Փաստ ինֆո

Ազատամարտիկ, «Արաբո» ջոկատի հրամանատար Մանվել Եղիազարյանին կարելի է պարբերաբար հանդիպել ընդդիմության կազմակերպած հավաքներին։ «Փաստինֆո» լրատվականի հետ զրույցում վերջինս նշում է՝ վիրավորված է բոլոր իշխանություններից, որ եղել են Հայաստանում, բոլորից անխտիր ցավ և հարված է ստացել, սակայն այս օրերին մի կողմ է դրել բոլոր վիրավորանքներն ու տարաձայնությունները և Ազատության, ինչպես նաև՝ Ֆրանսիայի հրապարկում է, որովհետև մեր Հայրենիքն ահավոր վտանգի մեջ է հայտնվել. «Այցելում եմ Ազատության հրապարակ, որտեղ մարտական ընկերներս են՝ Պավլիկը Մանուկյան, «Սև հովազ»-ի տղաներն են այնտեղ։

Գիտեք, տարիներ շարունակ մեզ հալածել և վիրավորել են և միայն այն միտքը, որ հիմա նորից այդ մարդիկ ոտքի են ելել ու պատրաստվում են գալ իշխանության, ինձ, մեղմ ասած, դուրս չի գալիս, բայց ես մի կողմ եմ դրել բոլոր իշխանությունների կատարած անթույլատրելի և սխալ արարքներն ու եկել եմ հրապարակ՝ միանալու պայքարին։ Հակառակ պարագայում, մենք ստիպված ենք լինելու կռվենք թուրքի դեմ, որովհետև մեր Հայրենիքը թրքացման ճանապարհով են տանում, թուրքը մտել է երկիր ու մեր Հայրենիքում իր պայմաններն է թելադրում մեզ»,- ասում է ազատամարտիկը։

Վերջինս հարց է տալիս՝ ինչո՞ւ է երբեմն հրապարակում ոստիկանն ավելի շատ, քան ցուցարարը և պատասխանում սեփական հարցադրմանը՝ որովհետև մարդիկ հիասթափված են բոլոր իշխանություններից. «Բոլորին խաբել են, թալանել, իրենց խնամի, ծանոթ, բարեկամներին են միայն առաջ մղել։ Այս է պատճառը, որ մարդիկ մասսայաբար դուրս չեն գալիս փողոց, նրանց աչքը վախեցած է, որ կրկին իշխանության կգան նախկիններն ու նորից կկատարվի այն նույնն, ինչ եղել է տարիներ շարունակ։ Ես ինքս բոլոր իշխանությունների օրոք ընդդիմադիր կեցվածք եմ ունեցել, միշտ քննադատել եմ նրանք։ Այդ է պատճառը, որ մինչ այսօր ոչինչ չունեմ, ընդամենը մի ավտոտնակ, որը, սակայն, տարիներ շարունակ, նույնիսկ, չեմ էլ կարողանում սեփականաշնորհեմ, չի ստացվում, թույլ չեն տալիս։ Սակայն, նորից եմ կրկնում՝ ժողովրդին պետք է ոտքի հանել, պետք է դուրս բերել երկիրն այս վիճակից, որից հետո, նոր միայն, հին, վիճահարույց հարցեր քննարկել, որովհետև Հայրենիքի շահն այսօր առաջին տեղում է»։

Միաժամանակ նա նկատեց՝ իր ասած ոչ մի խոսքից երբեք հետ չի կանգնել և հիմա էլ՝ հետ չի կանգնում, ոչինչ չի մոռացել, որ անարդար կերպով հասցվել է իրեն և իր ընտանիքին, սակայն այսօր այդ օրը չէ՝ օրակարգում վտանգված Հայրենիքի հարցն է։

Աղբյուր` Փաստինֆո