Փաստ ինֆո

Ո՛չ Արայիկ Հարությունյանը, ո՛չ Ռուբեն Վարդանյանը չեն հայտնել իրենց տարաձայնությունների մասին, բայց կարծում եմ, որ Ռուբեն Վարդանյանի հրաժարականի լուրերը կապված են իրենց դիրքորոշումների տարբերության հետ. առանց կրակ ծուխ չի լինում: Այս մասին «Փաստինֆո»-ի հետ զրույցում ասաց քաղաքագետ Գարիկ Քեռյանը՝ մեկնաբանելով վերջին օրերին Արցախում տեղի ունեցող ներքաղաքական զարգացումները:

«2-ն էլ չեն հայտարարել այդ մասին, չհաստատված տեղեկություններ են, նաև չի նշվում թե կոնկրետ ինչի շուրջ է եղել արցախյան չծանաչված պետության կառավարող էլիտաների միջև տարաձայնությունները: Փորձագիտական շրջանակներում ինչ էլ որ ասեն, պետք է հենվեն որոշակի ասեկոսեների վրա: Ուստի ներքաղաքական գործընթացը կարելի է համարել կամ չբացահայտված կամ երևի կեղծ»,- ասաց նա:

Քեռյանի խոսքով՝ Ռուբեն Վարդանյանի՝ Արցախ մեկնելու հետ կապված վարկածները շատ են. դրանցից մեկի համաձայն՝ վերջինս Ռուսաստանի կողմից գործուղված անձ է և, քանի որ Հայաստանի գործող իշխանությունները ՀՀ արտաքին քաղաքական վեկտորը փորձում են շեղել դեպի Արևմուտք, իսկ ԱՀ նախագահ Արայիկ Հարությունյանը Նիկոլ Փաշինյանի հետ առավել մոտ քաղաքական դիրքորոշումներ ունի, հնարավոր է, որ այդ տեղեկությունները Արցախի ղեկավարությանը և Հայաստանի իշխանություններին ուղղված կանխարգելիչ քայլեր են: Ըստ քաղաքագետի՝ սրանք, իհարկե, ենթադրություններ են, քանի որ որոշ վերլուծաբանների կարծիքով՝ Ռուբեն Վարդանյանին ավելի շատ կարելի է դիտարկել որպես արևմտամետ, քան ռուսամետ գործիչ:

«Նրանք դեռևս որոշակի գործողություններ չեն արել, որ մենք դրանք վերլուծելով կարողանանք ինչ-որ բան բացահայտել: Ասենք, Արցախի իշխանությունները չեն դիմել Ռուսաստանին ինչ-որ հարցով կամ ինչ-որ պաշտոնական տեսակետ չեն արտահայտել ներկա պայմաններում հակամարտության լուծման իրենց տեսլականի մասին:

Ռուբեն Վարդանյանն էլ, ըստ էության, ոչինչ չի հրապարակել, թե ինչպես են իրենք տեսնում հակամարտության լուծումը և հարաբերությունների կարգավորումը՝ բացառությամբ դեկլարատիվ հայտարարությունների»,- նշեց Քեռյանը:

Մեր այն հարցին, թե ինչպես է մեկնաբանում ՄԻԵԴ–ում Ադրբեջանի` Հայաստանի դեմ միջանկյալ միջոց կիրառելու պահանջը մերժելու որոշումը, Քեռյանը հրաժարվեց մանրամասներից խոսել, միայն ասաց, որ բոլոր միջազգային կառույցներն այսօր չեն գործում՝ ՄԱԿ-ից սկսած, Մարդու իրավունքների եվրոպական դատարանով վերջացրած:

«Անունը կա, ամանումը՝ չկա. միջազգային իրավունքը, որով պետք է առաջնորդվեին պետությունները, որոնց մեջ կա տարածքային ամբողջականության, սահմանի անխախտելիության 1000 ու մի բան, 25 տարի առաջ արդեն խախտվել է սիրիական, իրաքյան, լիբիական իրադարձություններով, հիմա դա շարունակվում է նաև Աֆղանստանում, Ուկրաինայում: Այնպես որ խոսել և հույս դնել նման փուչիկ կառույցների որոշումների վրա, որ դրանք կարող են իրավիճակ փոխել, դա ֆանտաստիկայի ժանրից է»,- եզրափակեց քաղաքագետը:

Նշենք, որ ՄԻԵԴ-ը դեկտեմբերի 21-ին ՄԻԵԴ–ը բավարարել էր Հայաստանի պահանջը և պարտավորեցրել Ադրբեջանին ապահովել միջանցքով Հայաստանում բժշկական օգնություն ստանալու կարիք ունեցող ծանր հիվանդների տեղաշարժը, ինչպես նաև ճանապարհին անապաստան մնացած կամ ապրուստի միջոցների կարիք ունեցող անձանց անվտանգ տեղաշարժը։

2022 թվականի դեկտեմբերի 22-ին Ադրբեջանը դիմել էր Եվրոպական դատարան՝ պահանջելով վերացնել միջանկյալ միջոց կիրառելու որոշումն ու միջանկյալ միջոցներ կիրառել Հայաստանի դեմ:

Երեկ՝ ՀՀ ներկայացուցչի գրասենյակը հաղորդագրություն էր տարածել, որում նշվում է, որ Եվրոպական դատարանը, հաշվի առնելով կողմերի ներկայացրած փաստարկները, մերժել է Ադրբեջանի պահանջներն ամբողջությամբ՝ 2022 թվականի դեկտեմբերի 21-ի որոշումը թողնելով ուժի մեջ:

Ադրբեջանն, ինչպես ակնկալվում էր, չի կատարել ՄԻԵԴ որոշումն ու 2023 թվականի հունվարի 16-ին հայտնի դարձավ, որ ՄԻԵԴ-ը հրատապ ծանուցում է ուղարկել ԵԽ ՆԿ՝ վերահսկելու Լաչինի միջանցքը ապաշրջափակելու մասին իր որոշումն Ադրբեջանի կողմից կատարելը։ կատարումը Ադրբեջանի կողմից վերահսկելու նպատակով։

Աղբյուր` Փաստինֆո