Փաստ ինֆո

Ի՞նչ է ուզում Ադրբեջանը. կա տեսակետ, որ Ադրբեջանն ուզում է վերացնել հայկական պետությունը։ Նման տեսակետ ունեցողների հայտարարությունները մերկապարանոց համարվել չեն կարող, որովհետև դուք տեսնում եք, թե ինչ խոսույթ է զարգացնում Ադրբեջանը, մասնավորապես, ինչ-որ կազմակերպություններ, նախաձեռնություններ, ինչ-որ «պատմական փաստեր» են ներկայացնում; Այս մասին այսօր՝ հունվարի 10-ին հրավիրած մամուլի ասուլիսում ասաց վարչապետ Նիկոլ Փաշինյանը՝ պատասխանելով լրագրողի այն հարցին, թե ինչ է ուզում Ադրբեջանը;

«Կան մարդիկ, փորձագետներ, որոնք ասում են, որ Ադրբեջանն այդպես վարվում է, որովհետև մտածում է, որ Հայաստանի հայերն էլ իրենց հերթին ուզում են վերացնել Ադրբեջան պետությունը։ Մենք տեսնում ենք, որ Ադրբեջանը շարունակաբար, այդ թվում կրթական համակարգում ատելության խոսք է զարգացնում։ Նրանք էլ իրենց հերթին մեր գործողություններում և պատմության մեջ են տեսնում որոշակի այդպիսի գործողություններ»,- նշեց ՀՀ վարչապետը։

Նրա խոսքով՝ եռակողմ հայտարարության տիրույթում, երբ խնդիր է դրվում կարգավորել հարաբերությունները և խաղաղություն հաստատել, առաջին հերթին խոսք է բացվում երկու երկրների՝ միմյանց տարածքային ամբողջականությունը ճանաչելու վերաբերյալ, որին կողմերն, ըստ էության դրական են արձագանքում։

«Հաջորդ պահին հնչում է երկրորդ հարցը՝ իսկ ի՞նչ նկատի ունի Հայաստանը Ադրբեջանի տարածքային ամբողջականություն ասելով, ի՞նչ նկատի ունի Ադրբեջանը Հայաստանի տարածքային ամբողջականություն ասելով։ Սա է թեմաներից մեկը։ Ուզում եմ, ո ր ֆիքսենք այն աղբյուրները, որտեղից այդ ջրերը հոսում են և մենք այս հարցերին պետք է վերաբերվենք այս մեծ ընդհանուր պատկերի մեջ և այս հարցի պատասխաններից է կախված ընդհանրապես ապագան»,- նկատեց վարչապետը;
Անդրադառնալով Լաչինի միջանցքի հետ կապված իրադրությանը, Փաշինյանը ևս մեկ անգամ հիշատակեց 2020 թվականի նոյեմբերի 9-ի եռակողմ փաստաթուղթը՝ ընդգծելով, որ խնդրի լուծումը թղթի վրա սևով սպիտակին գրված է;

«Մեր տեսլականն այն է, որ միջազգայնորեն ստանձնած պարտավորությունները պետք է կատարվեն»,- ասաց ՀՀ գործադիր մարմնի ղեկավարը։

Նիկոլ Փաշինյանը վերահաստատեց նախկինում հնչեցրած իր տեսակետը. Լաչինի միջանցքի փակումը նաև սադրանք է, որն ունի երկու նպատակ՝ կոտրել ԼՂ մեր հայրենակիցների՝ սեփական տանը, սեփական հայրենիքում ապրելու կամքը և Հայաստանին ներքաշել ավելի մեծ սադրանքի մեջ։

ՀՀ վարչապետի դիտարկմամբ այն միջազգային արձագանքը, որ կա Լաչինի միջանցքի փակման շուրջ, պետք է փորձել կապիտալիզացնենլ հենց ԼՂ-ում, հենց Լաչինի միջանցքում, որտեղ, իհարկե, շատ կարևոր է ՌԴ դիրքորոշումը և ՌԴ խաղաղապահ զորախմբի գործունեությունը։

«Իմ վերջին հարցազրույցներից մեկում՝Լաչինի միջանցքի շրջափակումից առաջ, ասել եմ՝ եթե պարզվի, որ ՌԴ-ն այդ պարտավորությունները չի կարողանում կատարել, օբյեկտիվ կամ սուբյեկտիվ պատճառներով, որպես անվտանգության խորհրդի մշտական անդամ, ինքը. պետք է դիմի ՄԱԿ անվտանգության խորհրդին կամ ռուսական խաղաղապահ զորախմբի միջազգային մադատով օժտելու՝ նոր, բազմազդ խաղաղապահ առաքելություն ուղարկելու ԼՂ, որը կապահովի արդեն իսկ նոյեմբերի 9-ի եռակողմ հայտարարությամբ հաստատված անվտանգային ճարտարապետությունը»,- նշեց ՀՀ վարչապետը։

Աղբյուր` Փաստինֆո