Փաստ ինֆո

Գործում է Ջունգլիի օրենքը ՝ իրենք ուժեղ են, ինչ կուզեն, ինչքան կուզեն, կվերցնեն, ինչ իրավական ակտեր, ինչ իրավական հիմք,- «Փաստինֆո»-ի հետ զրույցում ասել է Կիրանցի բնակիչ Անդրանիկ Նազարյանը՝ անդրադառնալով Հայաստանի ու Ադրբեջանի միջեւ երեկ ստորագրված սահմանազատմանը։

Նրա փոխանցմամբ՝ այս պահին հավաքվել են գյուղամեջ՝ քննարկելու իրենց հետագա անելիքները։

Հիշեցնենք, որ երեկ տեղի է ունեցել Հայաստանի ու Ադրբեջանի փոխվարչապետերի հանդիպումը, որի ժամանակ համաձայնեցրել են անմիջականորեն Բաղանիս (ՀՀ) – Բաղանիս Այրում (ԱՀ), Ոսկեպար (ՀՀ) – Աշաղը Ասկիպարա (ԱՀ), Կիրանց (ՀՀ) – Խեյրումլի (ԱՀ) և Բերքաբեր (ՀՀ) – Կըզըլ Հաջիլի (ԱՀ) բնակավայրերի միջև սահմանագծի հատվածների համատեղ կազմված Արձանագրություն-նկարագրությունը՝ Խորհրդային Միության փլուզման պահի դրությամբ գոյություն ունեցող իրավաբանորեն հիմնավորված միջհանրապետական սահմանին համապատասխանեցնելու նպատակով, ու ստորագրել համապատասխան արձանագրությունը։

Նույն օրը ՀՀ վարչապետի աշխատակազմը պարզաբանում է տարածել՝ հավաստելով, որ սահմանագծման համար հիմք են ընդունվել 1976թ. քարտեզները եւ առաջիկա 8-9 օրերի ընթացքում արդեն սահմանապահներն են կանգնելու՝ համաձայնեցված քարեզի վրա, իսկ Կիրանցի առավել զգայուն հատվածում` ավելի ուշ, որովհետեւ այդտեղ որոշ մանրամասներ ենթակա են լրացուցիչ ճշգրտման: Այսինքն՝ կառավարությունը փաստել է, որ այդ հատվածում եւս սահմանագծում անելու են, բայց մի փոքր ավելի ուշ։

Անդրանիկ Նազարյանը նշեց, որ իրենց համար նորություն չէր 1976 թվականի քարտեզը սահմանազատման համար հիմք ընդունելը։

«Իրականում նորություն չի եղել։Մեր գյուղում վերջին հանդիպման ժամանակ, երբ Փաշինյանն ասաց, որ հիմքում դնում են 76թ.-ի քարտեզները, ես հարցրեցի՝ բա ինչո՞ւ 1980-ականների քարտեզները չեն դնում։ Հիշեցրի, որ դելիմիտացիա և դեմարկացիա է արվել, Մոսկվայից էլ եկել, հաստատել են, երկու երկրների կառավարությունները ստորագրել են և ունեցել ենք սահման։Ես նրան այդ օրը հիշեցրի , որ այդ սահմանազատման և սահմանագծման հանձնաժողովի նախագահն էլ Վլադիրմր Մովսիսյանն էր։ Գյուղում հիշողներ էլ կան , որ լուրջ խնդիրներով ու պատմություններով էր արվել դա, բայց հաստատվել էր Հայաստանի ու Ադրբեջանի այն ժամանակվա կառավարությունների կողմից։ Երբ Մովսիսյանի ազգանունը լսեց, տարօրինակ հայացքով ինձ նայեց ու ասաց, որ իրավական ուժ ունեն ռազմական գլխավոր շտաբի 1976 թի -ի քարտեզները, որտեղ, ըստ իրեն, կամուրջը մտնում էր դրա մեջ, բայց Կիրանց գյուղի հատվածի մասին խոսք չկար։Հիմա այդ քարտեզների մասին են խոսում»,- ասաց Կիրանցի բնակիչն ու տարակուսեց. «Ես ուղղակի չեմ հասկանում, բառախա՞ղ են խաղում, ինչ են անում, եթե նոր օրենքը, նոր քարտեզը ընդունվում է

Սովետական Միության օրենքներով, բնականաբար հինը պետք է չեղարկվի չէ՞, այդպես չէ՞, ուղղակի դա չեմ հասկանում, նոր օրենքն ընդունեն ու հետո ասեն իրավական ուժ չունի, հինը հիմք ընդունեն։Այստեղ արդեն դառնում է այն տարբերակը, որ երկակի ստանդարտներ են կիրառում։Ոնց ձեռք ա տալիս մեր հակառակորդին , այդ քարտեզներն են վերցնում, դրանից հետո էլ ի՞նչ խոսենք, ի՞նչ իրավական ակտեր, ի՞նչ իրավական հիմք։Այստեղ գործում է Ջունգլիի օրենքը ՝ իրենք ուժեղ են, ինչ կուզեն, ինչքան կուզեն, կվերցնեն»,- ասաց Անդրանիկ Նազարյանը։

Նա ասաց, որ Կիրանցում լավ հասկանում են, որ առավել խնդրահարույց հատվածը թողել են՝ լարվածությունը թուլացնելու համար։

Աղբյուր` Փաստինֆո