Փաստ ինֆո

Ազատության հրապարակի ձախ հատվածում պրովոկացիա տեղի ունեցավ, մեզ մեծ քանակությամբ ոստիկաններ սկսեցին մոտենալ, պարոն գեներալ Արթուր Վանեցյանը փորձեց կանխել նրանց մոտեցումը, որ հասկանա, թե ինչ է կատարվում։ Ոստիկանները բիրտ ուժի կիրառմամբ առաջ եկան ու սկսեցին մեր տղաներից առևանգել։ Այս մասին «Փաստինֆո»-ի թղթակցի հետ զրույցում պատմեց Ազատության հրապարակում ակցիա իրականացնող քաղաքացիներից Սամվել Թադևոսյանը՝ որպես ականատես մանրամասներ ներկայացնելով Ազատության հրապարակում տեղի ունեցած դեպքից։

Ինչպես արդեն տեղեկացրել ենք՝ այսօր Ազատության հրապարակում իրավիճակը լարված էր։ Ոստիկանները բռնի ուժ գործադրելով բերման են ենթարկել խաղաղ ակցիա իրականացնող քաղաքացիներին, այդ թվում՝ կանանց: Իրավիճակը փորձել է հանդարտեցնել «Հայրենիք» կուսակցության ղեկավար Արթուր Վանեցյանը, սակայն ոստիկանները նրա նկատմամբ նույնպես անհամաչափ ուժ են կիրառել: Արթուր Վանեցյանը ոստիկաններին և քաղաքացիներին հանդարտության կոչ է արել և հորդորել իրավիճակը չլարել:

Ակցիայի մասնակից Սամվել Թադևոսյանը, որն այդ պահին ևս Ազատության հրապարակում էր, մեզ հետ զրույցում ասաց, որ ոստիկաններն անհամաչափ, բիրտ, շատ դաժան կերպով էին գործում։

«Ձախ հատվածում պրովոկացիա տեղի ունեցավ։ Ալեհեր ծերունի կա, որ այստեղ հեծանիվ է քշում, չգիտեմ ինչու՝ այդ մարդուն ուզում էին բերման ենթարկել։ Մոտեցանք, ուզում էինք հասկանալ՝ ինչու են ծեր մարդու քաշքշում, ինչ է կատարվում։ Տեսանք ոստիկանները մոտեցան։ Արթուր Վանեցյանը եւս մոտեցավ, հարցրեց՝ ինչում է խնդիրը, իրենք էլ մոտեցան, սկսեցին քաշքշել, շրջափակել։ Տպավորություն էր, որ ԱԺ պատգամավոր, «Հայրենիք» կուսակցության նախագահ Արթուր Վանեցյանին ուզում են տանել կամ վնաս հասցնել, մենք էլ՝ շրջափակեցինք, փորձեցինք նրան բաց թողնել, հետո էլ՝ այլ հատվածներում քաշքշուկներ սկսվեց, անհամաչափ բիրտ, կոշտ, դաժան վերաբերմունք էր ոստիկանների կողմից, անհասկանալի։ Քաշքշուկ եղավ, առևանգեցին մեր տղաներից վեց հոգու»,- նշեց մեր զրուցակիցը։

Հարցին՝ արդյոք ոստիկանների կողմից ուժ կիրառելիս ակցիայի մասնակիցների շրջանում վնասվածքներ ստացել են, հարվածներ են եղել, թե ոչ, մեր զրուցակիցը նշեց, որ կան մարդիկ, որոնց ձեռքերը վնասված են, ակցիայի մասնակիցների մեջ կանայք էլ կային, որոնց նկատմամբ նույնպես անհասկանալի դաժանություն էր կիրառվում։

«Չեմ կարողանում հասկանալ՝ ինչ է կատարվում ոստիկանների ուղեղներում։ Փոխարենը միանան մեզ, իրենց բողոքի ձայնը բարձրացնեն, մի բան էլ՝ մեզ են խանգարում և նման դաժանությամբ»,- նշեց Սամվել Թադևոսյանը։

Մանրամասները՝ տեսանյութում

Աղբյուր` Փաստինֆո