Փաստ ինֆո

Կառավարության քաղաքական կոռուպցիայի հերթական դեպքն է բացահայտվել, այս անգամ հիմնական գործող անձը փոխնախարար է, որը հովանավորի դեր է ստանձնել քրեական հեղինակության համար՝ նպատակ ունենալով ապահովել մրցույթում նրա հաղթանակը։

Ինչպես «Փաստինֆո»-ի հետ զրույցում հայտնեց փաստաբան Վահան Հովհաննիսյանը՝ Տարածքային կառավարման և ենթակառուցվածքների փոխնախարար Արմեն Սիմոնյանի վերաբերյալ հանցագործության մասին հաղորդման հիման վրա Հակակոռուպցիոն կոմիտեում նախաձեռնվել է քրեական վարույթ՝ պաշտոնեական դիրքը չարաշահելու հատկանիշներով։

Իսկ գործը վերաբերում է ուղեւորափոխադրման ոլորտին։ 2014թ.-ից սկսած Երևան-Արմավիր-Երևան կանոնավոր ուղևորափոխադրումներն իրականացրել է «Գալակտիկա տրանս սերվիս» ընկերությունը, որը , ըստ փաստաբան Վահան Հովհաննիսյանի, միակ լիցենզավորված ՍՊԸ-ն է, սակայն 2018թ սկսած «Ընկերներ տրանս» ՍՊԸ-ն, որը պատկանում է քրեական հեղինակություն համարվող «Կիլիկիայի Բոգո» մականունով հայտնի Ռուբեն Կոստանյանը, սկսել է անօրինաբար ուղևորափոխադրումներ իրականացնել՝ առանց լիցենզիայի, առանց համապատասխան տրանսպորտային միջոցների, առանց հարկեր վճարելու։ Նշենք, որ նա բավական մտերիմ հարաբերություններ ունի Սամվել Ալեքսանյանի հետ ու անցնում է մի շարք աղմկահարույց գործերով։

«2018թ.-ից հետո օրական մոտ 1 մլն դրամի վնաս է պատճառվում այդ ապօրինի փոխադրումների հետևանքով՝ իմ վստահորդին՝ «Գալակտիկա տրանս սերվիս» ՍՊԸ-ին։ 2021թ անցկացվում է հերթական մրցույթը, թե ով պետք է «գիծը շահի», որին մասնակցում է միայն իմ վստահորդը, սակայն «Ընկերներ տրանս» ՍՊԸ-ի մասնակցությունն ապահովելու համար Արմեն Սիմոնյանի կողմից մրցույթի կանոնները՝ արդեն հրապարակումից հետո՝ ենթարկվում են փոփոխության, ինչը օրենքի կոպտագույն խախտում է։ Մասնավորապես, «Ընկերներ տրանս»-ին մրցույթի մասնակցելը թույլատրելու համար, մրցույթի կանոնները փոխում են՝ նշելով, որ միջքաղաքային ուղևորափոխադրումները կարող են իրականացվել 15 տեղանոց ավտոմեքենաներով՝ նախապես նշված 30 տեղանոց ավտոբուսների փոխարեն, քանի որ նշված միջոցներ «Ընկերներ տրանս»-ը չունի »,- նշեց Վահան Հովհաննիսյանը՝ հավելելով, որ այդ փոփոխություններից հետո նշված ՍՊԸ-ն մասնակցում է մրցույթին, թեև, նույնիսկ Արմեն Սիմոնյանի հովանավորության պայմաններում էր ակնհայտ, որ նշված ընկերությունը չի կարող մասնակցել և ըստ այդմ հայտը մերժվել է։

«Հաղթում է «Գալակտիկա տրանս սերվիս» ՍՊԸ-ն, բայց դրանից հետո էլ ՍՊԸ-ի տնօրենին Արմեն Սիմոնյանը կանչում է իր աշխատասենյակ, ասում, որ անկախ այն հանգամանքից, որ մրցույթում հաղթել է, թույլ չի տալու՝ ուղևորափոխադրումներ իրականացնեն»,- ասաց փաստաբանը՝ հավելելով, որ հայցադիմում է ներկայացվել, որը բավարարվել է. «Պարզվել է, որ իրականում մրցույթի կանոնները խախտվել են ՏԿԵ նախարարության կողմից, մեր վստահորդը կրկին շահել է մրցույթը՝ 10 տարի ժամկետով հանդիսանալով միակ ուղևորափոխադրողը»։

Փաստաբանի փոխանցմամբ՝ իր վստահորդի կողմից բազմաթիվ հարցումներ են արվել ՏԿԵ նախարարությանը, սակայն որևէ արձագանք չի եղել, գրություններին չեն պատասխանում։ Հովհաննիսյանը մտահոգություն հայտնեց առ այն, որ ամեն ինչ արվում է, որ «Գալակտիկա տրանս սերվիս» ՍՊԸ-ն դուրս մղվի ոլորտից և ոլորտ մտնի, ուղևորափոխադրումներ սկսի իրականացնել «Բոգո»-ի ղեկավարած կազմակերպությունը։

«Օրերս հանձնարարվել է և «Գալակտիկա տրանս սերվիս» ՍՊԸ-ի բոլոր ավտոմեքենաները տարվել են տուգանային հրապարակ, Արմավիր-Երևան ուղևորափոխադրում չի իրականացվում, քանի որ միակ ուղևորափոխադրողի բոլոր ավտոմեքենաները տարվել են տուգանային հրապարակ, որպեսզի ուղևորափոխադրումներ իրականացնի «Ընկերներ տրանս» ՍՊԸ-ն»,- ասաց Հովհաննիսյանը։

Փաստաբանի խոսքով՝ հանցագործության մասին հաղորդում են ներկայացրել նաեւ նշված ՍՊԸ-ի կողմից ապօրինի ձեռնարկատիրական գործունեություն իրականացնելու համար, ինչի առթիվ քրեական վարույթ է նախաձեռնվել, սակայն նույնիսկ վարույթի պայմաններում նույն ՍՊԸ-ն շարունակում է ուղևորափոխադրումներ իրականացնել։

«Այսինքն՝ «Բոգո» կոչված քրեական հեղինակությունը փաստորեն այնքան հեղինակություն ունի, փոխնախարարն այնքան կշիռ ունի, որ կարող է նույնիսկ քրեական վարույթի պայմաններում թույլ տալ՝ ուղևորափոխադրումներ իրականացնել»,- նշեց Վահան Հովհաննիսյանը՝ արձանագրելով, որ պետք է քայլեր ձեռնարկվեն՝ կանխարգելելու համար, սակայն ոչինչ չի արվում։ Ապօրինի ձեռնարկատիրության վերաբերյալ քրեական վարույթի շրջանակներում «Գալակտիկա տրանս սերվիս» ՍՊԸ-ն տուժող է ճանաչվել, պարզվել է, որ պատճառվել է ավելի քան 1 մլրդ դրամի չափով վնաս։

Բացի այդ, այժմ, ՏԿԵ փոխնախարարի կողմից հովանավորչության, սակարկության կանոնները խախտելու համար Հակակոռուպցիոն կոմիտեում նախաձեռնվել է քրեական վարույթ՝ երկու դրվագով սակարկության կանոնները խախտելու համար, մեկ դրվագով՝ պաշտոնեական դիրքը չարաշահելու համար։ Այս վարույթի շրջանակներում ընկերությունը դեռևս տուժող չի ճանաչվել։ Փաստաբանը հայտնեց, որ միջնորդել են՝ նաև այդ վարույթի շրջանակներում ընկերությանը տուժող ճանաչել, ինչպես նաև՝ միացնել ապօրինի ձեռնարկատիրության և փոխնախարարի գործողությունների վերաբերյալ նախաձեռնված վարույթները։

Հեղինակ՝ Իզաբել Սահակյան

Աղբյուր` Փաստինֆո