Փաստ ինֆո

Անցյալ ամիս Ֆրանսիայի ԱԺ նախագահ Յաել Բրաուն-Պիվեի այցը Հայաստան նշանավորվեց նրանով, որ ՀՀ-ի և հայերի հանդեպ բարեկամաբար տրամադրված երկրի բարձրաստիճան պաշտոնյան շատ հստակ ուղերձ հղեց մեր ժողովրդին առ այն, որ հայերը պիտի դադարեն պատրանքներով ապրել, սպասելով և հուսալով, թե՝ ուր որ է՝ Արևմուտքի օգնությունը գալու է։

Այսօր նույնպիսի մի ուղերձ հայությանն ուղղեց Հայաստան ժամանած՝ Խորվաթիայի արտաքին գործերի նախարար Գորդան Գրլիչ Ռադման։ Ընդ որում, վերջինս անդրադարձավ ԵՄ դիտորդական առաքելության Հայաստան գալուն, դերին և նշանակությանը, բաց տեքստով ասելով՝

«Եվրամիության դիտորդական առաքելությունը չի երաշխավորի որևէ ստատուս-քվո»։ Ավելին, նա շեշտեց, որ «հակամարտությունը պետք է կարգավորվի բանակցությամբ»՝ այդպիսով բանակցային դաշտ տեղափոխելով սին հույսեր փայփայող հայկական կողմին, որոնք ԵՄ առաքելության Հայաստան գալը հանց երկնքից թափվող մանանա են դիտարկում։

Բնականաբար, եվրոպական պաշտոնյան պիտի կարևորեր ԵՄ դիտորդական առաքելության ներկայությունը, այն օգտակար համարեր, և այլն, և այլն, բայց դե, արևմտյան աշխարհի քանի ներկայացուցիչ գա ու գնա և մեր մելեռանդ հավատացյալներին հասկացնի, որ եղբայր, դու՛ք պիտի լինեք ձեր սահմանների պաշտպանը, դուք պիտի լինեք լինելու ձեր անվտանգության երաշխավորը։ Այսօրինակ զգուշացումներ ժամանակ առ ժամանակ էլի են եղել արևմտյան պետությունների կողմից։ ԱՄՆ դեսպաններն են ասել, բրիտանացիները դեռ էն գլխից են զգուշացրել․․․

Այսինքն, նախկինում եթե դեռ հավատավոր էր հայ ժողովուրդը, քանզի այն ժամանակ արևմտյան երկրներն էլ այլ էին, հիմա պերմանենտ սեփական մաշկի վրա զգացածի և հիասթափվածի դերը այլևս պրիմիտիվիզմի է հասնում։ Ի վերջո, ընդհանուր շահերով առանձնացող պետություններ են մեզ շրջապատում ու այս բանն էլ պարբերաբար հասկացրել են Հայաստանին։

Եվ հետաքրքիրը, գիտեք, ո՞րն է՝ Խորվաթիայի արտգործնախարարը Հայաստանին հորդորում է ռեալ գնահատել իրավիճակը և նկատի ունենալով ադրբեջանի գործոնը՝ հույս չդնել ԵՄ դիտորդական առաքելության վրա, իսկ սրա ֆոնին ՀՀ վարչապետի աթոռն զբաղեցնող փաշինյանական խոսքը ԱԺ-ում որպես աբսուրդի թատրոնի դերասանի տեքստ է ընկալվում։ Ասում է սույնը, թե՝ «ԵՄ դիտորդական առաքելությունը ժամանում է Հայաստան՝ դիտարկելու ռուսական զորքերի հետ ՀՀ-ն պատրաստվու՞մ է Ադրբեջանի դեմ հարձակվել, թե՞՝ ոչ»։ Այսինքն, ազարբայջանի դեսպանը Հայաստանում նորից ու կրկին քայլ առաջ ապահովագրում է իր սիրեցյալ պետությանը։

Խորվաթիայի ԱԳ նախարարի այցը Ծիծեռնակաբերդի հուշահամալիր, հարգանքի տուրք մատուցելը Հայոց ցեղասպանության զոհերի հիշատակին, ծաղկեպսակ դնելը հուշահամալիրի մոտ, ծաղիկներ խոնարհելը Ցեղասպանության զոհերի հիշատակը հավերժացնող անմար կրակի մոտ, ապա՝ Հայոց ցեղասպանության թանգարան այցը և թանգարանի հուշամատյանում գրառում անելը որքան էլ պրոցեդուրային լինեն, շատ պարզորոշ հասկացնում են Ցեղասպանության ժխտողականության նոտաներով քաղաքականություն վարող ներկա իշխանություններին, հիշեք, թե՝ ում հետ գործ ունեք։

Այսինքն, հետո չասեք․․․

Աղբյուր` Փաստինֆո