Փաստ ինֆո

Ապարանում տեղի ունեցածը շատ ցավալի է, ես զերծ կմնամ տվյալ դեպքի մանրամասներին անդրադառնալուց, ամբողջը կթողնեմ Քննչական համակարգին, հիմա քննչական գործողություններ են ընթանում, եկեք ո՛չ խոչընդոտենք , ո՛չ էլ նպաստենք դրան: Այս մասին լրագրողների հետ զրույցում հայտարարել է ՔՊ-ական պատգամավոր Մաթևոս Ասատրյանը:

Հիշեցնենք, վերջերս Ապարանում միջադեպ էր տեղի ունեցել, ըստ մամուլում լուրեր շրջանառվող լուրերի՝ ՔՊ պատգամավոր Մաթևոս Ասատրյանի եղբայրը և ՔՊ Արագածոտնի փոխմարզպետ Էդգար Փարվանյանի հորեղբոր որդին վիճաբանել են ապարանցի մի խումբ երիտասարդների հետ, ինչի հետեւանքով վերոնշյալ մարդիկ կալաշնիկովով կրակել են երիտասարդների վրա, կան զոհեր: Դեպքը տեղի էր ունեցել Ապարանի Նիգավան միջնահատվածում։

ՔՊ-ական պատգամավորը, սակայն, հերքեց իր եղբոր մասնակցությունը այս միջադեպին, նա նաև հայտարարեց, որ իր եղբայրը նախաքննական մարմին չի հրավիրվել։

«Ես շարունակում եմ, պնդել, որ ո՛չ ես, ո՛չ էլ իմ հարազատներից որևէ մեկը կապ չունեն տվյալ դեպքի հետ»,-ասաց նա: ՔՊ-ական պատգամավորը, սակայն, չհերքեց, որ դեպքին նախորդած օրն իր եղբայրը եղել է գազալցակայանի տարածքում, որտեղ վիճաբանություն էր ծագել երկու կողմերի միջև.

«Այո, իմ եղբայրը եղել է գազալցակայանում, դա գազալցակայան է, մեզանից ցանկացածը կարող էր լինել այնտեղ։ Դրա տեսագրությունն էլ կա, քննչական մարմինը, եթե հարկ համարի, կհրապարակի,ու դուք կտեսնեք, որ այնտեղ ծեծկռտուք չի եղել, առավել ևս` իմ եղբոր մասնակցությամբ»,– ասաց Մաթևոս Ասատրյանը:

«Ինքս խորապես շահագրգռված եմ, որ այս ամենը բացահայտվի, ինչով կարողանալու, օգնելու եմ, որ ողջ ճշմարտությունը բացահայտվի, ինձ համար ցավալի է սա, ես իմ տանը նստած, լկտիաբար ինձ ներքաշում են նմանատիպ հարցերի մեջ, դա սարքեցին քաղաքական հարց, հետո փորձեցին այլ մեկնաբանություններով շեղել թեման»,-հավելեց նա:

Աղբյուր` Փաստինֆո