Փաստ ինֆո

Երեկ համացանցում տարածվեց տեսանյութ, թե ինչպես է թշնամին գնդակահարում գերեվարված հայ զինծառայողներին։«Փաստինֆո»-ի հետ զրույցում ԱԺ նախկին պատգամավոր Նաիրա Զոհրաբյանը նշեց, որ իր տեղեկություններով, դեպքը, 90% ճշգրտությամբ, տեղի է ունեցել Իշխանասարի հատվածում, թեև շատ փորձագետներ առաջին հայացքից պնդում էին, որ այն տեղի է ունեցել Ջերմուկի հատվածում: Ադրբեջանական վայրագությունների հետևանքով զոհված հայ զինվորների մարմինների նույնականացումը գրեթե ավարտված է, սակայն մանրամասներ դեռևս հայտնի չեն.

Շատ ծնողներ են ինձ զանգում և ասում, որ իրենց որդում ճանաչել են տեսանյութում, կամ էլ ենթադրում են, որ իրենց որդին է, բայց դիակները չեն ստացել: ԳՇ ներկայացուցիչները նույնպես ասացին, որ կան հատվածներ,որտեղ մենք ունենք դիակներ, բայց ադրբեջանական կողմը թույլ չի տալիս վերցնել մարմինները, այսինքն՝ մենք չենք կարող բացառել, որ զոհերը թիվը շատ ավելի մեծ է, քան հրապարակած 207-ը»,-ասաց Զոհրաբյանը:

ԱԺ նախկին պատգամավորը շեշտեց՝ սա Ադրբեջանի կողմից իրականացված ռազմական հանցագործություն է, իսկ հայկական կողմը, խաղաղություն մուրալու փոխարեն, պետք է անի ամեն ինչ՝ ռազմական հանցագործներին պատժելու համար.

«Նիկոլ Փաշինյանը, թվիթթերում լացելու փոխարեն, պետք է հստակ քայլեր ձեռնարկեր՝ պատասխանատուներին պատժելու համար: Միջադեպի հաջորդ օրը Արարատ Միրզոյանը հանդիպում է Բայրամովի հետ՝ քննարկելու խաղաղության պայմանագրի տեքստը, նման ռազմական հանցագործությունից հետո գոնե, որպես քայլ, հայկական կողմը պետք է հրաժարվեր այդ հանդիպումից, բայց իրենք կրկին վազում են խաղաղության մուրալու: Անգամ նման հրապարակային գնդակահարությունից հետո՝ հասարակության մի մեծ հատված շարունակում է մնալ անտարբեր, անհաղորդ, սրանք փաստեր են, որոնք գուժում են հանրային լուրջ կոլապսի և պետականության ավարտի մասին»,-ասաց Զոհրաբյանը:

Ինչ վերաբերում է միջազգային հանրության արձագանքին՝ Նաիրա Զոհրաբյանը նկատում է.

«Միջազգային հանրությունը սիրում է միայն ժամերով ժողովներ անել: Մենք տեսանք կոնգրեսականների, որոնք արձագանքեցին, առաջիկայում Եվրոպառլամենտի մի քանի պատգամավորներ ևս աղմուկ կբարձրացնեն, բայց այս ամենն առ ոչինչ է, եթե քո իշխանությունը գնում է ռազմական հանցագործի հետ հանդիպման: Երբ միջազգային հանրությանը պահանջներ ես ներկայացնում, իրենց անմիջապես հակադարձում են՝այո, ճիշտ եք, բայց ձեր վարչապետը գնում է ռազմական հանցագործի հետ խաղաղության պայմանագիր կնքելու, այնպես որ, առաջին «պրետենզիաները» ուղղեք ձեր իշխանությանը, նոր միջազային հանրությանը, այստեղ իրենք իրավացի են»,-ասաց նա:

Հարավային Կովկասի և Վրաստանում ճգնաժամի հարցերով Եվրամիության հատուկ ներկայացուցիչ Տոյվո Կլաարը, ադրբեջանական վայրագություններին հստակ գնահատական տալու փոխարեն, թվիթերյան իր էջում գրել էր թե ադրբեջանցիների դեմ կատարված ենթադրյալ «ռազմական հանցագործությունների մասին» տեսանյութ է ստացել, որը պետք է ուսումնասիրվի:

Նաիրա Զոհրաբյանի խոսքով՝ի տարբերություն հայկական կողմի՝ Ադրբեջանը շատ հետևողական է նաև տեղեկատվական դաշտում և ֆեյք վիդեոները հավաքել են ու դրանցով ողողել են միջազգային կառույցները:

Աղբյուր` Փաստինֆո