Փաստ ինֆո

Մենք կասկածներ ունենք, որ Ադրբեջանը փորձում է այսպես ասած փոխադարձաբար տարածքային ամբողջականությունը ճանաչելու մասին դրույթ ստորագրել, որտեղ տարածք ֆիքսված չի լինի, իսկ ստորագրելուց հետո դեմարկացիայի և դելիմիտացիայի գործընթացում կսկսի նոր տարածքների նկատմամբ նկրտումներ ներկայացնել։ Այս մասին այսօր՝ հունվարի 10-ին մամուլի ասուլիսում հայտարարեց ՀՀ վարչապետ Նիկոլ Փաշինյանը։

Նա չբացառեց, որ այդ պայմաններով խաղաղության պայմանագիր ստորագրելուց հետո հարևան երկրի ղեկավարը հայտարարի, որ Սյունիքը կամ ՀՀ մեկ այլ տարածք, օրինակ, Հայաստանի տարածքային ամբողջականության մեջ չի մտնում։

Փաշինյանի խոսքով՝ Ադրբեջանն իր հերթին մտահոգություն ունի, որ ՀՀ-ն, խաղաղության փաստաթուղթն ստորագրելով, կապահովի, կերեաշխավորի 29.800 քառ. կմ –անոց տարածքը, իսկ հետագայում, նորանոր շարժումներ և գործընթացներ սկսելով, Ադրբեջանի պետականության և տարածքային ամբողջականության քայքայման գործընթաց կսկսի։

«Մենք մտածում ենք, որ իրենք ուզում են վերացնել մեր պետությունը, իրենք էլ մտածում են, որ մենք,հիմա գուցե այնքան ուժեղ չենք, որ վերացնենք իրենց պետությունը, բայց մենք էլ մտածում ենք՝ ուժեղանանք, վերացնենք իրենց պետությունը։ Մեր մտավախությունները հայելային են, որովհետև չկա վստահություն, որովհետև կողմերը մտածում են, որ դիմացինը ուզում է խաղաղություն՝ դիմացինի շահերի, անկախության և պետականության հաշվին։ Ֆունդամենտալ խնդիրն այստեղ է; Դա տեքստային չէ, դա պատմական, սոցիալհոգեբանական տիրույթում է։ Եթե այս խնդիրները չլուծվեն, ոչ մի բան չի լինելու»,- ասաց ՀՀ վարչապետը։

Ըստ Փաշինյանի՝ որքան էլ իրենք պնդում են, որ ԼՂ խնդիրը Հայաստանի համար ոչ թե տարածքի, այլ մարդու իրավունքների հարց է, միևնույն է՝ ադրբեջանական կողմն այդպես չի ընկալում։ Ավելին, երբ Բաքվում լսում են ԼՂ հիմնախնդիր, նույնիսկ ԼՂ հայության իրավունքներ և անվտանգություն արտահայտությունները, միանգամից մտածում են, որ հայերը դրանով տարածքային նկրտումներ են ձևավորում Ադրբեջանի նկատմամբ։

ՀՀ վարչապետի դիտարկմամբ՝ հաղորդակցության ընթացքում եկել են այն եզրահանգման, որ Ադրբեջանն ուզում է այնպես անել, որ հայությունն ուղղակի դուրս գա ԼՂ-ից, այսինքն՝ Ղարաբաղն առանց հայերի ստանալ։

«Դա ամբողջ պատմությունը չէ, որ այս նպատակին հասնելուց հետո Ադրբեջանը կարող է բարձրացնել ադրբեջանցիների վերադարձը Հայաստանի Հանրապետություն։ Ադրբեջանը, դեռ 2017-ից համարում է, որ ԼՂ հարցը իր ներքին հարցն է; Այդ խոսույթի մեջ իրականում ոչ մի նորություն չկա»,- ընդգծեց Փաշինյանը՝ վկայակոչելով Սերժ Սարգսյանի՝ 2017 թվականի հուլիսին տված հարցազրույցը, որում ՀՀ երրորդ նախագահը, կողմերի դիրքորոշումները ներկայացնելիս, այդ մասին արդեն խոսել է։

Մանրամասները՝ տեսանյութում։

Աղբյուր` Փաստինֆո