Փաստ ինֆո

Գյումրիում այս օրերին կատարվում է այն, ինչ կատարվում է Վանաձորում, Հրազդանում, Երևանում և Հայաստանի մնացյալ այլ մեծ քաղաքներում, բացառությամբ, թերևս, Սյունիքի մարզի քաղաքների, որովհետև Սյունիքն, այս պահի դրությամբ, գտնվում է ադրբեջանական ուղիղ էքսպանսիայի վտանգի առաջ։ Այս մասին «Փաստինֆո» լրատվականի հետ զրույցում ասում է Շիրակի Պետական համալսարանի դասախոս Արթուր Համբարձումյանը՝ խոսելով իրենց քաղաքում տիրող հեղափոխական տրամադրությունների մասին։

«Մարդիկ Գյումրիում շոկի մեջ են, ապրում են ծայրահեղ ծանր սոցիալական վիճակում, Գյումրին դեռ աղետի մեջ է և պատահական չէ, որ, բոլորովին վերջերս, Կառավարության նիստերից մեկի ընթացքում, խոսելով Գյումրու առջև ծառացած խնդիրների մասին, մեկ անգամ ևս նշվեց, որ մարզը շարունակում է մնալ՝ որպես աղետի գոտի։ Գյումրում ապրող ամեն երրորդ մարդն, այսօրվա դրությամբ, մտածում է արտագաղթելու մասին։ Սա հստակ ցուցիչն է նրա, որ դժգոհության ալիքը քաղաքում չափազանց մեծ է։ Այս ամենին ֆոնին, վերջին օրերին, Գյումրում, նույնպես, որոշակիորեն ակտիվացել են ընդդիմությանը միանալ ցանկացող մարդիկ և մարդկանց խմբերը, և, ավելի քան վստահ եմ, որ դոմինոյի էֆեկտով շատ շուտով Գյումրին, նույնպես, ոտքի կկանգնի, ինչպես կանգնեց Երևանը»,- ասում է Արթուր Համբարձումյանը։

Հարցին՝ որտե՞ղ են անհետացել երբեմնի քաղակտիվիստ ներկայացող իրավապաշտպանները, որոնցից մի քանիսը նաև Գյումրու՝ ոչ այնքան լավա համբավ բնակիչներ էին, Արթուր Համբարձումյանը պատասխանում է՝ բոլորը, կարծես, իրենց տեղերում են, սակայն դերերն են փոխվել. «Ձեր զանգից մի քանի րոպե առաջ նայում էի ԱԺ պատգամավոր Մարիա Կարապետյանի՝ մեդիաներից մեկին տված հարցազրույցը, որտեղ վերջինս, ով ձեր նշած համայնքի ներկայացուցիչներից մեկն է, անդրադառնալով երեկ Երևանի՝ Լեո – Պարոնյան փողոցների խաչմերուկում կատարված զարհուրելի դեպքին, շատ հանգիստ տոնով և դեմքի խաղաղ արտահայտությամբ պատմում է, որ ավտովթարի պահին Փաշինյանի ավտոշարասյունն ուղևորվելիս է եղել խմբակցության նիստին, և, երբ արդեն նիստի ընթացքում հիվանդանոցից իրենց հայտնել են, որ հղի կինը մահացել է, իրենք շատ են ազդվել, Փաշինյանը, նույնպես, իրեն շատ վատ է զգացել և հավելում է՝ բայց ի՞նչ կարո՞ղ էր անել վարչապետը, եթե այդպես է ստացվել… Ստացվել է մի այնպիսի իրավիճակ, երբ այն մարդիկ, ովքեր Հայաստանում ժամանակին իրենց մարմինների համապատասխան մասերը ճղելով՝ անարդարության դեմ բողոք էին գեներացնում, այսօր, ի դեմ Մարիա Կարապետյանի՝ անմեղ կույսի կեղտոտ հայացքով ասում է՝ մենք ցավակցելուց բացի ուրիշ ի՞նչ կարող ենք անել»,- նկատում է Արթուր Համբարձումյանը։

Ըստ վերջինիս դիտարկման, տարիներ շարունակ, Հայաստանի Հանրապետությունում բուծվել են մարդիկ, ովքեր հասարակական գործունեության անվան տակ, իրականում, քաղաքական գործունեություն են իրականացրել, սպասարկելով արևմտյան որոշ ուժերի շահեր, որի առնչությամբ ինքը հիմա հարցադրումներ ունի. «Ես ուզում եմ հարց տալ նախկին իշխանություններին՝ ինչպե՞ս է պատահել, որ տարիներ շարունակ արևմտյան կասկածելի ֆինասական աղբյուրներից սնվող մարդիկ և մարդկանց խմբերը մեր երկրի ներսում, ստանալով որոշակի գրանտային միջոցներ, անարգելք քայքայիչ գործունեություն են ծավալել և դուք այդ մասին չեք իմացել կամ, իմանալով հանդերձ, ոչինչ չե՞ք ձեռնարկել այդ ամենը կասեցնելու համար։ Այս հարցը, բնականաբար, հռետորական բնույթի է, որովհետև հայտնի է, որ նույն այդ ուժերից անհամեմատ ավելի շատ գրանտային միջոցներ նույն այդ տարիներին ստացել է Հայաստանի Հանրապետության Կառավարությունը և, միգուցե, հենց դա է եղել պատճառը, որ լռելով՝ նախկին իշխանությունները փորձել են ցույց տալ նույն Արևմուտքին, թե իրենք որքան ժողովրդավար և իրավահավասար պետություն են կառուցել, ինչի արդյունքն այն է, ինչ մենք այսօր տեսնում ենք»։

Անդրադառնալով երեկ ՀՀ Դատախազության շենքի առաջ զոհված զինծառայողների ծնողների իրականացրած ակցիային՝ Արթուր Համբարձումյանը, կրկին, հարցադրում է կատարում՝ իսկ ինչո՞ւ երեկ գլխավոր դատախազի ելույթի ժամանակ նրա ուղղությամբ ոչինչ չշպրտվեց, որովհետև, եթե, օրինակ, այն դեպքը, որ երեկ կատարվեց Լեո - Պարոնյան փողոցների խաչմերուկում, կատարվեր մի քանի տարի առաջ, այսպես կոչված՝ նախկինների օրոք, ապա, ըստ վերջինիս համոզման, հայտնի իրավապաշտպանները, որոնց մասին խոսվեց քիչ առաջ, աներևակայելի բունտ կբարձրացնեին, իրենց մեջտեղից կճղեին. «Ի դեպ, նման դեպքի մենք, արդեն իսկ, ականատես ենք եղել Գյումրում, 2015 թվականին՝ Ավետիսյանների ընտանիքի ողբերգական մահվան դեպքերի առնչությամբ, երբ Գյումրում, նույն այդ կազմակերպությունների միջոցով գեներացված բողոքի ակցիաների ժամանակ, Երևանից ժամանած օրվա դատախազ Գևորգ Կոստանյանի ուղղությամբ ինչ իր և առարկա ասես, որ չշպրտվեց՝ էլ լուցկի, էլ քար, էլ սիգարետի տուփ և կոպեկ։ Ի՞նչ է՝ հիմա ցա՞վն է տարբեր, թե՞ խաղի օրենքներն են փոխվել…»,- ասում է Համբարձումյանը։

Այս օրերին Երեւանում թափ է հավաքում ժողովրդական շարժումը՝ ընդդիմության կողմից իրականացվող ակտիվ գործողությունների շնորհիվ՝ Արթուր Համբարձումյանը նկատում է՝ ամեն ինչ, ուղղակի, հիանալի է, ամեն օր գործողությունների ծավալն ու դրանց մասնակցող մարդկանց թիվը պետք է կրկնապատկվի՝ ինչպես թվաբանական, այնպես նաև՝ երկրաչափական պրոգրեսիայով. «Այն մարդիկ, ովքեր չեն սիրում Վանեցյանին, թող իրենց բակում միտինգ անեն, նրանք, ովքեր չեն ընդունում Քոչարյանի հայացքները, թող իրենց դպրոցի բակերում միանան բողոքի ակցիաներին, նրանք, ովքեր տանել չեն կարողանում 5165 շարժման լիդերներն, թող իրենց ինստիտուտներում բողոքի հուժկու ալիք բարձրացնեն։

Այն մարդիկ, ովքեր ինչ -ինչ պատճառներով չեն կարող փողոց դուրս գալ, թող իրենց տներից ուղիղ եթերներ մտնեն։ Բոլորն, անխտիր, պետք է իրենց ձայնը բարձրացնեն, ընդվզեն, պրոտեստ հայտնեն, որպեսզի էներգիան գեներացնելով՝ այս տականքին իշխանությունից դուրս քշենք։ Իսկ հարթակներում կանգնած լիդերներին խորհուրդ կտամ, որպեսզի իրենց հրապարակային ելույթներում անպայման և անդադար նշել, որ երկրի գլխավոր տականքը ոչ միայն հեռացվելու է իշխանության ղեկից, այլ նաև դատական կարգով պատասխանատվության է ենթարկվելու՝ պատասխան տալով Արցախը ծախելու, հազարավոր անմեղ երեխեքի արյուն թափելու և երկիրն անդունդի եզրին կանգնացնելու համար։ Ոչ ոք պետք է չկասկածի, որ մեղավորները պատասխանատվության են կանչվելու և պատժվելու են՝ օրենքի ողջ խստությամբ, որպեսզի նմանօրինակ հայրենադավության դեպքեր, այլևս երբեք, մեր երկրում չկրկնվեն»։

Աղբյուր` Փաստինֆո