Փաստ ինֆո

Հայաստանը, Ֆրանսիան ու ԱՄՆ-ն ուզում են պահպանել ԵԱՀԿ ՄԽ ձևաչափը, բայց ակնկալիքները տարբեր են. Արևմուտքը ոչ թե ուզում է այսպիսով մեր շահերը պաշտպանել, այլ չի ուզում անմասն մնալ մեր տարածաշրջանում տեղի ունեցող կարևոր հարցերից։ Եթե նրանք հասնեն հաջողության և Մինսկի խումբը վերականգնվի, հասկանալի է, որ իրենց շահերն են պաշտպանելու, ոչ թե Արցախի բարձր կարգավիճակի համար են պայքարելու, նրանք կարգավիճակի հետ կապված առևտուր են անելու Ադրբեջանի հետ: «Փաստինֆո»-ի հետ զրույցում նման դիտարկում է արել քաղաքական վերլուծաբան Արմեն Բաղդասարյանը:

Փորձագետի խոսքով՝ պետք չէ պատրանքներ ունենալ, որ ԱՄՆ-ն և ԵՄ-ն միանշանակ հայանպաստ քայլերի են դիմելու, նրանք միայն իրենց շահերն են պաշտպանելու, իսկ այս պահին իրենց համար կարևոր է Ադրբեջանը, մասնավորապես, ԵՄ-ն Ադրբեջանից էներգետիկ ակնկալիքներ ունի.

«Խնդիրն այն է, որ երբ նրանք ակտիվանում են, նրանք գալիս են ոչ թե հայկական շահը պաշտպանելու, այլ պատերազմի արդյունքներից ու նոր ստատուս քվոյից իրենք իրենց բաժին շահը ստանալու, սա նոր ստեղծված իրավիճակից առավելագույն դիվիդենտներ շահելու պայքար է, ցավոք սրտի, սա լինում է պարտված կողմի՝ մեր հաշվին»,-ասաց փորձագետը:
Միևնույն ժամանակ նա նկատում է, որ փոխարենը ռուսական, թուրքական և ադրբեջանական կողմերը համաձայն չեն Մինսկի խմբի ակտիվացմանը, քանի որ համարում են, որ շատ ավելի ակտուալ է նոր ֆորմատը՝ 3+3:

«Խնդիրը միայն ֆորմատը չէ, խնդիրը Արցախի կարգավիճակի հարցն է: Մինսկի խումբն ի սկզբանե պետք է Արցախի կարգավիճակի հարցը որոշեր, իսկ հիմա Ադրբեջանը հայտարարում է, որ նման հարց ընդհանրապես գոյություն չունի, մինչդեռ Մինսկի խմբի երկրները, այդ թվում՝ Ռուսաստանը, ասում են, որ նման հարց կա, այս առումով մեր դիրքորոշումը, բարեբախտաբար, Մինսկի խմբի երկրների դիրքորոշմանը համահունչ է, հետևաբար, ձեռնտու կլիներ, որ Մինսկի խումբն ակտիվանար, բայց այս առումով լուրջ աշխատանք պետք է »,-ասաց Արմեն Բաղդասարյանը:

Զրուցակիցն ընդգծում է բանակցային գործընթացում հայկական կողմը պետք է ձգտի տարանջատել հայ-ադրբեջանական հարաբերությունները Արցախի կարգավիճակի հարցից և փորձի հասնել նրան, որ հստակ ֆիքսվի՝ Արցախի կարգավիճակը պետք է որոշվի և միևնույն ժամանակ փորձի հարաբերությունները կարգավորել Ադրբեջանի հետ, որպեսզի կանխի նոր պատերազմի վտանգը:

Նշենք, որ ստեղծված անվտանգային մի շարք մարտահրավերների ու Արցախի 3 բնակավայրերը հանձնելու ֆոնին՝ ՀՀ իշխանությունները մեկը մյուսի հետևից նոր աբսուրդային նախաձեռնություններով են հանդես գալիս, օրինակ՝ 60 հազարի դոլարի դիմաց բանակից ազատվելու նախագիծը։ Տպավորություն է, որ այսպիսով փորձում են հասարակության ուշադրությունը շեղել կարևոր հարցերից:

Արմեն Բաղդասարյանը չի կիսում տեսակետը, որ սա արվում է հասարակության ուշարությունը շեղելու համար, բայց կարծում է, որ իշխանություններն այսպիսով փորձում են բանակի նկատմամբ հասարակության վստահությունը նվազեցնել.

«Հերթական պետական կարևորագույն ինստիտուտն են քայքայում ու թուլացնում, եթե նախագիծն ընդւնվի, ստացվելու է, որ այլևս բոլոր քաղաքացիները հավասար չեն օրենքի առաջ և բանակում ծառայությունը ներկայացվում է որպես պատիժ, որից խուսափելու համար կարելի է գրավ վճարել, սա իր մեջ վտանգավոր տարրեր է պարունակում թե սոցիալական,թե անվտանգային և թե բարոյահոգեբանական առումով»,-ասաց զրուցակիցը:

Աղբյուր` Փաստինֆո