Փաստ ինֆո

Ավելի քան երեք տարի կալանքի տակ գտնվող՝ Քաղաքաշինության կողմիտեի նախկին նախագահ Վահագն Վերմիշյանի համար դատախազը 15 տարվա ազատազրկում է պահանջում, պաշտպանը՝ արդարացում։

Այս իշխանությունների կառավարման տարիներին կոռուպցիոն ենթադրյալ դրսևորումների վերաբերյալ առաջին քրեական գործերից մեկով դատաքննությունն ավարտվում է, կողմերն արդեն հանդես են եկել ճառերով։ Մեղադրյալներն ութն են՝ Վահագն Վերմիշյանը, Վազգեն Պողոսյանը, Գագիկ Գալստյանը, Ջոն Ֆարխոյանը, Ռազմիկ Խուրշուդյանը, Մուշեղ Ավետիսյանը, Էլեն Գրիգորյանը և Վրեժ Ասրյանը, որոնց համար մեղադրանքի կողմն ազատազրկում է, իսկ պաշտպանության կողմը՝ արդարացում՝ արձանագրելով, որ կաշառք ստանալու և կաշառք տալու իրադարձություն տեղի չի ունեցել։

Վահագն Վերմիշյանի պաշտպան Ալեքսանդր Կոչուբաևը «Փաստինֆո»-ի հետ զրույցում արձանագրեց, որ հրապարակային դատաքննության ընթացքում կարողացել են ամբողջությամբ հերքել և ապացուցել, որ կաշառքի դրվագ տեղի չի ունեցել։ Ըստ մեղադրանքի՝ անձին «Վաստակավոր շինարարի» կոչում տալու համար Վահագն Վերմիշյանն ստացել է 5000 ԱՄՆ դոլար կաշառք, մինչդեռ, պաշտպանը դա աբսուրդային է համարում։

«Կաշառք տալն իրենից ներկայացնում է՝ պաշտոնատար անձին տալ գումար կամ գույքային որևէ վարձատրություն, կամ խոստում, կամ որևէ առավելության խոստում կամ իրականության մեջ դա տալը, որ անձն իր լիազորությունների մեջ գտնվող որևէ գործողություն կատարի կամ չկատարի։ Ասում են՝ Վերմիշյանը գումար է ստացել, որ անձին «Վաստակավոր շինարարի» կոչման համար առաջարկ ներկայացնի վարչապետին։ Դա, չգիտեմ, գործընկերների՝ մեղադրանքի կողմից՝ կամ անգրագիտության, կամ Վահագն Վերմիշյանին կալանավորելու շատ մեծ ցանկությանը վերագրենք»,-նշեց փաստաբանը։

Այսպես, Վերմիշյանը անձին վաստակավոր շինարարի կոչում շնորհելու առաջարկություն վարչապետին ներկայացրել է 2019թ. հոկտեմբերի 17-ին, ինչից մեկ ամիս անց ՝ ակադեմիկոս Ջիմ Թորոսյանի մեդալները նվիրել է թանգարանին, որոնք Վահագն Վերմիշյանը գնել էր ավելի վաղ։

Փաստաբանի փոխանցմամբ, ճարտարապետները իմանալով Վերմիշյանի այլ քայլի մասին, որոշել դրամական փոխհատուցում տալ՝ դա համարելով իրենց պատվի հարցը։ Դա տեղի է ունեցել արդեն նոյեմբեր ամսին։

Այսինքն՝ նախաքննական մարմինը Վերմիշյանին մեղադրում է հոկտեմբերին կատարած գործողության համար նոյեմբերին ենթադրյալ կաշառք ստանալու մեջ։ «Չկա որևէ ապացույց, որ Վահագն Վերմիշյանը, օրինակ, հոկտեմբեր ամսին պահանջել կամ ստացել է կաշառք։ Սա իրավական անգրագիտություն է։ Բացառապես անգրագետ մասնագետը կարող էր նմանատիպ որակում տար, որովհետև կաշառքը՝ ի սկզբանե գումար տալն է, որ պաշտոնյան որևէ լիազորություն կիրառի։ Այսինքն՝ հոդվածը «նիսիայով» չի աշխատում, այսինքն, պաշտոնյան որևէ գործողություն անի, հետո՝ գումար տան։ Նման կարգավիճակում գործում է կաշառքի խոստումը, բայց տվյալ դեպքում մենք կաշառքի խոստման վերաբերյալ փաստարկ ևս չունենք»,- ասել է փաստաբանը։

Կոչուբաևը համոզված է, որ հետապնդումներն ունեն բացառապես քաղաքական մոտիվներ, Վերմիշյանը ՀՀ «ամենահին» քաղաքական բանտարկյալն է, նրա նկատմամբ հետապնդումը բավարարում է քաղաքական հետապնդման չափանիշներին։

«Ճիշտ է, գործը քննում է Մնացական Մարտիրոսյանը, բայց որպես պաշտպան համոզված եմ և հավատում եմ արդարադատությանը, հավատում եմ, որ Մնացական Մարտիրոսյանն այս անգամ կունենա անհրաժեշտ անկախություն և կկայացնի արդարացման դատավճիռ։ Անգամ իր համար էին տեսանելի այն դատավարական աղաղակող խախտումները, որ եղել են գործի նյութերում, ի սկզբանե ԱԱԾ-ն իրավասություն չի ունեցել քննելու գործը, օրենքի խախտմամբ ձեռք են բերել գաղտնալսումներ, որոնք անթույլատրելի ապացույցներ են։

Նման պայմաններում անգամ Մնացական Մարտիրոսյանը չի կարող կայացնել մեղադրական դատավճիռ, համոզված եմ, որ Վահագն Վերմիշյանը դատական նիստերի դահլիճից ազատ կարձակվի»,- նշեց փաստաբանը։

Հեղինակ՝ Իզաբել Սահակյան

Աղբյուր` Փաստինֆո