում է կատարում՝ իրավիճակի նման զարգացման պարագայում, երկրի ներսում սպասվելիք անվտանգային և գոյաբանական կոլապսն արտահայտվելու է ՀՀ յուրաքանչյուր քաղաքացու կենցաղում, նույնիսկ նրանց, ովքեր, դեռևս, շարունակում են իրենց պաշտպանության տակ վերցնել օրվա իշխանությունների անթույլատրելի վարքն ու հակազգային գործունեությունը։

Աղբյուր` Փաստինֆո